مناغشات .. وصية زوجة

حبيبي: أخيرا هيتحقق حلمك.. وترتاح.
للأسف هتحرم من عذابي.
هتتحرر من قيودي.. وقبضتي.
وستعترف بقيمتي.. لكن بعد إيه!
حسيبك للزمن.. و..
بهذه الكلمات بدأت صديقتي رسالتها لزوجها.
وأكملت.. أحببتك ولم تبادلني المشاعر.. لم تصني.. أشهد أنك مازلت متربعاً علي عرش قلبي وعقلي.. ولن أنساك حتي بعد موتي.
ولن أتركك تحتار بعدي.. فلك عندي عروسة رائعة.. خادمة مطيعة.. ست بيت شطرة.. وموفرة جيدة.. (ولا بترد ولا بتصد).
زوجة حسب الطلب.. آلة.. لاتشعر.. ولاتعبر عن غضبها.. ولن تنجب.. كل يوم تسجل طلباتك وعليها التنفيذ.. لأنها لا تفكر.. أقصد غبية.. ولهذا تؤمر فتطاع!
ملحوظة هامة جداً: أول ماتفتح علبتها غَّير بيانات اليوم والساعة.. أصلها تايواني. آسفه ياحبيبي كان نفسي تكون يابانية.. لكن هي التايوانية المتاحة.. يارب تستحملك! وتقدر علي تصرفاتك.
خبر سار: إذا لم تتحمل الاستمرار معك بتتكسر.. ولن تؤذيك.. أصل مصممها رجل. وعارف إن محدش هيستحملكم!
كان نفسي يكون كلامي حقيقيا.. الجزء الخاص بالتايوانية.. لكن.. هي دي الحياة! عجبتني فكرة صديقتي.. وعرضتها علي صديقاتي:
الأولي: وكمان عايزة تريحه.. والله تستاهل كل تعبها معاه (قالوا لفرعون إيه اللي فرعنك.. قال مالقتش حد يقول لي لا).
الثانية: تايوانية مين.. ولاحتي اليابانية.. ولا الجامدة الألمانية تتحمل جوز المصرية. خليهم يجربوا.. عشان يعرفوا قوة ست الستات.
الثالثة: وتسيبوا ليه.. أكبر عقاب ليه إنها تتعب يومين.. وشوية محايلة منها يجرب شغل البيت.. يتحملها ماهية ياما اتحملت.. دلعه!
الرابعة: ليك يوم ياظالم.. بصراحة إحنا السبب.. دلعنا وهننا وخدنا علي دمغنا.. إحنا زرعنا القوة فيهم من صغرهم.. بنربي الولد علي أنه أفضل من أخته.. والنتيجة سيد علي زوجته.. قبل ما نحاسبهم.. نحاسب نفسنا!
الخامسة: أناشايفة إن كل زواج حاله خاصة.. وأحسن شيء الاتفاق من البداية وبعدها نتحاسب.. وكل طلبات الزوجة توثق في قسيمة الزوج.. وعلي المتضرر اللجوء. لمحكمة الأسرة للفصل.. أو للحل.
كلامنا كان كلام ستات.. السادة الرجال موافقون؟