بالفيديو.. إبراهيم عيسي يتحدث عن سلق الدستور ويسلق بيض على الهواء

في موقف طريف من مواقف إبراهيم عيسي.. قام بإحضار شعلة وحلة وبيض ليسلقه على الهواء سخرية من الاستعجال على الانتهاء من صياغة الدستور.. وشبهه بسلق البيض.. مؤكدا أن هناك تعجل رهيب ومذهل للانتهاء منه قبل مناقشته بشكل جدي حتى ينتهوا منه قبل يوم 12 ديسمبر..
وقال إبراهيم عيسي" ايه التعجل المذهل الرهيب عايز يخلص قبل 12 ديسمبر قبل انتهاء الستة شهور حتى لا يتم حل اللجنة.. ويقولوا احنا هانقعد نناقش الدستور سبع سنين وعايزين يخلصوا منه، فدستور 23 قعد سنة ونص بيتكتب، وتونس لسه من سنة لم ينتهي.
وأضاف قائلا: فيه فرق كبير بين الدستور وسلق البيض.. ولكن لو عايزين نسلق الدستور بسيطة نسلق" ثم قام بإخراج الشعلة والحلة والبيض ليبدأ عملية السلق ثم يقول " إذا كان ده يساعد الإخوة الإخوان المسلمين على سلق الدستور فاحنا نتعامل مع الدستور ومواده باعتباره بيض ونسلقه، وأدي الدستور ونسلقه لإنه فعلا سلق بيض.
ثم قال: اللي بيحصل إن حسام الغرياني رئيس اللجنة والإخوان المسلمين يعقدون الآن أكبر عملية سلق في الدستور لمصر تشبه سلق البيض، إننا نناقش دستور مصر بمواده في 5 أيام كل يوم يناقشوا باب في 50 مادة عن مستقبل مصر وأبناءها عن هذه الأمة ومسارها ومستقبل أحفادنا وأبناءنا على طريقة سلق البيض، ممكن يكون ينافسه بس دستور 30 بتاع إسماعيل صدقي فاحنا عارفين إنه رجل ديكتاتوري وقبضة حديدية وهوجم دستوره وعمل دستور استبدادي رهيب في تضحيته بكل الحريات وألغي دستور 23 ، ولكن دستور 30 الذي وافق عليه الطغاة عملت انتخابات على أساسه وكل القوى الوطنية مثل الوفد قاطعوه والإخوان شاركوا في الانتخابات وهما الوحيدين اللي كانوا متحالفين مع إسماعيل صدقي، وأتلغي بعد أربعة سنوات، مش شطارة إنك تسلق علشان ممكن تقلب معاك "عجة"، وبيتم تسويق بقصة إن الدستور ده بتاع ربنا وبتاع الشريعة واللي ضده كفره وعايزين يوقفوا شرع ربنا".
......