بالتفاصيل.. المصريون يضحكون على الرؤساء بالنكت!

مع كل خطاب أو مؤتمر أو قرار للرئيس محمد مرسي تظهر النكات والسخرية من بعض ما يقوله.. وهذا ليس جديدا على الشعب المصري الذي دائما ما كان يقابل استبداد السلطة والرؤساء بالسخرية والنكات السياسية.. والتي كانت تغضب النظام أحيانا.. وتسببت في سجن البعض على رأسهم الولد الشقي الكاتب الكبير محمود السعدني.. وطلب عبد الناصر في خطاب له عقب النكسة أن يتوقف المصريون عن إطلاق النكات على القوات المسلحة في السطور التالية نعرض بعض النكات التي أطلقها المصريون على الرؤساء السابقين وحاشيتهم.....
- في عهد جمال عبد الناصر:
- رجل من القاهرة سمع أن الأرز متوفر في مدينة الإسكندرية، فسافر في القطار كي يحصل على قوت عائلته، فسأله "الكمسري" مسافر فين وليه؟ فأجابه مسافر الإسكندرية عشان أشتري الأرز"، ولما وصل القطار إلى طنطا قال له الكمسري "إنزل هنا"! فسأله طيب ليه وإحنا لسه موصلناش الإسكندرية؟ فأجابه "مش إنت رايح عشان تشتري الأرز؟ انزل لأن الطابور يبدأ من هنا".
ويقال أن هذه النكتة آلمت عبد الناصر كثيرًا فاستدعى وزير التموين وأمره بتوفير الأرز للشعب بأي طريقة.
- تخفى عبد الناصر كى يتفقد أحوال الناس فسمع موظفاً يقول لزميله أن راتبه ينتهى فى اليوم العاشر من الشهر وسأله زميله وكيف تعيش باقى أيام الشهر ؟ فقال له أعيش على الستر ، فأصدر جمال عبد الناصر قراراً فى اليوم التالى بتأميم الستر .
- التقى صديقان قال أحدهما للاخر : هل علمت أن فلاناً لم يخلع ضرسه من فمه فسأله صديقه : ولماذا لم يخلعه من فمه فرد عليه قائلاً : هو حد يقدر يفتح بقه .
- عبد الناصر ذهب لأداء فريضة الحج , وألتقط سبعة أحجار ليرجم بها إبليس, لكنه ألقى بست فقط واحتفظ بالحجر السابع.. وعندما سئل عن السبب: قال : مفيش داعي نقطع كل الخيوط مع الشيطان , يمكن نحتاجه
- مرة رجل وقف في الشارع وقال بصوت عالي منك لله يا عبد الستار.. راح مخبر ضربه على قفاه وقال له : وكمان مش عارف اسم الريس
- عثر على تمثال فرعوني ..احتار علماء الآثار في تحديد اسمه , فاقترح ناصر إرساله للمخابرات لكشف غموضه.. وبعد ساعات قالوا له: - لقد تأكدنا انه رمسيس الثاني. .- كيف ؟.. - أعترف بنفسه يافندم
- قال عبد الحكيم عامر لشمس بدران : مدير مكتبي ده شخص غبي ، فقال له : إزاي فاستدعى حكيم مدير مكتبه وقال له : روح بيتي شفني هناك ؟ فخرج الضابط وغادر المبنى وبعد فترة عاد ليقول للمشير : للأسف يا فندم سيادتك مش موجود فى البيت ، ثم أدى التحية وانصرف فالتفت المشير إلى شمس قائلاً : مش قلت لك إنه غبي ..كان ممكن يوفر المشوار ويسأل عني فى البيت بالتليفون .
- ركب عبد الحكيم عامر سيارته ومعه شمس بدران وفجأة صاح فيه : خد بالك يا شمس حتدخل فى عمود النور ، فقال شمس : لكن أنت اللى سايق يا فندم .
- اصطاد صياد سمكة كبيرة وعاد بها ولكن بزوجته يبدو عليها الحزن سالها الصياد مالك؟ قالت ياما جاب الغراب لامه.. قالها ليه دي سمكة كبيرة.. ردت حنعمل بيها اي؟ قال نقليها ف الزيت.. مفيش زيت.. نطبخها ف الصلصة.. مفيش.. نسلقها ف المية.. مفيش جاز ولا بوتوجاز.. فقام مسك السمكة والقي بها ف البحر فقفزت السمكة للبحر وقالت عاش الرئيس جمال عبد الناصر
- مصرياً كان يقوم بالدعاية لبلاده أمام السياح في منطقة الأهرامات فقال:إن مصر أقدم حضارة في التاريخ.. فأعاد صدى صوته ما قاله، فوجدها فرصة كي يكمل:
وهي أم الدنيا.. فأعاد صدى صوته ما قاله أيضاً، مما حمسه إلى أن يضيف: - وسوف تحارب إسرائيل! فإذا بصدى صوته يقول: - بس يا مغفل!
- كان عبد الناصر يخطب في الجماهير عندما قاطعه مواطن:- يا ريس.. عايزين نعرف فين مجوهرات أسرة محمد علي، وفلوس الحراسات، وصفايح الدهب اللي جت من اليمن؟ - فقال له عبد الناصر:- هارد عليك بعد الخطاب.. تعال اطلع عندي.
- ثم في نهاية خطابه، قاطعه مواطن آخر: - يا ريس.. عايزين نعرف فين مجوهرات أسرة محمد علي، وفلوس الحراسات، وصفايح الدهب اللي جت من اليمن.. والمواطن اللي طلع عندك من شوية
- الرئيس محمد أنور السادات
- خرج السادات ليشم هواء فى الطريق الزراعي فوجد غرزة فدخلها فمد أحدهم إليه الجوزة قائلاً : مساااااااااااء الخيييييير ، فتناول الجوزة وسحب نفساً عميقاً ثم أعادها لصاحبها الذى سأله : والأخ شغال إيه ؟ فرد السادات : رئيس الجمهورية ، فضحك الرجل قائلاً : من أول نفس كده .
- بعد اول استفتاء على رئاسة الجمهورية شكر السادات كل من قال نعم وكل من قال لا وخرجت النكتة أن السادات خطب قائلاً : اشكر الذين قالوا نعم واشكر الذين قالوا لا .. أما اأّه نعيمة فأشكرها مرتين لأنها قالت نعمين .
- أما عن النكتة التي أطلقها الكاتب الساخر محمود السعدني: جمال عبدا لناصر رغم عظمته أذاقنا الخوف طوال ثمانية عشر عاما , ويبدو أن السادات سيموتنا من الضحك بعد ثمانية عشر يوما من حكمه لنا .
- فى مرة الهنود عرفوا ان المصريين لما بيصفوا حد بالغباء بيقولوا علية هندي.. فلما عرفوا كده اجتمع السادات مع اميرة غاندى زعيمة الهند قالت غاندى للسادات لازم تضع عقوبة اللى بيصف الغبى بالهندى.. رد السادات فعلا احنا حطينا عقوبة اللى يقول كدة يدفع الف جنية قالت غاندى خلاص الغرامة اللى تجيبها تيجى على خزنة الهند قالها ليه هو انا هندى
- كان البابا شنودة وشيخ الأزهر والسادات في طائرة وحدثت مشكلة بالطائرة استدعت أن يلقى أحد الركاب من الطائرة فقام الرئيس السادات باختيار سؤال لكل شخص ومن يفشل في الإجابة يلقى من الطائرة ... فذهب إلى شيخ الأزهر وسأله :
" ما هي بلد المليون شهيد ؟ " فأجاب شيخ الأزهر : " الجزائر يا ريس " فنظر السادات إلى البابا شنودة وقال : " قول لي أسماء المليون شهيد واحد واحد " .
- أما عن عهد الرئيس المخلوع مبارك.. فالنكت لا حصر لها
- جلس إبليس مع مبارك يوما فاستشاره الرئيس وقال :" أنا احترت في الشعب المصري ...... جربت فيه كل حاجة وفشلت وبرضه عايش ومستحمل.. فانحنى إبليس على أذنه وقال : طب اسمع الفكرة دي وش وش وش ... فقال مبارك /: لا قديمة ، فقال إبليس : طب اسمع دي وش وش وش ...... وكان نفس الرد من مبارك في كل مرة حتى قال إبليس : خلاص غلب حماري ... فأمسك مبارك بأذن إبليس وقال له : اسمع أنت دي وش وش وش وش .. وهنا تغير وجه إبليس ونظر بأسى إلى الرئيس وقال له : " يا أخي حرام عليك أنت مفيش في قلبك رحمة ؟ "
- واحد اتحشر في زحمة المرور فلقي واحد بيخبطله على شباك السيارة فتح الشباك و سأله عايز ايه قاله : الرئيس حسنى مبارك خطفوه و الفدية 5 مليون دولار و لو الفدية ماتدفعتش .. الخاطفين هددوا يدلقوا عليه بنزين و يولعوا فيه و احنا بنجمع تبرعات .. تحب تشارك ؟ الرجل سأل : " و في المتوسط الناس بتتبرع بكام فقال له : من 5 إلى 10 لتر بنزين.
- كان حسني مبارك فى سرير المرض حينما أخذ يلقى بوصاياه الأخيرة لوزيره نظيف :
- وصيتك الحكم من بعدى يا احمد ...
- فى رقبتى يا ريس .. كله تمام والسلطة هياخدها جمال ...
- ثم راح فى غيبوبة .. أفاق منها بعد قليل ...
- وصيتك الشعب من بعدى يا احمد .
- ما تخافش يا ريس .. الشعب ياكل الزلط ...
- ثم راح فى غيبوبة .. أفاق منها بعد قليل ...
- احمد ...
- نعم يا ريس؟
- بس ماتنساش .. توكيل الزلط لعلاء
- بيقولك واحد لقى الفانوس السحرى ودعكه طلعله العفريت و قاله: شبيك لبيك تطلب أيه ؟ قاله الراجل : أنا عايز كوبرى بين القاهره و أسوان.. العفريت قاله : دى صعبه قوى .. نقى حاجه تانيه.. الراجل قاله : خلاص خلى حسنى مبارك يسيب الحكم.. العفريت قاله : أنت عايز الكوبرى رايح جاى ولا رايح بس
- قال مبارك لاحمد نظيف انا احسن والا عبد الناصر رد نظيف انت طبعا عبد الناصر مين سال مبارك لي يا نظيف قال نظيف لان عبد الناصر كان بيخاف من الروس.. ساله مبارك طيب انا والا السادات رد نظيف سادات مين انت طبعا السادات كان بيخاف من امريكا.. ساله مبارك طيب انا احسن والا عمر ابن الخطاب رد نظيف انت طبعا عمر كان بيخاف من ربنا لكن انت لأ يا ريس
- ساله الجنزوري انت شلتني ليه يا ريس قال الرئيس التغيير سنة الحياة رد الجنزوري طب شلت وزير المواصلات ليه؟ رد الريس التغيير سنة الحياة قال الجنزوري طيب انت قاعد لي يا ريس لما التغيير سنة الحياة رد الرئيس يا حبيبي وجودكم سنة اما وجودي فرض
- واحد ركب تاكسي فوجد السواق معلق صورة عبد الناصر والسادات ومبارك فسال الرجل السواق مين ده؟ رد السواق دا الزعيم عبد الناصر زعيم مصر والامه العربية وبعدين سال الرجل السواق طب ومين ده رد السواق ده السادات بطل الحرب والسلام بعد كدا سالو طب ومين ده بقي قاله حسني مبارك ابو علاء شريكي في التاكسي
- قال حسني لحبيب العادلي في عيد الاضحي هات عشر خرفان عشان ندبح منهم واحد علي العيد رجع حبيب العادلي بعد تلات أيام ومعاه خروف متعور ومتبهدل خروف واحد بس رد مبارك اي ده ؟ قال حبيب الادلي ده اللي فضل بعد التحقيقات.
- كان مرة مبارك بيخطب وكل شويه واحد يقوم ويقول عاش مبارك موحد الاديان لغاية لما خلص خطاب قام ضباط امن الدولة اخدوا الرجل وقالوا انت ياله يابن الكلب ازاي تقول مبارك موحد الاديان واحنا عندنا تلات اديان الاسلام والمسيحية واليهودية رد الرجل ما هو اللي كفرهم كلهم
- اشتكي حسني مبارك لحبيب العادلي وقاله ان حمو النيل مش مخليني انام راح حبيب العادلي غاب شويا ورجع وقال للريس تمام يافندم قبضنا علي كل اللي اسمهم حمو وجاري ردم النيل
- ذهب مبارك لزيارة مدرسة ودخل احد الفصول وجاء دور اسئلة التلاميذ فسال رامي الرئيس ليه انت بتحكمنا بالطوارئ؟ ليه حالتنا متأخرة في عهدك؟ ليه هتورثنا لابنك جمال؟ بعد السؤال الثالث دق جرس الفسحة بدري ربع ساعة نزل التلاميذ الفسحة وعادوا من غير رامي اختفي رامي فقام احد التلاميذ وسال الرئيس ليه بتحكمنا بالطوارئ؟ ليه حالتنا متأخرة في عهدك؟ ليه هتورثنا لابنك جمال؟ رامي راح فين؟.
- مرة مبارك يمد إيده في جيبه لقي 5 مليون جنيه !! فزعل قوي وخاف وقال: إيه الفلوس دي الفلوس دي حرام؟.. فسأل أحد مساعديه فدله على طريق الشيخ طنطاوي رئيس الأزهر وقال له: اسأل الشيخ وهو يقول لك الحل .. ما كدبش خبر وجري على طنطاوي وحكا له القصة فرد :5 مليون بس .. إيه النزاهة دي؟.. دي بسيطة خالص يا ريس ما تزعلش نفسك؟ كل اللي هتعمله هتروح تستغفر ربنا بالطواف حوالين الكعبة، لفة لكل مليون جنيه وخلاص .. مبارك راح لقي صفوت الشريف فقال له: أنت بتعمل إيه هنا؟.. أنت هتلف كام لفة؟ فقال صفوت :78 لفة .. مبارك: يخرب بيتك؟ ده أنت خربت البلد !!.. صفوت: أنت جاي علي انا؟ روح شوف علاء ابنك جايب موتوسيكل وبقاله 3 أيام بيلف
- مواطن قبطى سأل مبارك هل يجوز أن يتولى مسيحى الحكم، فرد مبارك: ولا مسلم وحياتك
- وأخيرا طالب بيسأل أبوه لو جبت 90 % أدخل ايه.. رد الأب: تدخل هندسة.. طيب لو 80 %.. رد: تدخل تجارة.. طيب 50% .. رد الأب: تدخل القصر الجمهوري وتعمل إعلان دستوري