حتي لا ننسي !

البلد دي ربنا متعها بمميزات وثروات تفوق أي بلد في العالم .. طب بس قبل ما تزهقوا وتقولوا ييييه سمعنا الكلام ده كتير .. لو كان ده حقيقي ماكانش ده بقي حالنا .. كل شبر فيها ممكن يعيشنا ملوك .. لكن إحنا اختياراتنا هي اللي مضيعانا .. ورغم إن ربنا حطنا في تجربة واختبار عشان نقدر قيمة البلد دي بجد إلا إننا مصرين علي الهدر .. خلاص عملنا ثورتنا وربنا كشفلنا قد إيه البلد دي غن
لكن تعالوا نتأمل كم النعم اللي ربنا أنعم بيها علينا .. شوفوا نهر النيل اللي تقوم عليه حضارات ويتأسس علي ضفتيه تاريخ .. امتي حانراعيه .. إمتي حانحترم عطية ربنا .. رغم إن ربنا من شدة عنايته بينا فرجنا علي المجاعات في الدول المجاورة كان شكلها إيه .. والأطفال العطاشي المعدمين .. كنا بنتفرج عليهم ونمصمص شفايفنا ونقول حرام .. لكن هل قدرنا نعمة ربنا .. هل راعيناه في شريان الحياة اللي مده بطول أرضنا؟ !.. أبدا ..
شوفوا آثارنا اللي مالية بلادنا من شمالها لجنوبها .. وتأملوا البلاد التي تصنف علي إنها سياحية .. تلاقي البلد من دول قايمة علي شوية عواميد أثرية وتمثالين والسواح رايحين جايين عليها .. وأهلها متنعمين في خيرها وعايشين من رزقها .. انما احنا لأ .. بلد بحالها ممكن تعيش علي متحف الآثار الفرعونية بتاعنا لوحده .. فيه ناس بتسافر باريس فقط للفرجة علي متحف اللوفر .. انما احنا فالحين بس نسرق آثارنا .. واللي عاوزين يفجروه واللي عاوزين يحرقوه .. وخيابة مابعدها خيابة .. حتي الموظفين والعمال والحراس القائمين علي المتحف ده .. أقطع دراعي لو فاهمين قيمة اللي بيحرسوه .. شوفوا أهراماتنا اللي بنعاملها بكل غباوة وقذارة وإهمال .. مين فينا حاسس بقيمة الأثر العظيم ده مين فينا بيحكي لأولاده عنه .. لا نتذكره إلا يوم رحلة المدرسة وخلاص .. حد فينا يا مصريين يعرف ابسط المعلومات عن الأثر ده .. يعني لو واحد خواجة سألك عنه حاتعرف تجاوب .. لكن اسأل أي عيل خواجة عنه .. حايقولك معلومات إنت نفسك تنهبل قدامها .. وتحس إنك تضاءلت لحد ما بقيت قد عقلة الصباع .. طبعا انت حافظ إن الأهرامات دي بتاعة خوفو وخفرع ومنقرع .. طب عندك أي فكرة أبوالهول ده تمثال مين أصلا .. تعرف حاجة عن معبد الأقصر .. معبد الكرنك .. الدير البحري .. مقبرة سيتي الأول .. أبو سمبل؟ .. تعرف أي حاجة عن احتفالية تعامد الشمس علي وجه رمسيس في أبو سمبل مثلا؟ .. قبر أغاخان في أسوان .. تعرف أي حاجة عن عامود السواري والفنارة في إسكندرية؟ .. ده غير الجوامع الأثرية الجميلة والأضرحة .. عمرك فكرت تروح تتأمل جامع السلطان حسن مثلا والا ابن طولون والا قلاوون .. فكرتش تحود علي الكنيسة المعلقة وحصن بابليون مثلا؟ .. والليستة طويلة طويلة جدا .. لكن احنا عباقرة طبعا .. ماشيين وسط الكنوز دي ولا شاعرين بوجودها أصلا .. لأن تعليمنا ومدارسنا ماشاءالله .. لا بيعلمونا حاجة عن نفسنا ولا عن الدنيا اللي حوالينا .. المفروض إننا مادمنا قادرين علي ثورة عظيمة علي النظام .. يبقي نقدر نثور علي نفسنا و علي جهلنا بقيمتنا الحقيقية ..
أرض زراعية وربنا إدانا لكن عندنا أساتذة في الهدر والتبوير والبناء عليها .. شواطئ محزمة ضلعين من مربع مساحتنا وشواطئ من أجمل شواطئ العالم .. ورملة جميلة ورايقة .. لكن معلمين في تلويثها وإفسادها .. صحاري ربنا يعلم غنية قد إيه بمعادنها وأسرارها اللي هيئات كتيرة في العالم تتمني نسمحلها تيجي تكتشفها .. قناة السويس هل نعلم أنها ممكن أن تدر علينا أضعاف ما تدر الآن .. لو استغلينا ضفتيها الاستغلال الصحيح وزرعنا فيها مراكز تجارة دولية وأنشطة بحرية وسياحية وتجارية ..
جو معتدل وربنا ما بخلش .. لا عندنا صواعق ولا زلازل ولا براكين ولا أعاصير ولا تسونامي ولا غيره .. مانتعظش بقي .. أبدا .. سياحة تاريخية وثقافية ودينية واستشفائية واستطلاعية .. بشاشة وطيابة وكرم أخلاق وموجود .. بس للي يعرف يوجهها صح .. شغل فضة ودهب وبنعمل .. تماثيل ونحت وفنون تشكيلية والخير كتير .. صناعات يدوية من اللي بطلت في العالم كله ومليان .. سجاد وبننسج .. بدو سيناء لديهم صناعات يدية رائعة ممكن تبقي سوق تجاري دولي لوحدها كده .. فنون واحنا الريادة .. مسرح احنا اللي بدعنا في العالم العربي .. غناء وكنا ملوكه ولازلنا نستطيع أن نستعيد الأرض .. سينما ومش حاتكلم .. إعلام ورغم الخيبة التقيلة التي كنا نعاني منها إلا أن السجادة مازالت تحت أقدامنا لو فكرنا صح وسحبناها .. إنما تقول إيه بقي للأمخاخ المدودة ..
طيب أنا حسيب كل ده واعطيكو مثال آخر بعيد عن ذهنكو تماما ..
جنينة الحيوانات .. فاكرينها .. طبعا مش كلكوا .. لأن علاقتنا بجنينة الحيوانات بدأت وانتهت مع رحلة المدرسة اليتيمة .. ومش كتير مننا كان يمارس طقس الزيارة العائلية لهذه الجنينة .. وعمر ماحد فينا فكر يروح يزورها كده من غير رحلة .. هل تعلمون ان هذه الحديقة كانت الثانية علي حدائق العالم من حيث الجمال والنظام وعدد الحيوانات النادرة والنباتات النادرة أيضا .. وهل تعلمون انها انطردت من هذا التقييم وأصبحت مجرد اسم علي ليستة حدائق الحيوان في أفريقيا فقط .. من باب إن عيب يعني تكون حديقة مصر أكبر دولة في أفريقيا جنينتها مش موجودة عالقايمة .. وهل تعلمون لماذا؟ .. طبعا عارفين .. لأنها أصبحت مزبلة .. والحيوانات اللي فيها عندها سل رئوي وشحار وجربانة .. والله أعلم بيأكلوهم إيه حاليا وبيحموهم والا الحراس واقفين كده مزروعين زي زراير البطاطا مستنيين البقشيش عشان يحنوا عليهم ويأكلوهم .. وهل هناك عناية صحية .. ومين اللي بياخد باله من حدائقها ونباتاتها اللي كانت نادرة وما يطلق عليه اللاندسكيب أي تخطيط أرضي لمرافقها وممراتها وكباريها وبحيراتها والجنادل التي كانت تبحر فيها .. وأكشاك الموسيقي .. هل عندكم أي تخيل الحديقة دي لوحدها ممكن تدر دخل شكله إيه؟ .. بشرط أن يستلمها مستثمرون بيفهموا ويحصلوا علي حقوق امتياز لتطويرها بحيث تعود مرة أخري لاحتلال قمة القائمة العالمية ..
أعتقد إننا ممكن نفكر كلنا ازاي نفجر خيرات وكنوز وينابيع البلد دي .. بدل الاعتصامات والوقفات والفوضي اللي مالية شوارعنا حاليا .. نفوق بقي ونركز .. منظرنا بقي سييء جدا .. وطبعا عارفين إن سييء دي كلمة لطيفة ليها مرادفات كتيرة قوي أبشع ولكنها تصف الواقع .. المصيبة إن المرة دي لن يكون هناك لبن مسكوب نبكي عليه .. حاتبقي أطلال بلد .