نكت المساطيل فى الساقية !

شهدت قاعة النهر بساقية الصاوى لقاء النكتة هذا الشهر تحت عنوان "سمعت آخر نكتة.
مشاركة عدد كبير من هواة تأليف وإلقاء النكت.
المهندس محمد عبد المنعم الصاوى فى بداية اللقاء قال أن سماع النكت ليس مجرد تضييع وقت ولا كلام فارغ، فهى تعبرعن طريقة تفكير المجمتع، وتسخر من مشكلاته، وهى ثقافة فى حد ذاتها، وأهم شىء أن نلتزم بأدب النكتة يعنى نبعد عن السياسة والدين وقلة الأدب، وكل شىء بعد كده مباح خصوصا عندما نقول هذه النكت فى لقاء مفتوح، وعموما "اطمئنوا النكت مستمرة ومفيش آخر نكتة".
وركزت نكت هذا الشهر على المساطيل وأصحاب الدماغ العالية التايهين مع شوية نكت أخرى على الصعايدة، وكان من النكت التى قيلت :
- واحد مسطول بيقول لصاحبه مش عارف عود الكبريت ده مش عايز يولع ليه مع إنه لسه مولع من يومين بس!
- واحد عيان ماشى فى الشارع سأل واحد مسطول: إيه أسرع طريق أروح بيه المستشفى، فقال له: غمض عينيك وعدى الشارع!
- مسطول معاه قنبلة عمال ينطط فيها زى الكورة فواحد قال له: أوعى يخرب عقلك تفرقع فيك، فرد عليه: متخافش معايا واحدة تانية!
- سواق أوتوبيس جاع فى السكة، أكل محطتين .
- واحد خان الخليلى، فالخليلى قتله.
- نصيحة من واحد مسطول: رضا الوالدين أهم من أبوك وأمك.
- مسطول سألوه عن أهم تلات حاجات فى الدنيا فقال حاجتين هم الحشيش.
- واحد دخل مستشفى المجانين علشان بيخاف من الفراخ لأنه فاكر نفسه قمحة، قعدوا يعالجوا فيه كتير قوى لحد ماخف وقبل ما يخرج قعد مع مدير المستشفى فقال له: أكيد إنت دلوقتى اقتنعت إنك مش قمحة، فقال له طبعا يا دكتور بس هل يا ترى الفراخ اقتنعت بكدة!