جوزك على ما تعوديه.. مش لازم تكون بطل العالم فى الاستماع

اختلاف طبيعة الرجل والمرأة ينعكس بشدةعلى كل تصرفاتنا أبسطها على سبيل المثال هو أن الراجل مش بيحب يتكلم خالص ‏وممكن يرجع من الشغل يفضل باصص فى السقف أو ماسك الموبايل فى السرير لحد تانى يوم ‏العكس تماما عند الست، حتى لو بتشتغل ويومها كان صعب وزحمة إلا أنها لازم تتكلم وتحكى لجوزها اللى بتعتبره شريك ‏حياتها كل تفاصيل يومها بما فيها مشاكلها اللى مرت بيها سواء فى الشغل أو فى البيت مع الولاد. ‏
هى بتعتبر مجرد أنها بتحكى الكلام ده تفريغ للطاقة السلبية اللى أخدتها فى اليوم، وبتكون محتاجة من الرجل اهتمام بكلامها ‏ومش لازم إنك تكون بطل العالم فى الاستماع بس شوية اهتمام هيفى بالغرض ويحسسها إنها مهمة وإن كلامها مهم.
الست بتحب تتكلم وترغى وتسأل عن التفاصيل وطبعا موضوع الأسئلة ده بيوتر الرجالة جدا، ودى حاجة الصراحة مش ‏مفهومة؟ الأسئلة دى علشان تفهم الموضوع بشكل أعمق وتقدر تقول رأيها، مش فضول نهائى، ولا محاولة منها أنها تعرف ‏كنت فين ومع مين؟ لا سمح الله. ‏
المطلوب دلوقتى إنك تتكلم مع مراتك وتسمعها كويس لما تحكى لك على يومها. لأن الواقع أكد أن الأزواج اللى مش بيسمعوا ‏لمراتاتهم أكثر عرضة للاكتئاب، وده نتيجة للنكد اللى بيشوفه كل يوم على إيد مراته.فاسمع بكرامتك وعدى اليوم.‏