علشان السنارة تغمز.. تعمل إيه؟!

فيه بنت ممكن تعجبك وتبقى عايز تتقدم لها بس مش عارف توصل لها إزاي .. يبقي أنت محتاج طريقة أو زي ما الشباب بيقولوا (داخلة).. بس دي بتختلف من ولد لأخر .. وكمان من بنت لأخرى ، عموماً أقرأ الموضوع ده وشوف الشباب دول عملوا إيه علشان السنارة تغمز .
البنت بتحب الواد التقيل و " اللي مش مدلوق " ..ده رأي أحمد عبده-21 سنة كلية هندسة- وبيقول: أنا جربت محاولة الوصول لبنت مرتين، وبصراحة كانت نيتي الارتباط ، وأول مرة كنت على نيتي جداً وساذج ، فكلمتها بكل صراحة لكنها رفضت أن ترد علي ، ولكن بعد كده عرفت إن البنت بتحب الواد اللي يتقل عليها، ، فجربت الحكاية دي مع بنت تانية، وفعلا جابت نتيجة وخطبتها ! .
وبيقول كريم محمد- 20 سنة كلية تجارة-: أي بنت محتاجة " داخلة " معينة علشان توصلها، ففيه بنت تعتقد أن الولد لازم يبين إمكانياته، يعني يبان عليه العز، من خلال لبسه ومظهره، وفيه بنت دخلتها عكس كده تماما وبتحب الولد الطيب اللي يبان عليه إنه ابن ناس محترمين بس مش غني يعني.
علشان أوصل للبنت لازم أسبقها للحاجة اللي بتحبها..وده كان رأي محمد حسين- 20سنة كلية آداب - : لو أعجبت بواحدة يبقي لازم قبل ما أوصل لها أعرف حاجات كتير عنها علشان أعرف " طريقها " ، وده حصل معايا بعدما أعجبت ببنت زميلتي وكنت عايز أرتبط بيها، فعرفت شوية حاجات عنها، يعني مثلا هي بتحب تروح ساقية الصاوي أو الأماكن الثقافية بشكل عام، فكنت لما أعرف إنها هتروح أجري على هناك وهي تروح تلاقيني، وكمان هي بتحب أغاني حماقي ، فدايماً أحط على موبايلي كل أغانيه، وده كله من غير طبعا ما أوصل لها إحساسي، حت شعرت بإننا شبه بعض، وساعتها صارحتها بكل حاجة، وارتبطنا.
بالرجولة والصراحة توصل لأي بنت محترمة..دي وجهة نظر أحمد سمير-28 سنة بكالوريوس هندسة- واللي بيقول: أي بنت محترمة تحب الولد الجدع والراجل ، واللي يجيب من الآخر من غير لف ودوران، فأنا أعجبت بواحدة ووصلت لها بشخصيتي وجدعنتي معاها ومع كل الناس، وبعد كده كلمتها بكل صراحة.
وبيقول حسن محمد- 21 سنة كلية آداب-: في الزمن ده الفلوس وخفة الدم هي اللي توقع أي بنت، لإن أهم حاجة عند أي بنت تؤمن مستقبلها، وتلاقي اللي يصرف عليها، وكمان يضحكها !! .
أعرف الأول نظامها ايه.. وده رأي عمرو سمير- 22 سنة كلية تجارة- وبيقول: لازم أدرس البنت اللي أدامي قبل ما أفكر في الوصول ليها، وأعرف نظامها ايه، وبتحب الواد يكون ازاي، يعني فيه بنت بتحب الواد اللي بيتكلم معاها كتير، وفيه بنت بتحب الواد التقيل اللي مش بيتكلم، وفيه بنت تحب اللي يقول لها نعم وحاضر، وغيرها بتحب الراجل الحمش .