وسط البلد

«وسط البلد» تجربة شعرية غير تقليدية بالعامية المصرية.. بدأت قصتها بين ثلاثة من فرسان شعر الفصحي وهم الأساتذة الشعراء سيد يوسف وسامح محجوب ومحمد منصور، حيث كان الاتفاق علي كتابة مجموعة مشتركة من الرباعيات تبدأ كل منها بعبارة (وسط البلد) وتنتهي بالباء الساكنة.
وقد غلبت علي النص الروح النقدية الساخرة من سلبيات المجتمع المصري، ثم تفاعل العديد من الشعراء مع الفكرة وشاركوا في كتابتها مما جعلها أكثر ثراء واتساعاً.
نعرض هنا جانباً من هذه التجربة الفريدة بأقلام الشعراء:
سيد يوسف، سامح محجوب، محمد منصور، حسنين السيد، عمر سامح هلال وأسامة عبدالصبور.
وسط البلد چينز وجلاليب
تلقي النقاب جنب الميني چيب
ملناش هوية وطبع عجيب
لا أدوية تنفع ولا طب
•••
وسط البلد فول وفلافل
رغم الكبابجي ماهوش قافل
والناس هناك طالعة قوافل
تغطس في بحر الفول وتقب
•••
وسط البلد مخلوع وسطه
محتاج لعالم ك (أرسطو)
يطبُخنا في حلة برستو
ويزيح بقايا ولاد الكمب
•••
وسط البلد مليون باشا
واكلين جاتوه ويَّا بغاشة
والشعب قرب يتلاشي
ويدوب في حمض الخوف والرعب
•••
وسط البلد «توك توك» ماشي
يلعن ف دا اللي مايخشاشي
والشمس عينها ما تحماشي
إلا ف قفا الموعود بالغلب
(حسنين السيد)
•••
وسط البلد هِدّ المَدنة
واعمل مع الأوَقاف هُدنة
يا رب خُدهم يا تاخُدنا
يمكن ميزان العدل يطب
•••
وسط البلد صاحب العزة
كاسه الوطن واحنا المَزَة
جاب للطيور أنف الوزة
وللبهايم داء الكلب
•••
وسط البلد تحرير شُبرا
أتوبيسنا عطلان ف الأوبرا
الناس ف أزمتها الكبري
واحمد نظيف بيقزقز لب
•••
وسط البلد لو بطل لعب
يبقي البلد دي ف حالة حرب
وساعتها نعلنها طوارئ
وكأننا واقعين ف «دُروب»
•••
وسط البلد هادي وواسع
لو جاي له م الحي التاسع
وموصلك سواق لاسع
يبقي الحقيقة الموقف صعب
•••
وسط البلد كف عروسة
وعنّست يا دي الحوسة
كُترْ البدنجان والكوسة
خلُّوا العيال تكفر وتسب
•••
وسط البلد «آر يو كريزي»
يا ابن البلد «تيك إت إيزي»
«الرونج» مش فيك يا عزيزي
«الرونج» كله ف أهل «التوب»
•••
وسط البلد يا سلام سلم
إياك تحاول تتكلم
كوز المحبة بيتألم
والليل طوَل صبَّرنا يا رب
•••
وسط البلد سايب جداً
وارثينه أباً عن جداً
لا ديوكنا ف العشة بتدن
ولا الفراخ بتبيض علي جنب
•••
وسط البلد دول زرعوها
ودولا عنهم منعوها
ودولا ف السر باعوها
وفلوسها ف حسابهم بتصب
•••
وسط البلد جامعة ماما
تضرب وماتسيبش علامة
من برة تلقي الخير ياما
من جوة تدخل بيت الرعب
•••
وسط البلد.. خمسة ف ستة
مصمصتها؟!.. طَب سيب حتة
خشبك بترعاه العتة
ولسه بتعافر وتشب؟
•••
وسط البلد مجمع علمي
شغلانته إيه.. علمك علمي
خلِّي انقلاب الروح سلمي
وبلاش ف عيدك تضرب بمب
•••
وسط البلد جمعة الشوان
صلاح چاهين وجمال حمدان
سقيناهم الإحباط ألوان
مين اللي قال الرجل تدب؟
•••
وسط البلد روح اتنيِّل
لا تعترض ولا تتخيل
إلحق وخلِّف كام عيّل
قبلن ما ياخدوا «الإنترلوب»
•••
وسط البلد.. ريحتك فاحت
كل الفرص منك راحت
شَكليتة الإصلاح ساحت
والفار بيتنطط ف العِبْ
•••
وسط البلد.. خلطة كشري
خس وجزر.. ومبيد حشري
وعشان ما شعب النيل عشري
غمَّض ودانه.. وهاتك شُرب
(سيد يوسف - سامح محجوب - محمد منصور)
•••
وسط البلد أنا من صُغري
عارف طريقَك مش دوغري
حاكِم خداع الناس مُغري
والنَّصب ع الغافلين مش نَصب
•••
وسط البلد مليون سوسة
تُنخر في عضْم المحروسة
لو كل فرعون لُه موسي
ماكانِتش خرِبِت شَرق وغَرْب
•••
وسط البلد هل مش فاهم
إن العواصف بتْدَاهِم؟
واللي بْيَثق في الريح، واهم
هتلُوشُه، ثّم يسِير الرّكْب
(عمر سامح هلال)
•••
وسط البلد وسط الأزمة
مُفلس ومش لابس جزمة
واقف قصاد شاشة بلازما
ويقول هاجيبها وأبطل لِبْ
•••
وسط البلد كله اتسمر
دخل الخواجة واتأمر
ع الاقتصاد اللي اتدمر
واقف بيبكي طلعت حرب
•••
وسط البلد سينما ديانا
صورة الأفيش مش عجبانة
أصل الكِتاف العريانة
مالهاش علاقة بمعني الحب
•••
وسط البلد لو تتمشي
هتلاقي شحات بمقشة
يُكنس ولايحرك قشة
ومنضف الشارع بالكدب
•••
وسط البلد وعلي المشاريب
إلعب بشرط تكون لعيب
بس اللي يدخل جحر الديب
لازم يفوق ويبطل لعب
•••
وسط البلد واقف أغني
وألعن أبوه اللي أهانني
طول عمري عايش مستني
كفّة ميزان العدل تطب
( أسامة عبد الصبور )