دخول الهرم ب2 جنيه .. ولفة الخيل ب400 جنيه !

أحمد و ريهام و محمد قرروا انهم يفسحوا صديقهم أبي توماس – الهندي الجنسية - لأول مرة في سفح الهرم عشان يكون أول انطباع له عن مصر جيداً و مشرفاً ، ياترى شافوا إيه ودفعوا كام ؟! .
أحمد خورشيد يحكى لكم تفاصيل الرحلة .. يقول :
في البداية قررت أنا و أثنان من أصحابي أن نصطحب صديقنا " أبي الهندي " إلي الهرم ، وبالفعل وصلنا هناك حوالي الساعة الواحدة بعد الظهر والحمد لله الجو في اليوم ده كان خريفيأً و معتدلاً جدا .. دخلنا على البوابات اللي فيها رسوم الدخول و كان سعر التذكرة 2 جنيه للفرد المصري و 60 جنيهاً للسائح اللي معانا ، و بصراحة السعر كان بسيطاً جدا بالنسبة لنا ، و طبعا كان ممنوع ندخل بالعربية فقطعنا المسافة على أرجلنا حتى الهرم الأكبر .
الغريب في المكان اننا وجدنا عدداً كبيرا من المتسولين ، و دي حاجة يتضايق الأجانب منها جدا .. لكن الطريف إنهم مقربوش من صديقنا الهندى لأن شكله شرقى وأيضاً إحنا شكلنا مصري.. وبعد ما وصلنا للهرم الأكبر و طلعنا بوابة الدخول قالوا لنا ان الدخول بتذاكر .. والصدمة كانت أن تذاكر الأهرامات من الداخل و مراكب الشمس كانت تباع من بوابة الدخول !! وعشان كده نصيحة وانت داخل من البوابة الرئيسية لو ناوي تدخل الهرم من جوه بلاش تنسى تقطع تذكرة من هناك عشان ما ترجعش نفس المشوار مرتين ، و على فكرة دخول الهرم هيكلفك 20 جنيهاً بس ، و لو كنت طالباً التذكرة سعرها 10 جنيهات .
المهم أننا اكتفينا بالتصوير قدام بوابة دخول هرم خوفو ، و بعدها فكرنا نركب الحنطور أو الخيل .. لكن بعدما سألنا وجدنا الأسعار مبالغاً فيها ، ومن الأخر لو ناوي تأجر خيل وتلف شويه في الهرم سيقولون لك أن الأسعار تبدأ من 400 جنيه .. لكن نصيحة لازم تفاصل وستفاجأ بأن المبلغ سيصل إلي 20 جنيهاً فقط ، أما بالنسبة للحنطور ماتدفعش أكثر من 30 جنيهاً .
و بعد كده انطلقنا إلي مركب الشمس .. و هو مركب كبير من خشب الأرز يبلغ طوله 34 متراً ، ورغم إن تذكرة الدخول ب5 جنيهات فقط لكن للأسف .. أيضاً تباع التذاكر عند بوابة الهرم الرئيسية ! .
و قبل ما ننهي فسحتنا .. نصيحة لك خد بالك من الأتى : أوعى تنسى بطاقتك الشخصية و انت رايح لأنها مهمة جدا هناك ، الكاب و النظارة الشمسية مهمين عشان حرارة الشمس ، المياه المعدنية و الغازية اشتريها معاك لأن البياعين المتجولين بجرادل بيبيعوا زجاجات المياه الغازية ب 5 و 7 جنيهات و المعدنية ب 10 جنيهات .