اللقاء المنتظر !

أخيرا وبعد طول انتظار جاءني صوت أمي في المنام هاشا باشا مبتسما راضية مرضية بإذن الله ودار بيننا هذا الحوار:-
- أخيرا يامه، كده برضه الغيبة دي كلها مش اتفقنا تجيني في المنام كتير؟
- معلش يا ولدي كل شيء بميعاد
- عايز اشوفك هتكلميني صوت بس ولا إيه؟
- ههههه طب افتح الكاميرا
- الله هو انتي بتتكلمي من موبايل؟
- افتح الكاميرا وبلاش أسئلة كتير هو صحيح الموبايل اللي اتسرق رجعلك ولا لسه؟
- لسه يامه وشغال بموبايلك هههههه تكونيش بتلمحي عايزاه ولا إيه؟
- الله يحظك يا ولدي لا طبعا حلال عليك احنا هنا مش بنحتاج موبايل وكل اللي بنتمناه بنلاقيه فورا.. لحظة واحدة واخليك تشوفني.
- ما شاء الله تبارك الله عيني باردة عليكي يامه وشك منور زي البدر
- الحمد لله رب العالمين.
- وأخبار الحاج عندك إيه؟
- الله يسهله هايص في حور العين.
- ههههههه شكلك غيرانة يامه.
- لا يا إتش هنا مفيش غيرة ولا حسد.
- هنيالكم يامه.. بس مال نبرة صوتك يا حبيبة مش عاجباني؟
- اصلي بصراحة كده زعلانة منك!
- عارف عارف أكيد علشان ماكتبتش عنك في عيد الأم بس والله غصب عني انتي عارفة ظروف ورق الجرايد اليومين دول مش تمام والمقالات كل شوية بتتأجل يعني المقال يمكن كل أربع أسابيع يتنشر مرة.
- أنا مش زعلانة علشان ماكتبتش عني.
- أومال ايه بس اللي مزعلك مني ياغالية؟
- زعلانة علشان بتكتب عني كتير!
- مش فاهم يامه ياريت توضحي كلامك!
- ياولدي ربنا إدالك قلم مش علشان كل شوية تزعج القراء بحياتك الخاصة وآلامك الشخصية!
- أيوه يامه بس الكلام ده متأخذنيش يعني متأخر أوي أنا طول عمري حياتي الخاصة هي نفسها حياتي العامة إللي باكتبها للناس.
- أيوه ياولدي بس لكل شيء حد وإذا كان امك وأبوك ماتوا فالقراء ملهومش ذنب تفضل كل شوية تنكد عليهم بكلام يوجع، ياولدي الناس عايزة بسمة تخرجها من إللي هي فيه.
- بس يامه أنا عمري ماحسيت إن القراء زعلانين أو متضايقين بالعكس كمان باحس إن كتير منهم بيحب يقرا الحاجات دي أكتر من غيرها.
- يابني الناس ذوق ومجاملين بطبعهم ومفيش حد فيهم ممكن يوم يقولك خف علينا لكن مش معني كده انك تسوق فيها وتكرهم في عيشتهم.
- يامه افهميني أنا بس عايز أقول
- افهمني انت يا إتش، فاكر لما كنت تقولي أنك معجب بالأستاذ الكبير إللي دفن بنته ورجع من الدفن علي مكتبه يكتب للناس حاجة ملهاش علاقة ببنته ولا جاب سيرتها ولا فاكر إللي رجع من جنازة أبوه لمكتبه ولا كأن فيه حاجة؟
- أيوه يامه دي قدرات وأنا معرفش أعمل كده، أنا بافضفض مع الناس واحكيلهم همومي.
- يابني المفروض الكتاب هم إللي بيسمعوا هموم الناس ويحاولوا يخففوا عنهم مش كل ماتحصل للواحد فيهم حاجة يكتب عنها ويدوش الناس بيها، محدش قالك ما تحزنش علي امك وابوك لكن الناس ملهاش ذنب كل واحد إللي فيه مكفيه ومش ناقص تشيلهم هموم فوق همومهم. خد بإيد الناس يا ولدي لحاجات تفرحهم وتسري عنهم وبلاش تسحبهم معاك لكل حاجة بتألمك.
- يامه مش كنتي دايما تقوليلي الحزن وسط ولاد العم فرحة؟ أهو أنا باحب أحزن وسط القراء علشان ده بيخفف عني كتير.
- يا بني ولاد العم حاجة والقراء حاجة تانية دول غلابة عايزين اللي يفرحهم وينسيهم مشاكلهم مش يزود عليها ويدوس علي جروحهم.
- حاضر يامه أوعدك أحاول فعلا.
- المهم طمني عليك وعلي اخواتك
- الحمد لله كنت عندهم من كام يوم وادعيلنا بإذن الله نتجمع تاني علي عيد رمضان.
- ياااه هو رمضان قرب خلاص كده؟
- أيوه يامه فاضله أقل من شهرين ده أول رمضان من غيرك انتي وابويا.
- تاني يا بني عايز تبكي الناس ده انا لسه مخلصتش كلامي
- ههههههه خلاص يامه سكت
- رمضان كريم يا ولدي
- ايه يامه ده لسه خمسين يوم انتي مش ناوية تجيلي تاني قبل رمضان ولا إيه؟
- أجيلك بإذن الله، طبعا زمان التليفزيون بيستعد كالعادة لرمضان
- اسكتي صحيح يامه نسيت أقولك حاجة مهمة، ولا بلاش أحسن
- قلقتني يا ولدي قول فيه إيه؟
- افتكري يامه اني قلتلك بلاش!
- ما تنطق يا ولدي فيه إيه؟
- سما المصري يامه!
- سما الرقاصة؟ تكونش اعتزلت الحمد لله؟
- أولا اسمها فنانة استعراضية وبعدين ماعتزلتش لكن هتقدم برنامج في رمضان.
- استغفر الله برنامج استعراضي يعني؟
- لا يامه سما حاتقدم برنامج ديني !
- ..................
- الو الو يامه.. رحتي فين يامه احنا لسه ماخلصناش كلام؟
انقطع الاتصال وسمعت هذه الرسالة (هذا الرقم غير متاح حاليا الهاتف قد يكون مغلقا أو خارج نطاق الخدمة أو صاحبه قد اوغمن عليه)!