في عصر الانترنت والايباد والبلايستيشن تقف الامهات حائرات بين رغبة أطفالهن في قضاء اليوم امام تلك الشاشات وبين عدم مواكبة الألعاب التقليدية مثل المكعبات والقصص وكراسات التلوين لعصر التكنولوجيا الذي نعيش فيه،فهذه الاشياء المفيدة والتي طالما نمت مهاراتنا في الطفولة لم تعد تجذب اطفالنا الذين نتيجة لهذه الشاشات يطاردهم شبح التوحد والعنف.وهنا ظهر الكتاب التفاعلي وأصبح مطلبا مشتركا للأمهات والأطفال، فالكثير من الامهات يبحثن دائما عن أماكن لبيع تلك الكتب بأسعار مناسبة وأنشطة جذابة لأطفالهم،فهي تساعدهم علي تطوير مهاراتهم المختلفة، كما أنها تعتبر وسيلة ممتعة لقضاء الوقت يمكنهم اصطحابها معهم في كل مكان. وتقول آفنان كامل طه منفذة الكتب التفاعلية للأطفال الكتاب التفاعلي عبارة عن كتاب من القماش قماش الجوخ،والكتاب مهم لانه تعليمي ومهاري فالكتاب لافت للأطفال لانه من قماش الجوخ يتميز بألوانه الجميلة اللي بتجذب الطفل وبتشد انتباهه،وبيساعد الطفل انه يتعلم بطريقة ممتعة ويساعد الأم علي ان تبعد طفلها عن الشاشات تليفزيون أو موبيل لما لها من أضرار كثيرة ،وكذلك يساعد الكتاب اخصائيي التخاطب في تعديل سلوك الأطفال ومساعدتهم في تنمية مهاراتهم،وممكن تصميم الكتاب ليناسب الأطفال من سن 6 شهور إلي 8 سنوات باختلاف الأنشطة ومن مميزات الكتاب التفاعلي ايضا انه مصنوع من القماش غير قابل للقطع وآمن علي الأطفال وتستطيع الام صنعه بنفسها يدويا. وتكمل ان الكتاب التفاعلي يحوي افكار كثيرة جدا بتساعد علي تطور الطفل بطريقة ممتعة وتطوير مهاراته ونموه بطريقه صحيحة والأم ستلاحظ تطور ملحوظ في طفلها عندما تقلل جلوسه امام الشاشات وتقدمله الكتاب او حتي أنشطه بسيطه في البيت،وانا كأم لطفلتين عندما رزقت بابنتي الأولي وهي مصدر إلهامي ومصدر اكتشافي لنفسي ومواهبي ومهاراتي بدأت بالبحث عن طرق التربية السليمة وكيف اطور قدراتها وكنت ببحث كثيرا علي الانترنت ومن ضمن الافكار الجديده التي وجدتها هي الكتاب التفاعلي وكانت بنتي حوالي 8 شهور وفعلا درست طريقة عمله واشتريت الخامات وبدأت تصميم كتاب لها وتعمقت اكتر واكتر ووجدت الكثير من الامهات في كل مكان يسألونني عنه وكيف حصلت عليه ومدي استفادة ابنتي منه وأعجبوا به وطلبوا مني تصميمه لأطفالهم ،وممكن اي ام تصمم الكتاب لطفلها بأبسط الطرق خصوصا ان خامته رخيصة وليست مكلفة وهي قماش الجوخ وسعر المتر فيه بيتراوح من 9 إلي 11 جنيه وممكن الحصول عليه من العتبة او درب البرابره،وباقي الخامات ممكن شراؤها وممكن استخدام خامات من المنزل مثل الزر او خرز او سبحه مقطوعة او شرائط من الساتان وخيط وإبره ومقص وشمع. وتقول آفنان كامل طه منفذة الكتب التفاعلية للأطفال »علشان تعملي الكتاب ببساطة في البيت اولا بتشوفي انتي عايزه مقاس الكتاب ادايه لو الطفل صغير الكتاب يبقي كبير مقاس كتاب مدرسه مثلا لو الطفل كبير ممكن الكتاب يبقي اصغر،وبتاخدي المقاس وتعملي صفحات وتبتدئ تشوفي أنشطه هتعمليها وتنفذيها بترسيمها بأيدك او تطبعي بترونات من علي النت وتقصيها وتقصي القماش عليهاوتبتدي تجمعي الانشطه في الكتاب وتجمعي صفحات الكتاب طبعا انتي بتعملي النشاط علي وجه واحد من الصفحة عشان لما تيجي تجمعي الكتاب، وخلي الكتاب بألوان الطفل يكون بيحبها،وامثله بقي علي الانشطه اللي ممكن تعمليها نشاط لتعليم الطفل الأشكال الهندسية وكمان تعليم اسماء حيوانات ونشاط تجميع الفاكهة من علي الشجر نحطله رقم ويبتدي يقطف التفاح وده بيعلمه العد والقيمة العدديه للرقم،ونشاط لتعليم الألوان والاعتماد علي النفس في خلع الملابس ودا من خلال أزرار وملابس لألعاب وبيطابق اللون ويتعلم اسم اللون وكمان بيقوي عضلات أيديه،ونشاط البازل يجمع القطع اللي ناقصه ويعرف اسمها،ونشاط الدودة بيتعلم العد بطريقه جميله وهوا بيكمل الدودة الشقيه،ونشاط اللضم ومعرفه الأرقام بيساعد الطفل علي التركيز مثلا نحط مجسم لنحلة وهو يحاول يوصل النحله لبيتها وهيا بتتنقل علي الزهور وبتاخد رحيقها عشان تعملنا منه العسل معلومات كتيره من نشاط بسيط،والطفل بيتعلم العد والقيمة العدديه من خلال بازل البيض والألوان من خلال اقلام التلوين وكمان بيقوي عضلات ايده ودي بتساعده بطريقه غير مباشره في الكتابه دا كله وهوا بيلعب وبيكتشف.» وتكمل »نصيحة مني لكل ام ابنك امانه بين اديكي متستسهليش وتسبيه قدام الشاشات ليل نهار مدام ساكت ومش عامل ازعاج خافي علي ابنك من الشاشات دي انهاردة احنا بقينا عارفين اد ايه الموضوع دا بقي مضر علي الأطفال وبيسببلهم مشاكل وامراض انتي في غني عنها حاولي وجاهدي نفسك، انا كمان ام زيك وبضعف وبسيب بنتي احيانا قدام التلفزيون عشان ببقي مشغوله او عايزه اعمل حاجه بس برضو بحاول اشغل وقتها بانشطه نقعد انا وهيا نلعب بالكتاب حقيقي بيبقي وقت ممتع،الأمومة مش حاجه سهله بس كلنا بنحاول وبنتمني ان ولادنا يبقو احسن وأفضل مننا» وتحلم آفنان كامل طه منفذة الكتب التفاعلية للأطفال ان الكتاب التفاعلي يصبح في كل بيت مصري وان تتوسع في عملها وتسوق الكتاب في المكتبات مثل بقية كتب الأطفال وان يصبح لديها مصنع لصناعة الكتب التفاعلية وجاليري لألعاب تنمية المهارات،وتكمل»نفسي ابقي فعلا بساهم في المجتمع وبساعد الأطفال علي التطور والتعلم بطريقه ممتعه والملهمه ليا كانت بنتي والدعم كان جوزي اللي دايما مؤمن بيا وأهلي اللي دايما كنت بشوف في عنيهم نظره فخر ليا ودا كان بيحمسني اكتر واكتر». وتضيف »حاليا انا لدي صفحة خاصة علي الفيس بوك أسوِّق من خلالها الكتاب التفاعلي ولما عملت الصفحة وبدات انشر فكرتي علي الفيس وجدت استحسان من ناس كتير وعملت كتب وصلت لكل محافظات مصر حتي أسوان، بس أفضل الآراء اللي حبيتها أم كانت بنتها ملازمه التليفزيون وكانت متأخره في الكلام عن أللي زيها وكانت مش عارفه تسيطر علي مشاهده التلفزيون ولما عملت لبنوتتها الكتاب لفت انتباها وماشاء الله طور منها وطلبت مني كتاب لمرحلتها العمرية الجديدة بتاعت الحضانه عشان يساعدها في التعليم وميبقاش الموضوع تلقين وخلاص،واتبسط برضو لما الكتاب اتطلب من كذا حضانه حسيت انه هيطور من تعليم الأطفال ومبسوطة أني شاركت حتي ولو بجزء بسيط ان الأطفال يتعلمو بطريقه جديده وممتعه».
