كلام (2)

كل الأسماء الواردة في هذا النص تشير لشخصيات خيالية , وأي تطابق بينها وبين أسماء أشخاص حقيقيين هو من قبيل المصادفة .
(6)
أنا متأسف مش قصدي
والله ما أنا قاصد
أنا بس باحاول أكون مضرب بنج
أو وصلة ما بين فيديو وفيديو
أو كورة شراب
أنا بس باحاول أكون حاجة
مش لازم حاجة كبيرة
ممكن جدا حاجة ف حجم البلية
أو حتي راس الدبوس
أنا متأسف
مش قاصد أكون متطفل علي أحاسيسكو
زي سارينة إسعاف
أو جرس التليفون لما يطول
أنا نادم علي إزعاجي
لكن برضه ح أفضل أرن
فيه شيء في دماغي بيزن
فيه شخص مصمم يتكلم مهما يكون الوقت اتأخر
والناس ناموا
وكأنه كان أخرس واتفك السحر
عايز يحكي تاريخ أيامه
وأنا عايز أنام .
(7)
خليك فاكر .. أنا مش ناقص ولا مجنون
أنا عاقل جدا , وباقول لك وأنا عاقل جدا
وباقول لك وأنا عاقل جدا جدا
كل بنات النادي بيجروا ورايا
والأوتوبيس اتعطل في الشارع وأنا جي
والناس تشبه بعض لدرجة إن الناس مش ناس
والموتوسيكل بتاعي استلفه هشام صاحبي
والنادي الأهلي بطل الدوري العام
وصوابع ايدك تخنت
والمجنون مجنون
حتي لو كان عاقل
وتاريخ مستشفي امبابة أسود م الأسفلت
والنور الوالع طول الليل مضيعة لفلوسك
ونيفين حلوة ,
لكن ساذجة وعصبية ودمها شربات
والبرسيم بيفكرني بالفل
والتريسكل الرايح شبرا وقع طاولة عيش
والنسر شعار الدولة
والموت مش عيب
والسبورة اتمسحت قبل ما أغش الحل .
(8)
الصوت الآمر بيهقهق
وبياخد نفسه وبيقول :
أمك قرعة ولابسة باروكة
رجلك بتزك , دماغك مستشفي مجانين
انده لي وأنا أنده لك
شوف مين ح يعبر مين
يا صديقي
اسمح لي أقول لك يا صديقي وانت طليقي
الجورنان بالنسبة لك حيطة
وانت بتحفر إسمك ع الأشجار !
أنا آسف إني بأزعق
عندك مانع إني أخدك قلمين؟
عندك مانع نتصاحب؟
بس أنا برضه السيد وانت التابع
أنا مش كارهك
انا متعاطف مع ذلك
وباحاول ألفت نظرك لحقائق معروفة
ليه مابتغسلش سنانك مثلا .
ليه مابتجيبش لشعرك شامبوه للقشر؟
ليه مابتعملش الواجب؟
ليه بتزوغ م الشغل؟
طبعا مش لاقي إجابة
والله نفسي أهفك قلمين
والصوت التافه , الصوت المتضائل
الصوت اللي بيتسند علي ضعفه بيقول :
إبقي قابلني
أنا أعظم شاعر في القطر
أنا تلاتين أكتوبر ح ابقي فريد منصور
الاسم الأول في جميع الأخبار
أنا باعذر كل الناس التافهة
أنا مش مغرور
واثق من نفسي يجوز
لكن عارف
أنا صفر
أنا صفر علي السبورة وبيدور علي واحد
وانت بشاورة
حاقد وجبان !
أنا ليا أغاني في ال a.r.t
انا أتخن واحد في صحابي
وانت سيادتك مين؟
يا اللي بتتواقح وبتنفش ريشك
وكمان ح تاخدني قلمين؟ !
مين أنت عشان تتكلم؟ !
انا عمري ماشفتك
تطلع مين؟ !
أنا طين الأرض وسقالات العمارات
انا اسطي ستورجي ومصمم أزياء
انا بكره وبعده وكل الأيام
وبارابريز المطره
انا باتكلم باسم الناس وباسمي :
مصطفي عرفان
أكبر تليفونجي محول سكة حديد
فارس راكب موتوسيكل
دبلوم كهربا وصنايعي ف كل مجال
أنا أعرف عنك كل مصايبك وجرايرك
انا ح افعص راسك بالجزمة
مش بس ح أهفك قلمين
ده بيتهيألك
أنا واثق من نفسي أكتر منك
انا بالعب كاراتيه
وباقش في كل اللعبات
أنا خايف منك آه
لكن ح انده لك مريم
وح احضر أرواح وح اجيب بابا وجدي
أنا ح اتجوز جزارة في المدبح
وح اقف لك بساطور
انت ملاكم آه
لكن أنا عندي قرايب في الصاعقة
انا ح امسح بيك الأرض
اوعي تقرب مني
انا عندي روشتات اني معقد نفسيا
وخطير .
(9)
سامع صوتك
بيخروش في الراديو
بيخرفش زي الفار في بصل علي توم
بيطقطق في الدواليب
بيزوم
زي الريح في الأدوار العليا
في المواسير بيطن
ليه بتحاول تثبت إنك موجود؟
انا عمري ما أنكرت وجودك
لو كنت بتطلب حاجة ماتلفش وتدور
إعلن عن نفسك بوضوح
لو كنت بتطلب عمري أنا جاهز
ادخل في القلب وشله
لكن ما تحوم ليش زي الوطاويط