حبة غُنا علي كام وجع

1
معني التجاعيد
الضلمة بقت ونس المرضان
وأنا مش عطشان
للقاكم تاني
ولا لسه بعاني
أنا كدا أحسن
الوفي دايماً موجود جنبي
وقت ما بحزن
علشان كدا مش عاوز أفرح
و لا عايز م الدنيا تلاهي
أنا جي أعدي طريق ضلمة
ما بحسش بيه غير و انا ساهي
أنا واحد مرهق نفسياً
متدمر كلياً خالص
مبحسش بالعمر الخالص
غير ف الوِحدة
أو ممكن تفكيري ف واحدة
أو ممكن زعلان مع نفسي
ف بعض حاجات
أو ممكن تفكيري ف واحد
كان صاحبي ومات
أهو ذكري الليل ساحبة مواجع
مع شوق في حنين
وأنا مش عارف قلبي المتبهدل
ناوي يوديني الليلة لفين؟
ولا عارف أنا ليه م الدنيا
واخد دور طيّب أو خسران
ملقيتش ضمان بإني أكمل
ف الدنيا معاكو بدور فرحان
ف كفاية أكدب علي نفسي معاكو
أنا شكلي هحاول أنساكو
وهدعيلكو إن إنتوا كمان تنسوني
ولصورتي الباهتة متفتكروش
مش عايز أعيّط ف متبكوش
الأولي إنكو تبعدوا عني
علشان أنا مرهق نفسياً
مش عايز أحس إلا بأوجاع
أو بحر يكون ضيّق ما يساع
إلا أحزاني....
ف أرجع و أعيّط من تاني
أنا قلت صحيح مش عاوز أعيّط
لكن عيّطت
والدمع الميّت مَلا دقني
تفكيري المزمن ف الذكري
ماسك في الناس اللي نسيتني
سكينة رقيقة بشوك ناعم
من باب الفرح وزقتني
علي حزن جديد
خلتني أفهم معني التجاعيد
و أفهم إن الموت مش حزن
ف فهمت كمان إن الفرح
مش مُلزم إنه يكون في العيد!!
2
دور
و كتبت بعرق الحبر الجافْ
عن كل مشاعري و تفاصيلي
وكتبت عن اللي خلاص إتشافْ
وعن اللي هيحصل و يجيلي
ففهمت إني من جوا سواد
من برا الظاهر كان العكس
وإني روتيني دايماً يتعاد
ودا كان غير ما توقعه الحدس
فبقيت باهت أو غير ملحوظ
وبقيت ممكن أو حتي يجوز
شايف من برا الدنيا حظوظ
وإني مكتوبلي
آخد فيها دور
دور واحد ميت أو منبوذ...
3
روح بايشة
أنا عمري ما كنت بَبيّن حزن
ولا كنت بسيب أفراح في البيت
مش عارف ليه عنكم خبيت
إن أنا منفصم الشخصية
بامسك في حاجات
بتسيب فيا....
فتأثر وأتكسر م الداخل
وعفارة الدنيا تضيق ع القلب
ف أَكُح الموجب من روحي
واستنشق كُره الناس بالسلب
مع رتم كئيب ف شرود باهت
سارح ف الجارح ع المجروح
وباطلَّع روح
مش عايزة تعيش
لكن عايشة
مش عارف ليه عنكم خبيت
إن أنا شخصياً روح بايشة!!
4
مِن غيرك
من غيرك بان الشتا أجمل
والصيف هَدّي حرارته عليا
ف ربيع الدنيا فتح بابه
أول ما خريفك ساب فيا
شوفتي الدنيا
مش واقفة عليكي
مش هرجع تاني وأقول خليكي
أنا بس هاقولك كتر خيرك
الدنيا بقت أجمل من غيرك
وأنا مش زعلان
دا الفرحة كانت علي ضهر الباب
و انا كنت عبيط ماسك في عتاب
و بقول الدنيا متلزمنيش
مش هعرف أعيش غير وياكي
ف قعدت سنين بستناكي
ووقفت و قام عطلان حالي
كل الموضوع إنك لعنة
مش راضية تروح أو تحلالي
أنا نفسي أعرف إزاي حبيتك
واتغميت علي إنك نور
وفضلت أزور صورك بالليل
جاوبيني وبس
أنا دمي تقيل!!!؟
ولَّا انتي بجد اتغيرتي
وغيرتي ف حالي بتغييرك
هو أنا مشبهش يا بنت الناس؟
ولا أنا مش جايب معاييرك؟
أهو كنت زمان بحلم بيكي
وباتمني إني أشغل تفكيرك
لكن دلوقت أنا بتأسف
مش هقدر أرجع دَلدولِك
يامه اصحابك نصحوكي زمان
وكتير حاولوا ويامه قالولك
حِسي شوية الواد شاري
بس انتي عليا اتكبرتي
وحَسبتي إنك لما كبرتي
هتعيشي حياتك علي راحتك
وتدوسي علي قلبي براحتك
علي إني هكمل عادي كمان
بس انا آسف و بقول معلش
مش هقدر أرجع تاني وأغش
او أمرمط قلبي انا زي زمان!.