كويز للبنات فقط ... اسم حبيبك عندنا !

إنت غاوي تقعد على النت .. يبقى أكيد ليك فى الفيس بوك ، وطبعاً بتتعرض للعديد من " الكويزات " اللى من نوع : عايز تعرف شريك حياتك اسمه إيه؟ عايز تعرف فرحك إمتى ؟ ولون عيون حبيبك وعدد شعر رأسه ؟! .
ياريت علي كده وبس .. افتكاسات الموضوع ده وصلت لدرجة إن بعض المواقع عملت " كويزات " فى غاية الغرابة .. زي مثلاً " أعرف حبيبك عايز يقولك إيه؟ كم سيكون عدد أطفالك ؟ أكثر حاجة بتكرهها فيك إيه ؟ واكتر حاجة نفسك فيها ؟ وأعرف وزنك كام من غير ميزان؟ .. وشوية تلاقيهم يفتحوا على باب الأكونت المندل وشغل الدجل .. والغريب إن الواد خريج الجامعة والبت خريجة المعهد ورغم إنهم متعلمين وليل ونهار ع النت .. وكمان وإحنا في رمضان والكلام ده دينياً " لا يجوز " .. لكنهم بيصدقوا " المنجمين " في الكويزات دي ويتباهوا بيها وتلاقي البت تقولك " النهاردة مبسوطة قوي .. الكويز قال لي إن تامر اللي عندي ع الأكونت هو أهم شخص في حياتي " رغم إن تامر ده متجوز وعنده عيال وأضافها عنده بطريق الغلط ! .
عموماً .. إحنا بقى عملنا " كويز " مبتكر .. لا تقول لي فيس بوك ولا تويتر .. عندنا وبس ، عايزة- والكلام هنا للبنات - تعرفى اسم شريك حياتك قبل ما ييجى ويخبط ع الباب ؟
إتبعى الخطوات التالية :
تدخلى غرفتك وتقفلى الباب كويس بالمفتاح ..
و لازم تجلسى على الارض وتربعى وكأنك ح تلعبي يوجا ..
أحضرى 4 أقلام , أحمر وأزرق وأخضر وأصفر ..
أفتحى إيدك اليمين وأكتبى أول حرفين من اسمك بالقلم الأحمر ..
هاتي القلم الاصفر وأعملى دايرة كبيرة وبداخلها دوائر صغيرة بحيث تدارى على الحرفين ..
أفتحي إيدك الشمال ووهاتي القلم الازرق وأكتبى باقى حروف اسمك فى وسط الكف بالظبط ..
وهاتي القلم الاخضر وأعملى مربعات كثيرة على الحروف لغاية ما تختفى الحروف فى يدك الشمال ..
بعدها أغمضى عينيك لمدة 10 دقائق .. وقولي " اسمك إية .. اسمك إية ؟! " 10 مرات ..
وبعد كده .. فتحى عينيك وبصى فى إيديك ..
هتلاقى ..
هتلاقى إن إيدك عايزة تتغسل ..
قومى اغسليها وبطلى لعب عيال و أكبرى بقى وسيبك من شغل المراهقين ده ..
وسيبيها على الله لغاية ما يبعتلك نصيبك ..
وابقى افتكرى ترجعى الالوان مكانها ...