ابن البدوى وابن إياس: فى أحوال القاهرة والناس .. حملت رأس سيدنا الحسين مع الأفضل ابن أمير الجيوش بدر الجمالى من عسقلان إلى القاهرة "الحلقة 4"

للمرة الثانية أزور ابن إياس فى منزله فى العصر الفاطمى لكن فيه فرق كبير بين المرتين.
المرة الأولى جيت له فى الشدة المستنصرية ومكانش لاقى ياكل.
المرة دى أول ما خبطت على الباب لقيته بياخدنى بالأحضان.
ايه ده معرفتكش يا ابن إياس أنت صابغ وعامل بوتوكس.
بصوت واطى قاللى بطل فضايح متسيحليش قدام الناس.
ببص لقيت أربع ستات تحل من على حبل المشنقة.
قلت له مين الصواريخ دى يا معلم.
شخط فيا وقاللى أتلم يا رقيع دول زوجاتى.
ميلت عليه وقلت له الدولة الفاطمية بقت حلوة دلوقتى وهتبطل تكتب ضدها فى تاريخك؟
ابتسم وقال والله ناس زى الفل بس قولى عرفت منين انى صابغ وعامل بوتوكس
قلت له مش محتاجة يامعلم واضح انك عامل الشغل ده تحت كوبرى إمبابة.
العمة البيضاء بقت سودة من الصبغة والشد اللى عامله تحت عينك تحس انك شديته على قالب 42 عند الاسطى فاروق العش الجزمجى... لو نفسك تضبط حالك كنت قول ل اخوك ايهاب كنت هاخدك عند ياسر ابن عمى بوتوكس وفيلر وتزرع شعر كمان وهتدفع نص كشف.
قاللى لما نرجع.
قلت له إحنا رايحين فين لامؤاخذة.
قاللى هنطلع بكرة مع الأمير الافضل ابن أمير الجيوش بدر الجمالى نجيب رأس سيدنا الحسين من عسقلان.
قلت له بتتكلم جد.
قال لى اومال باعتلك رسايل ع الواتس ليه
ولازم تجيلى فى نفس الزمن ما انا عارف انك من محبين آل البيت.
قلت له والله أنت رجولة يا ابن إياس اطلع انام عشان نستعد للسفر بكرة.
لقيته بيقولى استنى وراح رافع صوته ومنادى.
حسناء منى هيفا سارة لقيت اربع ستات زى القمر داخلين علينا.
قلت له مين دول يامعلم وجوه جديدة فى دراما رمضان؟
قاللى دول جوارى عشانك يا ابن البدوى لأنك طلبت المرة اللى فاتت وكنت بعتهم
قلت له بصوت واطى طبعا أنت راجل برنس والختمة الشريفة بس الاربعة دول عايزين صيدلية من اللى بتجيب المستورد
قاللى صيدلية مين يامعلم على حظك النهارده عاملين سى فود وراح مزعق جهزوا العشاء ل ابن البدوى.
نص ساعة ولقيت طواجن السبيط والجمبرى بالجبنة الموتزاريلا وشوربة سى فود بالكابوريا ورز بالجمبرى وسمك دينيس.
انا كنت عامل زى الزميل هارون الرشيد اللى تأكلنى جمبرياية جامبو فى بقى واللى تأكلنى سبيط مقلى.
انا قمت لانى حسيت أن بطنى هتنفجر من كتر الأكل.
اتسندت على الاربع جوارى وطلعت فوق وهما معايا.
الصبح لقيت رزع على باب الجناح وابن إياس بيقولى قوم ياشملول غير هدومك عشان طالعين عسقلان.
قلت له هو حصل ايه امبارح يا ابن إياس؟
قاللى اللى حصل لا يتحكى ولا يتقرا حضرتك اول ما طلعت قلت للجوارى هفرد جتتى دقيقتين وحضرتك نمت وشخيرك كان جايب اول فيصل.
قلت له يانهار اسود يادى الفضايح والجوارى بيقولوا عليا ايه دلوقتي؟
قاللى بلاش هتزعل قوم يالا البس عشان منتأخرش.
نزلت انا وابن إياس من البيت وسمعت صوت جارية بتقول يا خسارة الجمبرى والسبيط حار ونار فى جتتك يالى فى بالي
المهم وصلنا عند موكب الافضل ابن أمير الجيوش اللى قال ل ابن إياس.... هو الباشمهندس معانا
ابن إياس قاله ده مساعدى فى التدوين
ركبت فرس وبدانا التحرك
الطريق كان طويل اخدنا سبعتاشر يوم لغاية ما وصلنا إلى عسقلان والافضل ابن أمير الجيوش بعتلى وقال انا جالى رسالة من رجل من عسقلان انه عارف مكان قبر راس سيدنا الحسين وانه طالب وزنه ذهب عشان يدلنا على القبر وهو منتظرنا خلف التبة دى عايزك تقابله وتقولنا وزنه تقريبا اد ايه عشان نجهز الدهب والراجل ما يطمعش.
انا تسلقت التبة لقيت وراها راجل رفيع وقصر مايجيش 40 كيلو قلت فى عقل باللى الحمد لله مش تقيل برضه الراجل قاللى انا ابو المنصور العسقلانى وانا أعرف مكان الرأس الشريف وزى ما بعت لحاكم مصر عايز اللى اكتشف مكان الرأس الشريف يتوزن دهب
انا الفار بدأ يلعب فى عبى وقلت له مش حضرتك اللى اكتشفت مكان القبر قاللى لأ ده ابنى الصغير المنصور حمادة
وراح منادى يا حمادة... يا حمادة
سمعت صوت بيقول ايوة يا دادى وراح داخل علينا عيل شبه العربية التوناية وهى محملة يرمى لحم قايم يجى 190 كيلو
قلت قلبى كان حاسس المهم اخدت الواد وابوه ورحنا إلى الافضل ابن أمير الجيوش بدر الجمالى وقال له عايز وزن حمادة دهب.
كان معانا قبانى علق حمادة وقصادة الناحية التانية شكارة رز 100 كيلو حمادة طب خليناهم شيكارتين 200 كيلو حمادة طب زودنا 20 كيلو الكفة اتعدلت.
ادينا حمادة وابوه 220 كيلو دهب.
واخدونا إلى موقع بعد 10 كيلو وهناك لقينا مشهد قديم انا دخلت لقيت مقصورة خضراء على ضريح فتحت الضريح لقيت ريحة مسك مالية الضريح وبدات اشيل اتواب من الحرير الاخضر لغاية ما وصلت إلى صندوق من الحديد وزادت رائحة المسك لدرجة أن الجيش كله شم الرائحة.
انا كان عندى رهبة وانا بحاول بهدوء فتح الصندوق لغاية ما فتحته بالفعل ولقيت نور طلع من الصندوق وزغلل عنيا ولقيت الافضل جاى جنبى وبيبكى وانا مقدرتش امسك دموعى لما لقيت الراس الشريف ملفوف بشملة خضراء والدماء الزكية طازجة على الشملة والنور يشع من الحديدى.
الأمير الافضل قاللى حسبك اغلق الصندوق ويالا نرجع مصر.
خدنا تقريبا 14 يوم لغاية ما وصلنا مدينة الصالحية كان الخبر انتشر ولقيت الناس كل ما نمر عليها تخلع مداسها وتقف حافية منكسة الرأس احتفالا بالرأس الشريف.
بينما الأغانى والاهازيج والابتهالات لا تتوقف.
وصلنا القاهرة كان الصالح طلائع بن زريك وزير الخليفة الفائز لدين الله جهز مسجد الصالح طلائع اللى فى الجمالية عشان يدفن فيه الرأس الشريف لكن الخليفة الفائز اصر انه يدفن الرأس الشريف فى قصره وبالفعل اخرجت الصندوق الذى به الراس الشريف ودفناه فى القصر.
عدت بعدها مع ابن إياس ورائحة المسك لم تذهب عن يدى.
وحتى عندما عدت إلى منزلى مازالت الجلابية الاماراتى السوداء تختزن رائحة الراس الشريف حتى الآن.
1
2
3
4
5