جند احتياط

يا زهرة
تونس الخضرا
ربيع الشعر
بقي دابل
وأنا سابل خيوط الموت
علي جفني
وراجفني
صراخي و صوت
بكي مستقبلي الغابر
في أحشائي
مقابر
كل يوم في الحلم
بتقطع
وبتقطع ف أحشائي
وأنا بركع وبتلطم
في وسط الموج
وهوج
لاهب شراييني
جبيني
صفحة ومحابر
بتكتب كل يوم مخطوط
وأنا مربوط
في ساقية همي وأحزاني
وأوزاني
في قلب قصيدتي
ضيعانه
وضايع انا
في وسط التوه
ومن اسمي
حروف اليأس
علي ارض الأمل بتوه
وأنا المشبوه
تملي أتشاط
وأعيش خياط
لأحلامي
وأحلامي بتترقع
شتا خطواتي
بتسقع
ودم الهم بيبقع
علي توبي
وتوبي
توهت في دروبي
وبآخد كل يوم
بالباط
جيوش إحباط
موعداني
وأنا جند احتياط
فيها
لانا قادر أوفيها
أكون صاحب
قرار فيها
ولا قادر ألم سياط
كوت ظهري
وكام كرباج وبيعلم
علي بطني
ولخبطي
أنا اللي كنت يوم
سلم
أمانيها
وفي عنيها
كتاب للعشق يترتل
وأقولك ايه
وأنا م الذل
كل كلامي بقي أهطل
قوليلي بس اعمل ايه
في زمن التيه
وأنا العاشق
وقلبي كان ربيع اخضر
وياما لحبها اخلص
وكل يومين
الاقيني وأنا الغالي
بقيت ارخص
حاولت كتير الملمني
من الطرقات
وفات
العمر في محاولات
ومش نافعة
أنا الدفعة
لكن في كتيبة مهزومة
بقالي سنين
وأنا في نومه
كتير فكرني قالوا مات
حاولت كتير الملمني
ألم لامني
وألم لومته
وفي الملامات
بقالنا سنين أنا وأمة
لا جمعتها فرح لامة
ولا دمعة
في بخستها
حزانتها
وهبيتها بقت معروضة
في الأسواق
ولا شراها أمل بكرة
ولا جايبة تمن
في مزاد
وساري البيع
وبالعلني
وزعلني ان ضحكتها
بتسخر
كل يوم مني
ولا صوتها اللي بيغني
بقي يصدح
ولا ربيع عمرها
بيطرح
غير الأنات
وأنا بالذات
مشاعري مرهفة جدا
وبدن كل يوم
وبلال
زهق مني
واغني غنوة الأحرار
وأنا كداب
مغالطة مني وأونطه
مانا في مالطة
محدش فيها بيصلي
ولا بيسمع لصوتي أدان
بقينا كلنا أموات
بنقري الفاتحة
علي روحنا
ونأكل من جروحنا
أصناف
وبنحلي بمر وهم
دم
تملي بقي نازف
وشوف كام عام
وأنا واقف
محلك سر
ف محلي
لا فيه مؤمن يرتلي
علي ذلي
آيات أفراح
ولا عازف علي قبري
يقلي
ويدعي بالرحمات
ولا كافر بيتركني
وأنا في ركني
القديم مصلوب
علي الهوة ومن جوه
بيوجعني
فجيعة قلب
ومراره
وشعور بالذنب
حاسس أني زي الكلب
وبلملم
في عضم الروح
وأنا منبوح
في قلب شوارع
الزيطة
مشيت حافي وع الأشواك
وبتنطط
ومتخطط علي ظهري
أسي وعلامات
لعلي مات لكن نفسي
طالع داخل
مانا ساحل ومرسي
في بحرك الفقري
ومن فقري
أنا بتعض
من كل الكلاب
ع الأرض
لما العض فوق جسمي
صبح شبكات
وأنا اسمي صحيح
عايش
لكن إحساسي من جوه
من الكدمات
مؤكد مات
فتحت لحلمي كام دفتر
وقلت اطل
م الشبابيك
وأتذكر سنين الفل
وافتح باب
لشمس
وكان شعاعها غاب
أحاول أحس
إني إنسان
وأتكلم
يكون لي لسان
وأتظلم وأبوح
بالسر
خلاص مليت
أعيش مش حر
متذنب
علي باب الرجي
بحسب
سنين عدت
واعتب
علي اللي كان
من مر
في حلوقي
وأنا شوقي ولهيبي نار
وقايدني
وقايدني تجاه بكره
بجد خلاص بقيت
بكره
معاني الظلم في المعجم
وفي المعضم
جميع لحوال
أنا مليت أعيش رحال
سفينة قلبي
تعبانه من الترحال
خلاص مليت أكون موال
من الإحزان بتكرر
وشخصية بطل مدبوح
وفيا تملي تتجسد
علي مسرح بيتسلسل
بنار وحديد
مسلسل
رعب للأطفال
أنا هنسج
خيوط الحلم من تاني
ومش هيأئس
انا هلبس
دروع الصبر
وأحارب وبتمني
أقابلك تاني ف الجنة
تشوفي الحنة
علي أيدي
ومن كفني لازم أخرج
واتمني يكون الوقت
ده مناسب
ومش هستني أتحاسب
هحاسب نفسي قبل الغير
خلاص رايح
وهنفض من عليكي غبار
وباستمرار
هحارب معهد الأشرار
ده زي النمل بيخرج
في كل ثواني ميت
غدار
وهرمي روحي وسط النار
ولو تحرق
أنا قررت أكون صاحب
لكل نهار
أكون صاحب أكون مبدأ
خلاص هبدا
وهزرع ورد وسط الشوك
وألف خضار
وأقول وسط الدمار
ميت مرة في الثانية
يارب الدنيا
لسه بخير
عمار يا حب لسه عمار
---------------
رابط القصيدة بصوت الشاعر
http://www.youtube.com/watch?v=Ljx4PE-LKkY
------------
ايميل الشاعر
mabouzeid87@yahoo.com