أنت جيت «شهقة» يا رمضان (1) حكاية المسحراتى

كل سنة وأنتم طيبين، رمضان جانا وفرحنا به، رمضان عندى مرتبط بحكايات مامتى اللي حكيتهالى وأنا صغيرة أو بحاجات كانت فى طفولتى - هفتكرهم سوا معاكم - النهاردة هحكيلكم عن المسحراتى.
المسحراتى أو المسحر، هو اسم مشتق من كلمة السحور، وهى مهنة سماها المسلمون كده نسبة للشخص اللي بيعلمهم بموعد السحور.
فى التاريخ الإسلامى كان بلال ابن رباح ومعه ابن أم مكتوم أول من تولوا هذه المهمة، كان بلال بيأدن فتصحى الناس وتاكل والتانى يقولهم يمسكوا عن الأكل ويصوموا.
فى مصر أول مسحراتى كان واحد اسمه عنبسة ابن اسحاق سنة 228 هجرية، وكان هو والى مصر ساعتها، كان بيمشى على رجليه من المعسكر فى الفسطاط لحد جامع عمرو ابن العاص وينادى الناس للسحور.
من الجمل المشهورة للمسحّرين على مدار تاريخ مصر: اصحى يا نايم وحّد الدايم يا غافى وحّد الله ويا نايم وحّد مولاك اللي خلقك ما بينساك وقوموا إلى سحوركم جاء رمضان يزوركم.وكان المسحراتى بيلحن العبارات على الطبلة بتاعته.
المسحراتى مكانش بياخد أى فلوس بس كان أول أيام العيد بيعدى على البيوت ومعاه طبلته المعهودة، فيطلع له الناس يدوله الهدايا والحلويات ويبادلونه عبارات التهنئة بالعيد.
مهنة المسحراتى امتدت للبلاد العربية والإسلامية زى اليمن والمغرب وفيها المسحراتية كانوا بيخبطوا على الأبواب بالنبابيت وكان أهل الشام بيلفوا على البيوت ويعزفوا على العيدان ويغنوا أغانى خاصة برمضان.
أما فى مصر كان «المسحراتية» بيطوفوا فى الشوارع ويرددوا الأناشيد الدينية وينادوا الناس بأسماءهم علشان يصحوا طالبين منهم أن يوحدوا الله وهم بيضربوا على الطبول ضربات متوالية علشان يسمعوهم ويصحوا يتسحروا.
أشهر مسحراتى فى مصر واللي الجمل التالية دى بتاعته هو سيد مكاوى اللى غنى حلقات كاملة اسمها المسحراتى من شعر العبقرى والمتميز فؤاد حداد سنة 1964 فى برنامج فى الراديو، صاغ فيها حداد كلمات المسحراتى كرحلة فى التاريخ والمكان والإنسان فى العصور المختلفة.
البرنامج ده أصبح ملحمة شعبية عاشت سنين طويلة وحبها المصريين وللنهاردة بيرددوا أغانيها ومنها الفقرتين دول:
المشى طاب لى والدق على طبلى
ناس كانوا قبلى قالوا فى الأمثال الرجل تدب مطرح ما تحب
وأنا صنعتى مسحراتى فى البلد جوال، حبيت ودبيت كما العاشق ليالى طوال
وكل شبر وحتة من بلدى، حتة من كبدى،حتة من موال
اختزل المصريين كتير من كلام المسحراتى وبقوا يقولها كدة: اصحى يا نايم وحد الدايم، والرجل تدب مطرح ما تحب.
تمر السنوات ويفضل المسحراتى علامة من علامات رمضان وحاجة بنحبها ودايمًا ترسم الأبتسامة على وشنا.
دى كانت حكاية من حكايات مامتى ليا فى رمضان وتوتة توتة فرغت الحدوتة.. حلوة ولا ملتوتة؟