لو عازمة أو معزومة ... كله بالإتيكيت !!

في شهر رمضان تكثر العزومات ... وسواء كنت عازمة أو معزومة فهناك أمور كثيرة ستعرفيها من خبيرة الأتيكيت و فن التعامل " ماجي الحكيم " في السطور القادمة ..
أول حاجة هنتكلم عنك .. لو كنت عازمة أي حد عندك في البيت فلابد من إبلاغهم بالمعاد قبلها بأسبوع على الأقل ، لأنه فيه ناس كثيرة تكون " محجوزة " لعزومات تانية ، و مهم جدا و انت بتعملي الأكل تحرصي على ان الأصناف تكون متنوعة و كثيرة لأنك متعرفيش ذوق كل واحد من المعزومين .. بيحب إيه و بيكره إيه ، وطبعا لازم تكون الكمية أكبر من عدد الناس اللي إنت عزماهم .. وده لا يعتبر تبذيراً لأنك ممكن تستخدمي بقايا الأكل في ثاني يوم بعد العزومة .

من المهم جدا انك تحضرين الأكل من بدري عشان تعرفي تستقبلي الضيوف وإنت " لابسة و محضرة نفسك " .. وطبعا لو كنت تعبانة وطالع عينك في تحضير الأكل طول اليوم مش من المناسب خالص انك تظهرى لهم إنك مجهدة وتعبانة لأن دي حاجة بتحرج الضيوف جدا .
بالنسبة للسفرة من المهم جدا انك تحرصي على ان الضيوف عددهم يكون مناسباً لعدد كراسي السفرة ..وإن الأطفال ممكن يكون ليهم " ترابيزة لوحدهم " .

أما لو كنت معزومة عند حد .. حاولي قدر الإمكان الوصول قبل الإفطار ب5 دقايق لأنك لو وصلتي بدري ستسببين ارباكاً لأهل البيت ... وعندما تفكرين في هدية فالحلويات غير مناسبة ..والأنسب هي هدية تنفع أهل البيت .
في أثناء الأكل اذا كان هناك صنف او أكثر مش عاجبينك ... بلاش تظهري هذا و حاولي تخرجي من الموقف ده بأنك تفضلين صنفاً عن صنف تاني ، و بعد الأكل لا يوجد أي داع للإلحاح بخصوص مساعدة ست البيت .. لأن فيه سيدات كثيرات لا يحبون هذا النوع من المساعدات .