لميس الحديدي وكتالوج "كيف تحب المشير وفقا لقواعد الكبير"!!

"إيه يا شعب ..أنت مزعل الإعلاميين منك ليه ؟؟ أنت عايز تخرج من تحت ما تصوروا زورا وبهتانا انه طوعهم وألا إيه؟؟" ..ليه يا شعب مش عايز تسمع كلام الست لميس الحديدي حرام عليك تعبت قلبها في المناهدة معاك !!
إيه انتوا مسمعتوهاش وهي بتقولوكم بلاش نفاق للمشير السيسي وبلاش يفط وصور وإعلانات وأغاني له ..انتوا عايزين تعملوا فرعون وألا إيه؟؟
عيب كده ميصحش ..أتعلموا بقي شكل التعامل مع الرئيس القادم بأذن الله وفقا لمعايير لميس.
الست بتحذركم من صناعة فرعون !!يبقي ليه حالة الحبالجارف والثقة غير المحدودة والاحترام العميق لسيادة المشير لازم ننتقده بمناسبة ومن غير مناسبة لازم نخليه واقف وحده أمام طوفان الكراهية والغدر والتشوية من قبل الإرهابيين الأخوان والخونة ورجال الإعلام المتواطئين علي امن واستقرار الدولة علشان نسلمه تسليم أهالي لهم ونحوله لضيف في برامجهم يدافع عن نفسه ضد ما يقال !!
إيه يا شعب انضبطوا بقي انتوا فاكرين أن المشير السيسي علشان بينزل علي إرادتكم دايما لكم الحق في حبه بطريقتكم التلقائية العفوية ياخي ده إيه ده !! الست لميس بتقولكم إنها تعرفوا- ومحدش يقولي تعرفه منين وأزاي وأمتي - وتعرف انه مش هيقبل هذا النفاق الرخيص من بعضكم يعني إيه راجل بسيط يشتري صوره وست طيبة ترقص وهي تحملها وطفل يغني من قلبه بنحبك يا سيسي وشباب يجد فيه املأ في غد أفضل ..وشباب أخر دفع حياته ثمنا لرفع صوره علي بيته أو محله .
لازم تفهموا أن ده غلط ..لميس أتكلمت بالذوق كتير معاكم لكن امبارح خلتوها تفقد أعصابها..ده انتوا جبابرة !!
المفروض يا شعب يا جبار في الفترة القادمة أن الإعلام هيحاول يفصل تماما بين المشير والجيش وبين دوره التاريخي كقائد لثورة يونيه وبين كونه –إذا ما أعلن ترشحه- مرشح للرئاسة وذلك لاستقطاب المشير فرجال كل الأنظمة في انتظاره لحمل المباخر له وانتوا تمنعوهم بصنع جدار عازل بينهم وبينه من محبتكم له علشان كده لازم تخفوا شوية وتخافوا والأحسن تبعدوا عنه !!
اتركوه وكفاية حب لحد كده مش كفاية أنكم تسببتوا في وقوع الست لميس امبارح مع الأكابر من رجال الأعمال الذين تدعي بلا أدلة أنهم يدعمون المشير ومنهم احمد أبو هشيمة ونجيب ساويريس .
مش عيب أبو هشيمة يحاول الانضمام لقافلة محبي المشير وهو – كما يشاع- كان احد المحسوبين اقتصاديا علي النظام الإرهابي ومحدش فيكوا يقولي طب ما الست لميس الملقبة من البعض بأم الفلول كانت منسقة الحملة الانتخابية لمبارك في 2005 وفجأة تحولت لثورجية بعد 25 يناير وعملت أم الثوار بل وصل بها الحال في عهد الأخوان لان تقلب الرأي العام ضد مبارك وهو في السجن حين لوح في احدي جلسات محاكمته لأنصاره ردا لتحيتهم له وكان تعليقها علي ذلك "ده كان ناقص يطلع لنا لسانه"!!
ومحدش يقولي إن ده نفاق وتلون وغدر برجل كان وراء صناعة نجوميتها كإعلامية ..أو انه استهانة بذاكرة شعب يعتقد البعض انه يتعاطى " ترامادول" ..لذا يتعاملون معه كأنه مغيب لا يتذكر الماضي ولم يعش الحاضر ولا يفكر في المستقبل ..فكل ما في الأمر أن الحديدي تريد أن تحافظ علي مصالحها العليا في كل العصور لتضمن استمرار تواجدها .
وهذا التواجد القوي قد يضمنه لها – من وجهة نظرها- تحويل تعليق صور للمشير علي الطريق الدائري لقضية النفاق الكبرى والفساد الأعظم والتي لمحت أن ورائها رجال أعمال دفعوا الكثير من اجل تعليقها رغم أن الحقيقة أن هذه الصور تحديدا كان ورائها حملتي جبهة مؤيدي السيسي وحملة إرادة شعب لمحمد أبو حامد واحمد المياح وقد تكلفت الصورة الواحدة 15 جنيه تحمل ثمنها أعضاء الحملتين الذين تبرع كل عضو منهم ب2 جنيه .. وبالتأكيد من سمح لهم بتعليقها هو من سمح بسب وإهانة المشير علي كل جداران شوارع مصر!!
وإيه يعني لما الست تغلط في اللي علق الصور ومتغلطش في اللي بيكتب السباب والشتائم ما أحنا قولنا لازم يتم عزل المشير عن الشعب علشان الإعلاميين يعيشوا ..وبعدين مين اللي خلي ساويرس يقول انه هيضخ أموال في الاستثمار داخل مصر إذا ما أعلن المشير الترشح ..ليه كده يا ساويرس أنت مزعل لميس منك .. المفروض انك لا تظهر رغبتك كمواطن في دعم أي مرشح ..أنت محدش قالك انك من صنعت بعض آلهة الإعلام في قناتك وعليك دفع الثمن من آلهة القنوات الاخري ممن يريدون أن يكرروا الاسطوانة المشروخة عن فساد رجال الأعمال .. وهذا واقعي بالنسبة للبعض وليس للكل.
عارفة أن واحد من الشعب المشاغب هيرد ويقولي ما هي لميس كانت من أكثر الداعمين لحكومة رجال الأعمال في عهد مبارك ..معلش يا حديدي ولا يهمك هو الشعب كده كل ما تحاولوا تعملوا له عملية غسل مخ ليستسلم لأفكاركم المبتكرة عن الوطنية يرجع تاني لأفكاره القديمة التي ورثها من 7 ألاف سنة عن الوطنية الحقيقية غير المدفوعة الثمن و التي لا يوجد خلفها مصالح خاصة!!
وبلاش تتعصبي وأنت بتفهمي الشعب انه يبطل يغني للمشير وبالذات بهاء سلطان ده لأنه دوشنا طوال الثلاث سنوات السود الماضية هو عمرو مصطفي وأمال ماهر بأغانيهم التي تبث روح الولاء والانتماء للوطن ..وكمان مطرب مصر الأول أنضم لهم وغني كمل جميلك !!
ويا ريت تنسقي كلامك شوية في الموضوع ده علشان يبقي مقنع ومحبوك لان أي فنان مش هيأخد حاجة من أي رئيس سابق ولا قادم ..يعني هاني شاكر العظيم مستني إيه من المشير وهو يغني له كمل جميلك ..متهيأ لي دي وسعت منك شوية ..فبهاء سلطان وقبله هاني شاكر وعمرو مصطفي فنانين وهبوا أصواتهم للوطن منذ 25يناير ..بس لو أنتي شايفة أنهم ميعرفوش مصلحتهم نمنعهم من الغنا علشان أنت اللي تغني الليلة دي يا منعم قصدي يا لميس !!
انطلقي ومعك باسم يوسف وعمرو الليثي ويسري فودة ومحمود سعد ودينا عبد الرحمن ومعتز عبد الفتاح وعمرو اديب في طريقكم لتوعية الشعب بمصالحكم وأعطوا له كتالوج "كيف تحب المشير وفقا لقواعد الكبير"..خلينا بقي نتجاوز مرحلة التلقائية والحب الصادق اللي من القلب المنزوع المصالح والمنافع ..لازم الحب يبقي مرتبط بحدود مصالح النخب والإعلاميين.. وإذا الشعب لم يستجيب نغيره مش مهم الشعب ولا الدولة ولا المشير إحنا هنضحي بالكل علشان الإعلاميين والنخبة من المتصابيين سياسيا والشباب الشكوك في ذمتهم الوطنية يعيشوا ..وحسبنا الله ونعم الوكيل في كل من خان وباع وضلل هذا الشعب الذي عثر علي طريقه مؤخرا وعندما يريد أن يتمسك به يتهم بالنفاق !!!
الهام رحيم