جوزك على ما تعوديه.. على فكرة كلنا بنغلط

دى حقيقة لازم نعترف بيها كلنا، مفيش حاجة اسمها أنا صح على طول ومش بغلط، الكلام ده مش موجود.. واللى بيغلط لازم يعتذر..سامعين يعتذر دى.
الفكرة إننا بنغلط لأننا بنى آدمين وده طبيعى فا مش كل ما يحصل مشكلة نجيب من أول الصفحة ونقعد تشتكى، طبيعى يحصل مشاكل وطبيعى نغلط والطبيعى كمان إننا نحلها.
مفيش داعى أن السّت تقعد تحضّر لجوزها صحيفة معارضة وتفضل تشيل فى غلطاته وتصرفاته علشان تثبت أنها على حق، علشان تؤكد له أنه بيغلط عادى زى كل الناس، بلاش تحسّسونا إننا عايشين مع ملايكة فى البيت الله يكرمكم إللى يغلط يعتذر وكلنا بنغلط، أقولك الأقوَى من كده إنك ممكن تعتذر لو مش غلطان.. آه.
أصل مش كل حاجة فى الحياة الزوجية بتمشى بالورقة والقلم فى حاجات بتمشى علشان نعدى الدنيا، كتير يرجع الزوج العزيز بيدوَّر على خناقة لمجرد إنه متخانق فى الشغل، وكتير بيحصل العكس.
هنا الذكاء بيقول عدّى الليلة وكبّر دماغك وامشى بمبدأ لا تجادل ولا تناقش يا أخ على..
لكن فى الخناقات العادية فى شخص ممكن يغلط وأحيانًا الطرفين بيغلطوا ولازم يعتذروا لبعض.
إحنا مش عايشين مع ملايكة فى البيت، فا عادى نغلط ونعتذر ونغلط تانى وتالت، المهم إنك تعرف ده وتتقبله.. مفيش حد معصوم من الغلط.