نادو..!!!

لو فاضية ياريت تعدى على نادو أصلها مكتئبة جدا ومش بتخرج. فعلا أنا بقالى فترة معرفش حاجة عنها وحقيقى لما كلمتها لقيتها مكتئبة جدا وعلى غير المعتاد.
وعديت عليها وفوجئت بكم الحزن الذى يعتلى وجهها غير آثار البكاء الواضحة عليها. إيه مالك..؟؟ لم ترد وأعدت عليها السؤال يا بنتى فى إيه اتكلمى؟؟ وبعد محايلات بدأت تتكلم.
أنا السبب أنا السبب..!!! اتعذبت أوى وهى بتموت أعمل إيه كان نفسنا نشوف ولادها (وفهمت القصة واضح أن دى واحده قريبتها)
معلش يا نادو البقاء لله ربنا بيختار (وغالبا لا أجد كلاما فى مثل هذه الحالات غير التمتمة بكلمات لا مفهومة ولا مسموعة) واستمرت نادو فى سرد القصة بعد أن انضم إلينا عدد من الأصحاب الذين يبدو أنهم ملمون بالقصة.
تصوروا من أول الحمل وهى تعبانة وأنا لاحظت كده ورغم أنى كنت بانفذ كلام الدكتور بالحرف إلا أنها برضه كانت تعبانة وكسلانة وشهيتها ضعيفة.. وأتدخل فى الحديث معلش يا نادو هو الحمل كده تعب فى تعب
تصورى الدكتور قال نفس كلامك (وتعود للبكاء)
هى يا حبيبة قلبلى جسمها ضعيف وكان المفروض تأخر الحمل.. رغم أنى مشيت على كلام الدكتور وماكنتش بتاكل إلا صدور فراخ مخلية وبيض مسلوق وفيتامينات لكن برضه مستحملتش الحمل ولا والولادة وماتت؟؟
معلش يا نادو قدر الله وماشاء فعل.. وأنظر حوللى لأرى الحزن والوجوم قد خيم على الجميع وحاولت أن ألطف الجو.. معلش يانادو المهم هى كانت ولدت؟؟ وتنظر إلى بكل حزن.. الأول والتانى نزلوا كويسين
هى جابت توأم؟
لاترد.. وتكمل وسط متابعة الأصدقاء التالت والرابع معقولين الخامس نزل بالعافية السادس كانت ماتت.. وتبكى بكاء مريراً ويشاركها الأصدقاء وسط ذهولى وعلقت إيه يابنتى هى قريبتك دى إيه أرنبة!
وفوجئت بالكل ينظر إلى باستنكار وفاقت على نادو وهى مستفزة جدا. أرنبة إيه!! وقريبتى إيه!!! دى سويتى الكلبة بتاعتى تصورى مش قادرة أنسى نظرتها وهى بتوصينى على ولادها وانفجرت بالبكاء!!
ولم أتمالك نفسى.. إيه انتى مكتئبة عشان كده؟؟ وإحنا جايين علشان نواسيكى فى كلبة ماتت وهى بتولد وصدور مخلية وبيض مسلوق؟ أنتم مش حاسين بالناس؟! كلب إيه ووصية إيه؟!
وفوجئت بكم الاتهامات بأنى غليظة القلب ومعنديش قلب وأن العمل الصحفى غيرنى.. قلتلهم أنا بحب الحيوانات بس بحب البشر أكتر وبيتقطع قلبى لما أشوف واحد واقف أدام محل ومش قادر ياكل.. وتركت المكان وأصحابى بيواسوا نادو.. أما أنا فقد احتجت لمن يواسينى فى بشر أثقلتهم هموم الحيوان أكثر من الإنسان.