جميله ماشيه تتطوح في عز الليل خطاوي ماشيه تتمطوح في ليل امشير تدندن لحن صوت عالي وتتونس بضوء قناديل وجاي وراها شاب جميل يقول يا جميل رايح على فين؟ تقول طالب هوى امشير اغني واطير وانت لفين ؟ يقول بتمشى ومروًح وهيً واقفه تتطوح يفوح منها روايح خمر يكلمها بصيغة الأمر انتي مين؟ وكنتي فين ؟ ورايحه لفين ؟ تقول له بلاش جميلة الليل ما تسألهاش ماتؤمرهاش دي لو كانت جميلة الطبع ماكانش وفاها ضاع ببلاش ! بيستغرب جرائتها يقرب خطوه ناحيتها يقول مالك؟ تقول له الليل سواد حالك ويسأل تاني سنك كام؟ تقول له عِشت مليون عام من الوحده وم الحيره ويوم عِشته هوى وغيره يا عمي فضها سيره هوى أمشير براح وزحام يقول خايفه تصاحبيني ؟ تقول له يعني إيه أصحاب ؟ يقول في الشده تلاقيني وادعيلك في كل غياب تُبص لفوق وتتنهد وفجأه تقول يا ليل كداب يقول لها ليه ؟ تقول له أصله قبلك قال نكون اصحاب ! فتحت الباب وآمنته جنوني وعقلي سلمته وسلمني لإيدين أغراب ! يقول عايز اناديكي اقولك ايه ؟ تقول له إسمي صبر عليل اقولك/قولٍي بنت الليل يقول لها لأ هناديكي واقولك ليل تقول يا غريب دا إسم جميل يقول بصراحه جاوبيني خرجتي منين ؟ ورايحه لفين ؟ تقول له لسه ليلنا طويل وليل امشير غاوي المواويل عايز تعرفني غنيلي وولع شمع قنديلي وإفتح للحديث ابواب واحكيلك وتحكيلي ونفتح للحنين سرداب يغني يقول مُنايا ياليل اناجي الليل ويسمحلي وباب القلب يفتحلي فتضحك ليل تقول له خلاص رح احكيلك وقصة عمري حهديلك (وأخرنا سواد الليل ) بقلم
