أنت جيت «شهقة» يا رمضان (5) حكاية فوازير رمضان

مهما كان سنك، طالما عارف يعنى إيه فوازير يبقى المقال ده يهمك - أحدثكم النهاردة عن حكاية الفوازير عند المصريين.
كانت بداية فوازير رمضان فى الإذاعة مش التليفزيون، وكان يأتينا صوت آمال فهمى وسامية صادق لما كانت الفوازير عبارة عن أسئلة بيقوم المستمعون بالرد عليها عن طريق جوابات البوسطة وبيبعتوها بالبريد على عنوان ماسبيرو.
بعد كدة اتنقلت الفكرة للتليفزيون سنة 1961 وكانت أول فوازير اسمها «على رأى المثل» وكانت عبارة عن فقرة درامية.
وفى سنة 1967 دخل الاستعراض مع الدراما على يد المخرج أحمد سالم وفرقة ثلاثى أضواء المسرح (المكونة من سمير غانم وجورج سيدهم والضيف أحمد)، وقدموا الفوازير لحد سنة 1971، وبعد كده حملت نيللى الراية وقدمت الفوازير من سنة 1975 لسنة 1981 وكان مخرجها هو الراحل فهمى عبدالحميد.
فى سنة 1982 ابتكر عبدالحميد شخصية فطوطة اللى استمرت لسنة 1984 لحد وفاته.
أما القمر شريهان فعملت فوازير حول العالم سنة 1987، وألف ليلة وليلة سنة 1988، وبعدها جت فوازير المناسبات بطولة صابرين، وهالة فؤاد، ويحيى الفخرانى، وفى عام 1989 كانت فوازير الفنون من بطولة شيرين رضا، ومدحت صالح.
بعد وفاة فهمى عبدالحميد قام مساعده جمال عبدالحميد باستكمال رحلة الفوازير فى 1991 بفوازير عجايب صندوق الدنيا لنيللى وأم العريف سنة 1993، وحاجات ومحتاجات بطولة شريهان سنة 1993 برضه، وبعد كدة اتعملت فوازير قيس وليلى بطولة محمد الحلو وشيرين وجدى سنة 1994، وبعدها سماح أنور عملت فوازير احنا فين سنة 1994، ورجعت نيللى تانى بالدنيا لعبة وزى النهاردة فى العامين التاليين، وفى سنة 1997 قدمت جيهان نصر فوازير الحلو ما يكملش.
بعد كدة جت نادين ووائل نور فى جيران الهنا، ومنستغناش لنادين، وأبيض وأسود لدينا وهنيدى وعلاء ولى الدين وأشرف عبدالباقى، وقيما وسيما للوسى.
استمرت الفوازيز بشكل رسمى لسنة 2013 لما قدمها محمد هنيدى فى مسلسليكو. ارتبط المصريون بالفوازير جدًا، سواء كانت فى الراديو أو التليفزيون، أحبهم عندى أنا على الإطلاق هى فوازير فطوطة وهو قزم لابس بدلة خضرة وجزمة صفرة كبيرة جدًا وكان له جملته الشهيرة:
أكشن..
فيقول سمورة: فطوطة مخرج أنتيكا، اتعلم سينما فى أمريكا، يرقص تانجو وشيكا شيكا بيكا، واحنا الجوز عاملين توريكة، ننتج أفلام الفزورة لنجوم الفن المشهورة.
من فضلك وضحلى الصورة، تانى مرة علشان البيه يفهم على قده.. أوماااال إيه والتتر بتاع النهاية:
تشترى ساعة بكاتينا من غير عقارب ولا مينا، أغانيها كانت خطيرة، من تأليف عبدالرحمن شوقى ولحنها سيد مكاوى أو حلمى بكر وتصميم الاستعراض كان لحسن عفيفى واللي صممت ملابس فطوطة كانت وداد عطية.
دى كانت حكاية الفوازير وتوتة توتة فرغت الحدوتة.. حلوة ولا ملتوتة؟