فرشوطى محمد يكتب : الطموحات الاردوغانية السلطوية بعد فبركة الانقلاب وتدهور سجل الحقوق والحريات

فرشوطى محمد
كتب – فرشوطى محمد - الواد زعبوله عمال يَلْسَن فى الكَفْرُ كله ويقول :السلطان أردوغان أبو ودان قعد على السلطة ودلدل رجليه ،وبنى له قصر فيه 1150 غرفة ب 500 مليون يورو – وعلشان عدة السلطنة تكمل قام رايح بانى مسجد "شامليجا"،ب 6 مأذن علشان يبقى قريب من ربنا - وعلشان هو رجل إخوانى ومابيحبش التبذير صرف على المسجد ابو 6 مأذن 65 مليون يورو .
قلت وانا أجذبه من جلبابه بصوت هامس : اسكت يا واد يازعبوله بلاش فضايح – ايه المشكلة يعنى ..... السلطان يصرف زى ماهو عايز – دا سلطان زمانه ... دا حتى كان عامل مجسم للجامع استخدم فيه 1805 سبيكة ذهب من عيار 100 جرام، و1384 سبيكة ذهب من عيار 20 جرام، و75 سبيكة فضة. كلف بس على المجسم 10 ملايين دولار. راجل بتاع ربنا يازعبولة.
قال زعبوله صارخا : ياعم فرشوطى .... جااااااى هو مش عارف ان المبذرين إخوان الشياطين .
قلت : عيب يا واد يازعبوله ... عيب تتهم السلطان الطيب بالتبذير .. المسجد مهم علشان السلطان يصلى فيه ... ويخطب للجماعة .... ويعلمهم على النزول للشوارع تحت راية "الجهاد" وقت الزنقة.
قال زعبوله : يعنى عايز تقوللى ان أردوغان ابو ودان بيأسس فرقة إنكشاريّة من مطاريد الجماعة زى السلطان أورخان علشان الفتوحات والخلافة الإسلامية والمعارك الداعشية.
قلت ضاحكا :انت يازعبوله عرفت كل ده منين ؟ ...
قال زعبوله : ايه ياعم فرشوطى انا صحيح فلاح بس افهمها وهى طايره ... ومش ناسي السلطان سليم الأول اللى عمره ما فكر فى مصلحة مصر .... كان كل اهتمامه بربطها بعجلة الامبراطورية العثمانية، و استنزاف مواردها، و ابتزاز أموالها، و اذلال أهلها.
مرت فترة صمت بيننا اشعل زعبوله سيجارة لف وشد نفس عميق وقال وهو يتابع دوائر الدخان :
طيب قوللى ليه السلطان أردوغان"خليفة المسلمين "الراجل المؤمن مابيمنعشي بيع الخمور ويغلق الحانات.؟
قلت : منع .... منع يازعبوله منع بيعها بجوار الجامع !
قال ضاحكا: بس ؟
قلت : دى نقرة ودى نقرة يازعبوله ... ثم ان دخل الخمور والسجاير فى تركيا مائتي مليار دولار أميركي.
قال زعبوله : ايوه ..ايوه علشان كده الجماعة الإنكشارية مبسوطة وبيحبوا حياة البزخ والترف وحريم السلطان.
قلت :مش كله ...فيه نسوان في تركيا بتصلى و لكنها لا تخجل من إنجاب طفل بطريقة غير شرعية.
قال : يعنى زى شرعية مرسي !!
وبعد فترة صمت قال زعبوله : انا سمعت ان ثروته اكثر من مليون دولار. و عائلته عندها ممتلكات في إسطنبول وأنقرة تقدر بملايين الدولارات......ولا ابنه "بلال "من أكبر رجال الاعمال فى تركيا!برغم ان السلطان ابوه كان بيبع بطيخ وسميط وهو طالب فى الابتدائى والإعدادي.
قلت : العمل مش حرام يازعبوله
قال : والسرقة؟
قلت :كلها تجارة !
قال : بالدين؟
قلت – التجارة بالأديان هي التجارة الرائجة في المجتمعات التي ينتشر فيها الجهل زى ما قال بن رشد.
قال : لقد أعاد العلاقات مع إسرائيل وتعهد بمنع اى نشاط من حركة «حماس» ضد إسرائيل من الأراضي التركية !
قلت : السلطان أردوغان سوف يتحالف مع الشيطان من أجل الكرسي لانه يطمح فى تمديد فترة حكمه لتركيا مدى الحياة. بموجب التعديلات الدستورية المرتقبة.
قال : يعنى الانقلاب كان فنكوش وفبركة أردوغانية؟
قلت :السلطان يريد حكما دون أي منازع ويسعى لتعزيز صلاحياته من خلال فرض تعديل دستوري يتيح له تعيين عدد من النواب بمعزل عن البرلمان مع إلغاء منصب رئيس الوزراء.
قال زعبوله بحزن : يعنى قدر يصنع من نفسه بطل عن طريق شيوخ الفتنه وعلى رأسهم يوسف القرضاوي، مفتي «التفجيرات الانتحارية»، فاكر قال ايه فى مهرجان «شكراً تركيا»، اللى عُقد بإسطنبول في نهاية (أبريل) 2016.
قلت : قال أيه يازعبوله ؟
قال: وقف الشيخ القرضاوى يخطب .... وكل شويه يشد الطرحة البيضة اللى بتتزحلق من فوق دماغه ويقول «من الذي يستطيع أن يقاوم السلطان رجب طيب أردوغان، ان اردوغان هو الوحيد الذى أصبح يدافع عن الأمة باسم الإسلام والقرآن والسنّة والشريعة
قلت : بطل في أعين فئات من السُذَّج وجماعات الخراب.يستخدم نعرة قومية فارغة وصبغة إسلامية زائفة .... الدولارات لها مفعول السحر يازعبوله.
قال زعبوله : أمان ربى امان ... دلوقتى فهمت ليه جماعة الإخوان بتروِّج لكل سقطاته وتصورها على أنها فتوحات كبرى. دا الدولار ده سره باتع ياولاد.