دُنيا الخَيال ما أجمَلِك

دنيا الخيال ما أجمَلِك
فيكي أكون أعظم مَلِك
دنيا الخيال مَكتبي، ومَخْدَعي ومَلعَبي
الفكر فيها غِنوِتي، والحب فيها مَذهَبي
والشِعر فيها كلام نبي
****=*=****
في دُنيِتي
في وحدتي وفي خلوتي
باحكي كلام ما اقدرش أقوله لأي حَد
وامشي ف طريق مرصوف بطوله بأحلا ورد
باحلم بأن الدنيا مِلكي، ومعايا أفراحي وضحكي
وان كل الناس صِحابي، وان الحب يدق بابي
وان الشر شال خيمته .. وعَزِّل
وان الحِقد ما بقاش في السوق بينزِل
وان الخير فريضة عند كل الناس
عقيدة مقدسة وأساس
***
ولما أشوف دموع عايمة ف عيون الناس
دموع الظلم والعدوان.. ومُرّ الكاس
أقول: لا.. دي دموع أفراح
عشان أهرب من الواقع، عشان ارتاح
وأقول الظلم مش مقصود، وإن الكُرْه مش موجود
ألاقي بَدَل السيف "سيفين"، بِيِئذُوا الناس بإسم الدين
وأشوف جبار أو مجرم، يقولوا مجنون أو جاهل
أقول عاقل ومش عاقل، أقول إرهابي، أقول قاتل
وبيكبَّر بإسم اللَه ويتفاخر بقتل الناس خليقة اللَه
وروح الشر في نفسه لكل الناس
عقيدة مقدسة وأساس
***
آخُد حُزني لمحرابي، واحُط القفل على بابي
ألَمْلِم كل أفكاري، وأرسم خير في أشعاري
وادَوِّب هَمِّي في وَجْدي، واصَلِّي ودَمْعي في خدي
وأجيب البَسْمَة من قلبي، ومزمار الخيال جنبي
أغني.. ولو بدون نشوة
"لِنفسي" غِنوتي الحلوة
***
دنيا الخيال ما أجمَلِك
فيكي أكون أعظم مَلِك
دنيا الخيال مَكتبي، ومَخْدَعي ومَلعَبي
الفكر فيها غِنوِتي، والحب فيها مَذهَبي
والشِعر فيها كلام نبي
****=*=****
فجأة
وفجأة أفوق في محرابي، على صوت دَق على بابي
في وجداني، وفي وداني، أسَى وعويل
وصوت أيتام وأرامل، في عِز الليل
ودم شهيد بينقط على خدودي كأنه دموع
ما كان له ذنب غير أنه آمن بيسوع
وانا في الشعر والمحراب، نسيت الظلم والإرهاب
لأني جبان، لأني ضعيف، لآني خَنُوع
سِباق الظلم بيسارع، وروح العنف في الشارع
مافيش قاضي.. مافيش رادع
مافيش في الوطن إنصاف
والظالم ما عادشي يخاف
حاسيب الشعر والمَوَّال، وأسيب وَهْمي ودنيا خيال
وأرفع إيدي بصليبي، أعيش أو أموت دا نصيبي
لأن الله إللي أؤمن بيه إلَه واحد
إلَه فوق الجميع خالد
نصَحني أحب من غير ضعف
بلا استسلام... لظلم وعنف
حنادي وانادي للملايين:
أيا مظلوم بسبب الدين
قبول الذل باسم الدين أمْر لا يرضاه الله
وصَد الشَر عند الحُر "سلام" في جوهره ومعناه
وصد الشر عند الله "سلام" للناس
عقيدة مقدسة وأساس
***
أقوم منصوب في محرابي، واشيل القفل من بابي
وأخرج للحياة واهتف، أنادي كل أصحابي
بأعلا صوت أناديهم، وأحرَّكهم وأصَحِّيهم
يبيعوا الخوف اللي عاش فيهم
يخطُّوا الخطوة اللي ترضيهم
نحُط ايدينا في ايدين بعض، ويحصل اللي رَح يحصَلْ
يا إما موت بشرف وإيمان، أو تحقيق حياة أفضَلْ
لازم لازم ضروري نفوق، ونرفع راسنا عالية لفوق
ومهما ليل الظلام طَوِّل، بعده فجر.. بعده شروق
وأقول للظالم وللجاني
أنا مصري.. أنا قبطي، حقوقي عليها بتخطي
وبتسميني نصراني
أنا فخري.. بأوطاني، وفخري كمان بإيماني
سيب الأديان لحُكْم الرَب
أمِد أيدي إليك بالحُب
لا انا خايف ولا منافق
بلاش نكْرَه.. ونتخانق، بلاش ع الشر نتسابق
أخوك... لو تآخيني، نتآخى بسلام صادق
ونبني الكون بروح واحدة، في حُريَّة.. وفي وِحْدة
****=*=****
فجأة
فجأة لقيت يَد ممدودة
بصورة غير معهودة
تفكَّرني بعهد جميل، تفكَّرني بسابق جيل
أيام سعد واصحابه، وقَلْب الأمَّة على بابه
وأيام مصطفى وفريد، وأيام مصطفى النحاس
وغيرهم في البطولة عديد، مُوَاطنة وحب بين الناس
***
قال لي بحُب وشهامَه: أخي "المغرضين" يامَه
وروح "الجهل" عَوَّامَه، وأيادي "الغُرب" هَدَّامَه
لكن الخير في النفوس مدفون، وجنبك ناس للعهود بتصون
واللي يفرَّق صَفِّنا ملعون
فخُد إيدي في إيدك نحقَّق الإخاء فيَكون
أنا مصري.. أنا مسلم.. وأنا في الأصل إنساني
إيمانك يا أخي ف قلبك.. كما في قلبي إيماني
لأن الله.. عندي أو عندك.. إلَه واحد
ومصر.. عندي أو عندك.. وطن واحد
وماضينا في التاريخ واحد
وفي قلوبنا الهدف واحد
وقدامنا الطريق.. واحد
أنا وانت حنبدأ عصر، لصالحنا وصالح مصر
لأولادنا.. وأحفادنا، نجدد عصر أجدادنا
كلانا له في قلبه دين، بس أساسنا.. مصريين
ونرجع تاني زي زمان، كلانا في الحياة إنسان
مهما اختلفت الأديان
***
كلام بالحق طمِّني بأن مصر لسَّه بخير
وفيها ناس هَدفها الوحدة والتعمير
لِلَمّ الشمل.. لا الفُرقة ولا التدمير
وروح الوحدة في الأوطان "سلام" للوطن والناس
عقيدة مقدسة وأساس
***
ساعتها جمعت أفكاري، رجعت ارسم في أشعاري
وجِبت البَسْمَة من قلبي، ومزمار الخيال جنبي
رجعت أغني من تاني
أغني بفرحة وبنخوة
لمصر.. غِنوتي الحلوة
***
دنيا الخيال ما أجمَلِك
فيكي أكون أعظم مَلِك
دنيا الخيال مَكتبي، ومَخْدَعي ومَلعَبي
الفكر فيها غِنوِتي، والحب فيها مَذهَبي
والشِعر فيها كلام نبي