صرخة الجنيه

عبدالعزيز محمد المنسوب
عملتنا سايحه ومش لايحه
ضغط الدولار ابن التنين
أصل اللئيم غمز الغمزه
وقعت قوام منها العشرين
مسكينه دايما بتطاطي
عايزه تعيش من غير تحصين
دا ف كل شهر بسعر ولون
ومفيش حسن ولا عم حسين
دكتورنا رامز قال معلش
دا بكره هيكون بالجزمه
عوّمْت علشانه الفرخين
فكّينا يا حماتي الرّزمه
وبعنا الاخضر من دارنا
فنغزنا في القلب النغزه
ونقطه ورا نقطه بصفرين
هيكون خلاص خدنا بأزمه
عقلي خلاصْ قرّبْ هَيْشِتّ
من تصريحات البيه والسّتّ
عمال يقول احنا الفايزين
والشاشه تهتف يحيا الفِتّْ
والمستفيد في البنك يلفّْ
لدولاره واحنا نعد في لِفْتْ
والموزه تصبح بالستينْ
والميجا تصبح مهر البنتْ
دا الحلم عايش في الدكاكينْ
نفسى يكون جنب التنينْ
وأشوفه زي ما كان في زمان
في عهد أولادنا الغاليين
كان الدولار واطي ومسكين
بيطاطي دايما مخزي العين
لكن ما فيش فايده يولدي
تجارنا عايزنها بِسِنْتِينْ
طول ما الرواتب بالملايينَ
مايهمّهمش خراب البين
إيه يعني ينزل ونعاني
دا فلوسه من كوكب تاني
قَصْقَصْ لِي ياناس في جناحي
وقال دا سعره الأصلاني
يا خلقْ مش ناقصهْ تجارب
ما عدشْ في الخلق مروّهْ
ولا عاد في جيبهم أي قروش
أكلتها أسعار الهوّهْ
غيّرْ يا ريّس لاجل الله
رامز وعيّنْ ناسْ حِلْوِهْ
عمر اللي ينزل ما بيطلعشْ
دا العمله كشّت مش بايْنِهْ
آخرتها هتكون كبريزة
بالألف تشتري تحويجِهْ
غيّرْ يا ريّسْ لاجل الله
رجّعْ لعملتنا الهِيبِهْ