كور واحدف

أعذروني يا جماعة، إحنا لسه في أول أيام رمضان وعشان كده اسمحوا لي أقول لكم بصريح العبارة، إحنا هندخل النار، ليه بقي لأننا بنأكل بالشوكة والسكينة وأنا سمعت الشيخ إياه بيقول إن الأكل بالشوكة والسكينة حرام، وأنه من أكل بالشوكة والسكينة في الدنيا، يحرم عليه أن يمسهما بيده يوم أن يلقي وجه كريم، وعشان كدا أنا أطلب من كل أصدقائي الفيس بوكية شن حملة شعواء علي مؤيدي الشوكة والسكينة، ورفع شعار «كور واحدف» واكسب سندوتش هدية.
وكمان الأكل بالشوكة والسكينة غير أنهم حرام للبدعة، فالآكل بهما نقدر كده نقول عليه كافر، لأن الشوكة والسكينة والمعلقة من أدوات القتال، ولو شفنا أفلام زمان أيام السينما الصامتة، كان البطل يمسك المعلقة ويحارب بها أجدع فارس، وكان الفارس يحارب وفي الآخر يضرب العدو بالمعلقة علي أم رأسه فيسقط علي الأرض سايحاً في دمه.
والكارثة يا جماعة أن الغلابة كتير وبيصدقوا الكلام دا، وتلاقيهم بيقولوا إن اللي بيأكل بالشوكة بيأكل معه الشيطان، وبالفعل كنت في أحد المطاعم وقعدت في أمان الله وأنا هفتان عشان آكل وما أمسكت بيدي الشوكة وهجم علي واحد من إياهم وقال لي حرام عليك يا شيخ أنا شايفك من الصبح قاعد تأكل الشيطان معك وأنا ساكت، حرام عليك، وأحلف له إن الشيطان مش قاعد معايا، كان حاجز التربيزة اللي جنبي بس خلص ومشي، قال لي حرام عليك هتروح من ربنا فين، فقمت وأنا نفسي مسدودة ومأكلتش، والقطط هي اللي كسبت، وعشان كده بأقول لكم انسوا الشوك والسكاكين وارجعوا للطبيعة عشان تفوزوا في الدنيا والآخرة، وإفطاراً شهياً وكل عام وأنتم بخير.