السيسي للمصريين:" لما طلبنا التفويض ما قلناش إن المواجهة هتبقى محدودة"

في خطاب تليفزيوني علق الرئيس عبد الفتاح السيسي على جريمتي تفجير كنيستي مار مرقس بالإسكندرية ومارجرجس بطنطا قائلا: "أنا مش هقول أبدا إن اللي سقطوا في الإسكندرية وطنطا مسيحيين ولكن هم مصريون".
وأضاف السيسي عقب اجتماع مجلس الدفاع الوطني الذي ترأسه بقصر الاتحادية:"لازم نبقى عارفين وافتكروا إننا في 3 يوليو 2013 وبعدها في نفس الشهر يوم 26 يوليو لما قلنا عايزين تفويض لمواجهة الإرهاب والعنف المحتمل مطلبناش ده عشان مواجهة محدودة".
وأوضح:" المصريين عملوا عمل عظيم جدا وتصدوا لمخطط كبير جدا تدعمه دول، وهي مواجهة طويلة ومستمرة ومؤلمة وهيتقدم فيها ضحايا كتير
من كل الفئات.. من الجيش ومن الشرطة ومن القضاء ومختلف أطياف الشعب المصري".
واستكمل: “أنا بقول للمصريين اللي بيتعمل محاولة لتحطيمكم ومحاولة لتمزيقكم لأن طول ما انتو كتلة واحدة يصعب على أي حد إنه ينال منكم".
وقال السيسي:" اتعملت اجراءات ضد السياحة المصرية للنيل منكم وكنتم صلبين فاتعملت إجراءات ضد الاقتصاد وكنتم صلبين واتعملت إجراءات لإشاعة الإرهاب والقتل وانتو صلبين برضه.. فقالوا نخش في نسيج المجتمع لتفتيته".
وقال:" لازم نخلي بالنا عشان شعب مصر ومستقبل مصر..إحنا قد التضحية.. ولما نجحنا في سيناء اتحركوا في حتة تانية.. ولما هننجح في الحتة التانية .. هيتحركوا في حتة تالتة..هي المواجهة كده.. ولكن النزيف اللي بننزفوه ولا اللي بتشوفوه في دول تانية؟".
وقال:" الدول اللي دعمت وبتدعم الإرهاب لازم تتحاسب".
وناشد السيسي المصريين قائلا :" أرجو من كل المصريين إنهم يتحملوا هذا الألم.. فلقد اثبتم خلال الشهور والسنين اللي فاتوا صلابة يتعجب لها الناس.. والصلابة ليست فقط في مواجهة الإرهاب بل في كل شيء.. وكل التقدير لكم وكل الاحترام لكم.. ولن يستطيع أحد النيل من هذا البلد بإذن الله".