من غير ما تشرب أى حاجة .. بتسترجل إزاي ؟

كل واحد عايز يحافظ على رجولته قدام الناس ، وعشان كده بيحاول يبعد عن أى حاجة ممكن تقلل من صورته واستحالة يقرب منها ، والحاجات دي بتختلف من شخص للتاني ، تعالوا نشوف ايه الحاجات اللي استحالة يعملها الشباب المسترجل من غير ما يشربوا اللي بيقولوا عليه في الإعلانات
محمد سعد -20 سنة كلية آداب- بيقول إن الحاجة اللي استحالة يعملها علشان يحافظ على رجولته انه عمره ما هيلبس الألوان الحريمي زي النبيتي أو البرتقالي، وكمان استحالة ياكل لبان في الشارع.
ومحمد محمود -21 سنة كلية آداب- بيقول ان الباديهات بتقلل من رجولة اللي بيلبسها ، لإنها حاجات خاصة بالبنات، وهو مستحيل يلبس الباديهات دي، وكمان الحاجة اللي مش ممكن يعملها إنه يشتغل كوافير حريمى.
والحاجة اللي استحالة يعملها إلهامي موسي -20 سنة كلية دار علوم- انه عمره ما يفكر يلبس خواتم أو سلاسل لإن الحاجات دي اتعملت للبنات وبس، أو يلبس حاجة لونها أحمر، وكمان عمره ما يعمل (تقفيز) في البنطلون، يعنى البنطلون اللي رجله بتكون ضيقه من تحت.
عادل المحلاوي-20 سنة كلية تجارة- بيقول إن أكثر حاجة بقت مستفزة في الأولاد دلوقتي وبتقلل من رجولتهم هي لبس (الاسكارف) واللي هو حاجة بتتحط على الرقبة، وكمان استحالة يتفرج على برامج الطبخ، لإنه في النهاية راجل وعمره ما هيطبخ.
استحالة أسقط البنطلون .. ودي أهم حاجة بيبعد عنها رمضان جمال-20سنة كلية آداب-علشان يحافظ على رجولته، وكمان مش بيقلد عمرو دياب في كل حاجة أو يصوّت لما يسمع تامر حسني زي البنات والولاد اللي بيحضروا حفلاته.
أما فادي رسمي -21 سنة كلية تجارة- فله رأي مختلف ، وهو إنه عمره ما يفكر يهين واحد قدام بنت حتى ولو كانت البنت اللي مرتبط بيها.
هشام سليمان-20 سنة كلية دار علوم- بيبعد عن اللبس اللي بيلمع واللي بيشوف شباب كتير بيلبسوها.
وبالنسبة لمحمود سامي -22 سنة كلية تجارة- فيرى ان الراجل شخصية مش منظر، والحاجات اللي استحالة يعملها انه يمشي زي البنات، ولا يلبس جزمة لونها أحمر، أويعمل في محل أحذية للبنات، ولا في كوافير.
شريف سامي -21 سنة كلية تجارة- بيقول انه استحالة يتفرج على أفلام كرتون، واستحالة يخطف بنت من واحد صاحبه.