دنيا سمير غانم : عندنا مأساة فى الورق !

دنيا سمير غانم جوكر الوجوه النسائية في السينما المصرية مؤخراً .. تعمل كوميدي وتراجيدي وتنجح فى الحالتين .. تعالوا نعرف أكثر عنها فى الحوار التالى ..
أيه أكثر هدية بتحبي تحتفظي بيها ؟
أنا أصلا مبحبش الهدايا , وأكتر حاجة ممكن تبسطني أن أصحابي يكونوا مبسوطين ونفرح ونغني مع بعض وبحب لو حد جابلي كارت وكتبلي عليه كلمات رقيقة حسيت انها فعلا من قلبه , ودايما بحتفظ بكل الكروت اللي بتجيلي مع الهدايا . والسنة اللي فاتت جاتلي هدايا كتير من معجبين معرفهومش وكانت أغلبها مصاحف طبعا دي أغلي هدية جاتلي .
يصنفك الجمهور الان كنجمة من نجمات الصف الأول فما رأيك ؟
سعيدة جدا جدا بذلك وفعلا أنا لمست رد فعل الجمهور لما نزلت السينما أكثر من مرة علشان أتابع أفلامي وكنت بحب أسمع تعليقاتهم علي الفيلم علشان أعرف رأيهم بصراحة .
وأين انت من التليفزيون ؟
أنا فعلا اهتممت جدا بالسينما العام الماضي ولكني سأحاول أن أقدم تليفزيونا وسينما خاصة لأنه معروض علي عدد من السيناريوهات لمسلسلات تليفزيونية وأفلام ولكن لم استقر علي أي منها حتي الآن .
وهل سنري دنيا في بطولة نسائية مطلقة قريباً ؟
اعتقد انه صعب السنة دي جدا لاني محتاجة أنه يكون عندي خبرات فنية أكثر , ومع أنه قد عرض علي أكثر من سيناريو لأفلام ومسلسلات أتحمل بطولتها بمفردي لكني رفضت لان ذلك ليس وقته الآن , وأحب أن أشكر المنتجين علي ثقتهم الكبيرة في .
اتجه كثير من الفنانين لتقديم البرامج فهل يمكن ان تخوضي هذه التجربة ؟
بصراحة مش عارفة بس لو اتقدم لي حاجة كويسة ومختلفة ومناسبة ممكن أفكر وأجربها .
بعد تألقك السينمائي .. كيف تخططين للسنة الجديدة ؟
محبش أخطط لأي شيء وباسيب كل حاجة علي ربنا سبحانه وتعالي وهو اللي بيرتب لي .
ماأكثر أزمة ت واجهك ؟
الورق .. احنا عندنا مأساة في السيناريوهات وخاصة للبنات لذلك بحب أكون دقيقة جدا من البداية وعلشان كدة بقرأ الورق جيدا قبل الموافقة .
وأيه أكتر حاجة بتعجبك في الوسط الفني ؟
الاستمتاع بالفن نفسه فلما أعمل مشهد ويصفقوا لي باللوكيشن بكون في قمة الفرحة , وأكتر حاجة مبحبهاش الغدر بمعني أن حد يعشمك بدور ويكون عاجبني وبعدين مايحصلش بحس باحباط ولكن سريعا بنسي لأني عارفة كل الحاجات دي من خلال والدي ووالدتي .
هل عندما عملت في مجال الفن شعرت بالمعاناة التي مر بها والداك وانت صغيرة مابين الفن وتربيتكم ؟
عمري ماحسيت أنهم مشغولين عني خالص , والوقت اللي مابيكونوش موجودين في البيت تيتة الله يرحمها كانت معانا علي طول علشان كده عمري ماحسيت انهم بعيد عني .