الواد زعبوله والحاج أحمد اللبان وصفائح الذهب والدولارات

فرشوطى محمد
الواد زعبوله داير يَلْسَن فى الكَفْرُ كله ويقول : الحاج أحمد اللبان قبضوا عليه النهارده وهو غرقان فى طشوط من اللبن والقشطة وبياخد صفايح دهب ودولارات رشوة.ياعم فرشوطى .
قلت له : اسكت ياواد يازعبوله عيب عليك دا الحاج أحمد اللبان راجل طيب وبيحج كل سنه ويعمل عمره كل اسبوع وبيرجع زى ما ولدته الحاجة أم لبن.
قال - ياسلام ياعم فرشوطى دا على كدا طلع راجل لبن قوى، يقوم يزوّر ويحج، ويرتشي ويسكع عمره ، و يدفع الآلاف للفيزا ولشركات الطيران، وللمطاعم علشان يشغل الناس ويرجع بهدايا للفقراء فوق ألف ناقة من نوق النعمان المعروفة بالعصافير .
قلت - أمال ايه يازعبوله الراجل خدوم وبيخدم الأهل والعشيرة وبيأدى الفروض والمناسك كلها.
قال - يعنى على كدا ياعم فرشوطى بيرجع من هناك مغسول من خطاياه بالماء و الثلج و البرد ومياه الورد؟
قلت ضاحكا - ايوه ومغسول باللبن كمان يا زعبوله
قال زعبوله - يابختها الحاجة أم لبن بالحاج أحمد أبو لبن ابنها – قوللى ياعم فرشوطى احنا عندنا في مصر كام واحد من ماركة أبو لبن ده .؟
قلت - يوووووه يازعبوله ماتعدش ملايين – بس أصناف - فيه ماركة أبو جلده – وأبو سكر – وأبو بانجو نسبه الى جده أبو حشيشة – وأبو زبيبة – وأبو لحية –تجارة على كل لون يازعبوله .
قال - طيب ياعم فرشوطى أهى الحكومة قبضت عليه اما نشوف حايدافع عن نفسه يقول أيه .
قلت - حايقول لهم من تعبى وعرقى وهذا من فضل ربي.
قال - ياسنه سوخه ياعم فرشوطى التجارة دى بتكسب كتير قوى !! بس أبو لبن كان حايعمل أيه بالفلوس دى كلها!! صفايح دولارات وايشي صفايح يورو – وصفايح دهب وصفايح ريالات سعودى بخلاف السيارات والعقارات – كل دا كان يكفى احفاده لحد ما تقوم القيامة .
قلت - يا واد يازعبوله الحاج أبو لبن راجل اعمال ومستثمر كبير وبيعمل مشاريع لإحفاده وبيأمن مستقبلهم.
قال ساخرا- ايوه ايوه – دلوقتى فهمت حايفتح لهم محل لبيع شرش اللبن. والعصير ويكتب على الواجهة وسقاهم ربهم شرابًا طهورًا. وبالمره يعمل لهم كوافير ويكتب وجوه يومئذ ناعمه.
قلت - بالظبط كدا يا زعبوله وعلى كل سيارات النقل يكتب باسم الله مجراها. ومن شر حاسدا إذا حسد.
قال - ويرشح نفسه في الانتخابات ويغرق الشوارع بصور الحاج أبو لبن وهو في الحرم ويكتب بالخط العريض الا تنصروه فقد نصره الله.
قال - والناس تنتخبه بعد ما ظهر أنه رجل البر والتقوى والصلاح - وينجح – ويدخل مجلس الشعب ويقف يجعر قدام شاشات التلفاز ويطالب بتطبيق الشريعة ويخبط خطبه دينية متينه ويختمها بأية "ومن لم يحكم بما أنزل الله فأولئك هم الكافرون"
قلت - وينجح في الدورة التانيه – ويعمل له محل فاكهة مستورده لزوم مايلزم .
قال زعبوله - ويكتب على الواجهة "وفاكهة مما يتخيرون"
قلت - ويستثمر في الفراخ واللحوم المنتهية الصلاحية ويكتب فوق الاكياس ولحم طير مما يشتهون.
- قال زعبوله على طريقة المرحوم حسن عابدين في مسرحية " عش المجانيين " يالهوى يالهوى ياعم فرشوطى يا لهوى . التجارة بالدين جامده قوى وبتكسب الملايين . ثم جلس باكيا وهو يردد إِنَّ الَّذِينَ يَشْتَرُونَ بِعَهْدِ اللَّهِ وَأَيْمَانِهِمْ ثَمَنًا قَلِيلًا أُوْلَئِكَ لَا خَلَاقَ لَهُمْ.
قلت هامسا : انها أخطر تجارة فاسدة على وجه الأرض. ثم اقتربت من زعبوله وجلست بجواره وانا أقول له تعرف حكايه الشيطان اللى هرب من مصر، وحرس الحدود،مسكوه، وحاولوا منعه، ولكنه أصر وقال لهم: سيبونى حرام عليكم، الواحد من دول أساعده يسرق وينهب وينصب لحد ما يبقى مليادرير، وبعدين أدخل عليه ألاقيه حاطط وراه لوحة كبيرة مكتوب عليها: «هذا من فضل ربي»
فرشوطى محمد كاتب وصحفى ساخر