عمرو أديب: انضممت للوفد ولن أذهب للحياة

في أول تصريح له – كما أكد لنا – قال عمرو أديب إن خبر انضمامه لحزب الوفد صحيح، وأكد في الوقت ذاته أنه لن ينضم لقناة الحياة لأنه لو ترك الأوربت يبقى ماعندوش لا أصل ولا إنتماء على حد تعبيره، عمرو في تصريحات - من الآخر – ننفرد بها في السطور القادمة، ويمكنكم الإستماع لها بصوته..
تصوير : محمد عادل
هل خبر انضمامك للوفد صحيح؟؟
نعم صحيح!!
لماذا انضممت له إذن، ألا ترى أن هذا قرارا غريبا؟
لا أبدا، نوع من المشاركة السياسية، نحن نطلب من الناس أن يشاركوا، ماينفعش نقعد نقول للناس كلام ومانعملوش يعني!!
وهل هذا في إطار صفقة تنضم بموجبها إلى قناة الحياة؟
أنا مش رايح الحياة، عاوز أقولك إن هذا مبدأ عندى فأنا لو تركت الأوربت يبقى ماعنديش أصل ولا إنتماء وساعتها سيد البدوي لن يثق في إذا ذهبت لقناة الحياة .
وإلى أين إنتهت الأزمة؟
والله تخلص وقت ما تخلص، أنا قاعد في أوربت لغاية ما يقولوا لي تعالى وروح أشتغل!
ولكن عمرو أديب حزب في حد ذاته يتكلم كما يريد والجمهور يستمع إليه، ألا ترى أن إنضمامك لحزب يقلل من شعبيتك؟
لا أبدا، كده بقيت أكثر شفافية، في ناس كتير بتطلع تدافع عن أحزاب مش منضمين ليها، دلوقتي لما انا أتكلم هتعرف حضرتك أنا إيه إنتمائي، سواء مع أو ضد، لو طلعت هللت للوفد هتقول "طبعا ده بتاع الوفد"، لو طلعت شتمت الوفد هتقول ده راجل محترم، أنا واضح جدا للناس إنما أغلب الناس الموجودة في حزب إنت عارفه كويس مابيقولوش.
ولكن في ظل المشاكل الموجودة في الوفد حاليا البعض يرى أن في إنضمامك للحزب الآن محاولة لتجميله، ما رأيك؟
أنا ماضي بقالي ساعتين فمقدرش أتكلم عن المشاكل الموجودة في الوفد، معرفش عنها حاجة لسه!!
ولكنك بالتأكيد على علم بمشكلة دكتور السيد البدوي مع الدستور؟
أنا كنت مسافر ومش متابع، دي مسألة بتتحل بينهما أنا ماأقدرش أعلق عليها لأني معرفش تفاصيلها.
لن تذهب للحياة، هل هذا يعني أنك من الممكن أن تذهب لقناة أخرى؟
لأول مرة بقولها على لساني وإقرأ اللي إنت عاوزه في أي حته، الكلام اللي بقوله دلوقتي هو أول كلام على لساني، أنا مش رايح أي حته، أنا قاعد في اوربيت.
ولا هتظهر من خارج مصر؟؟
ولا أي حاجة.
ما الخطوات التي تقوم بها لعودة البرنامج مرة أخرى؟
والله الإدارة عندنا بتتفاوض مع الإدارة المصرية وإن شاء الله تتحل، لكن في كل الأحوال أنا قاعد في محطتي لغاية ما الناس يسيبوني دي مسألة مبدأ.
ممكن عمرو يقعد في البيت؟
والله ممكن بس هرجع وأقولك إن أكثر ما يهمني إن الناس لما تفتكرني تقول: ده راجل محترم!
و اقرأ أيضا:
جه اليوم اللي عمرو أديب يقعد فيه في البيت
متى يعود عمرو أديب ؟
عمرو أديب: اللي زيي مفروض يكون خلص من زمان!!