وبيقولوا

ميمي محمود عبدالجليل
وبيقولوا سيبية تعبان ومترديش
ولو عدي قصاد البيت فلا تقفي له عند الباب
وسكي الشيش
ولا تخليه يشوف طيفك ولا يسمع صدي صوتك
واحسن له يروح ميجيش
كلام موزون ومترتب بميت حكمة
ما هما شافوني لما عانيت ..ولما بكيت
ولما الجرح صار،ينزف ساعة م جنابه ساب البيت
ولما رجعت من تاني وكات افعاله وجعاني
ورحت شكيت
ف بيلوموا ...
يقولوا ضعيفة مش قادرة وحجتها .تقول حبيت
وايه فيها ؟؟
م هو صحيح انا حبيت !!
لكن مش حب م العادي ولا قصة وكلام فاضي
دي عشرة عمر فيها كتير من الحواديت
مشينا طريق طويل جداا ورغم السن والخبرة
علي ايده انا اتربيت
انا هحكلكم القصة في موجز مختصر جدا
يا دوب كام بيت
انا وهو،مكناش قصة م العادي
بمعني كنت نا عشقتة بكل كياني وفؤادي
وهو عشقني وبقوة ف عز النوم يدندن اسمي وينادي
وكنت حبيبتة وعشيقتة وكنت امه وكنت اختة
وكنت الخالة والعمة وكنت الزوجة واللمة
وكنت صحابه وقت الشدة اخده ف حضني وادادي
مهو كان زي ميت عيلة..بيكفيني وكان واحد من اولادي
ولكن كل شئ مكتوب ..
قدر
قدر ونصيب ولما يصيب م تقدر،عنه لحظة تغيب
وتملا الحجر بالمقسوم
ومن امتي الفرح بيدوم؟
ولا الراحة ولا الهيبة ... ويدخل ميت شيطان بينكوا
يصيب القصة بالخيبة
تبات مهموم ..
اكيد ..معلوم
م هي الفرقة تجيب اوجاع كتير بالكوم
وانا ........
أنا موجوعة بزيادة و بتألم وكالعادة وناس بتلوم
عرفتوا القصة يا سادة
أنا موجوعة بزيادة
وهو،كمان ...
انا عارفاه بيتألم اكيد تعبان
وجرحي اللي نزيفه مرار وقصتنا ورا الجدران
ومين فينا اللي باع او خان.. .
صبح دخان
حاولت كتير ابيع وانسي واحاول اشتري نفسي
واقول الحب عمره م كان
لقيت نفسي كمان بتروح ..
م هيا القصة ساكنة الروح
واهو راجع!!!!
وتاني بالغرام بيبوح
وقال تعبان وقال مشتاق
وقال انت الهوي فيا وانتي الروح
انا زيك ببات مجروح
فدلوني
انا مش عاوزة غير صوتة يريحني وكلمة حنينة منه تفرحني
انا مش طالبة ييجي البيت ولا عاوزاه يجيب فاكهة
ولا يساعدني في المصروف
انا مش طالبه غير قربه يرد الروح..
ولما ازهق لعنده اروح
ونحكي لبعضنا ونبوح
واحكي له ويشكي لي .....
مهو احنا بعيد عن الورقة اللي مكتوبة روحين جمعها رب العرش داخل روح
انا بعلنها يا سادة ................
برغم اني قاسيت جداا
ورغم اني بلف واشوف
انا ف بعده بمووووت م الخوف
فلا تقولوا
ولا تلوموا
ولا تزيدوا نزيف مدبوح
ف حاولوا تنسوا قصتنا
وسيبوا الجرح للمجروح!!!
.......................
# ميمي عبدالحليل