بابا ... علمنى حب الوطن(3)

كرم هشام بيحب القلبظ زى عينيه،اللى يخلى عمته بتقول يا ناس اعذروه طعم القلبظ جميل قوى يبقى كرم الصغير هنقول له أيه بس يا ناس ؟ المهم تكمن المشكلة فى انه فى كل مرة ياكله لازم يسخن وحرارته تزيد ويقضى ليلة طويلة جدا مع الكمادات والأدوية ،وفى يوم لقيته بيقول :بابا ..نعم حبيبى تعالى يا كرم لقيت معاه مسدسه "اللعبه طبعا" وبيقول أنا عاوز يابابا أبقى ظابط وأمسك الحرامية اللى بيخطفوا العيال الصغيرين .قلت فى نفسى فرصة يا واد وجت لك لحد عندك ،بص يا عم كرم عاوز تبقى ظابط لازم تبطل أكل القلبظ والكاراتية والحاجات اللى بتتعب منها وبتشرب دوا وتاخد حقن بسببها .
وبعدين اللى عاوز يبقى ظابط لازم يبقى جسمه قوى وعلشان جسمنا يبقى قوى لازم ناكل الأكل اللى يخلينا أقوياء ونقدر نمسك الحرامية اللى بيخطفو الصغار وبيسرقوا مصر والمصريين وبعدين لما تكبر وأنت عايش على القلبظ ومفيش أكل هتبقى ظابط ضعيف ومش هتقدر على الحرامية .صح ؟ صح يابابا .خلاص مش هاكل قلبظ تانى .هوه ده الكلاد يا كرم ، مصر عاوزة رجاله بجد مش رجاله قلبظ .