إلى المواطن : محمد حسني مبارك

فتّح عينك ..
شوف مين بيدِينك ؟
قول مين .. عن شَعبَك باعدينك ؟
اتعاهدوا عليك .. وخانوك .. !!
أو كانوا معاك .. ومعاهدينك ؟
مِش فارقَه .. نهارَك بقىَ ليلك
قوم قابِل شَعبَك .. بدليلك
واشهَد على نفسك ..أو.. غيرك
وبلاش النومَه في سريرَك
أنا رافض شكلَك .. مذلول
بعد ماكنت بهامتك ..
فارد قامتك .. عرض وطول
انطق .. قول ....
إعلن للعالم إنّك .. أدّ يَمينَك
إخرج من صمتك .. بكرامتك
صمتك .. مش رفض لحالتك
ولا رفض لحالة شعب اتهان
.. على عينك .. من نسل فلول
رفضك على إنّك تعلن ..
كنت موافق - أو - مشلول
هايلوّث إسمك .. وجبينك
***
لو دينّا .. دينك ..
أرجوك اتكلّم .. مايهِمّك حَدّ
لو لينا ف قلبك ذرّة وِدّ ..
إثبت للعالم إنّك .. مصري بجدّ
شارِب مِن نيلها .. وشايلها ف عينك
وصاينها .. ومحافِظ على ناسها وطينها
ورادِع .. أي فلول تستَوطنها
وزيّ ماعشت كمان فيها .. تموت فيها
ويبقالك ذكرىَ في موطنها
وحكاوي عَنّك .. في سنينك
وتاريخك ( أبيض ) مُمتَدّ ..
إنطق .. ليك حق الردّ
فيه ناس بتحبّك .. مِن شعبك
وكتير اختلطِت مفاهيمهُم
مابقوش عارفينك !!
***
ماخلاص مش فاضِل ..
غير حُكم .. وتأكيد الباطل
وإدانه لعهد قانون عاطِل
على إيه بتسَوّف .. وتماطِل
مابقاش ليك غير الصِدق
.. فكون راجل
واصدُق مع شَعبَك
خلّيه يحترمِك
ويراعي مراحِل إحساسك
لو كنت حقيقي .. تستاهِل
وقفة أحبابك مع ناسَك
خليّك .. عاقِل
وافهم إنّك .. راحِل
هاتقابِل رَبّك ..
مِن غير حُرّاسَك
أو .. حِزبَك
ولامجلِس شورتك
ولا عِزّك .. وسرورك نافِع
ولا شافِع فيك شِلّة إبنك
ولأنّك أقسَمت .. فقول
وحدَك .. هاتقول الحق
بنفسَك علىَ نفسَك ..
ولا حَدّ ينافسَك ..
يتحقّق كل اللي فى نِفسك
وتسَجِلّ في تاريخ أيامَك
إسمك .. بيمِينك
***
صَدّقني قضيّة مصر
مِش إعدامَك ..
أو حتّىَ ان كُنّا مسامحينك
صدّقني قضيّتنا فى مصر
سؤال واحد ..
مين لَطّخ سيرتَك .. ومَسيرتَك
مين هَزّ فى صورتَك .. واتمادىَ
.. وعن شعبَك .. حَصَرَك ؟
وسَمَحلَك .. تعادينا وتِهلِك
أحلامنا .. وتشَتِتَ أهلَك
خَلّوك تمثال ..
أطرش ..
مِش سامع صوتنا بيندَهلَك !!
لَو كُنت فَقَدت بَصيرتَك
.. فين بَصرَك ؟
دلوقتي مفيش حَد يعينك
وباقيلك .. دينك
أرجوك .. فَتّح عينك
وانطق .. أو ..
دينّا غير دينك
***