شطحات نسائية: علي ذمتي أربعة رجال!

من هؤلاء؟ أهم أبناؤك ؟؟.
(بصوت حزين) أنا.. لم أنجب، تزوجت أربع زيجات ولم أرزق بأطفال...!!. (مواسية).
ولكنك صغيرة ومازلت قادرة علي الإنجاب.. لا فقد قمت بعملية تمنعني من الإنجاب..!! ماذا..؟؟!! وهل توجد من تجرؤ علي هذا (بكل هدوء) أنا سأحكي لك.. وإياك أن تتهميني بالكفر أو الفجر أو أن نشأتي الثرية كانت وراء ما فعلته أو أن موت أبي وزواج أمي بآخر كان له أثر في تصرفاتي، فأنا لا أحب أن أبحث عن شماعة أعلق عليها أفعالي أو حتي أبحث عن مبرر لما أقدم عليه، الموضوع أنني استوقفني خبر قرأته في إحدي الجرائد عن ممرضة جمعت بين أكثر من زوج وبصراحة أعجبتني الفكرة!! وقلت في نفسي إيه إللي يمنع إني أتجوز أكتر من واحد!!.. متبصيش كده!! أيوه قررت إني أتجوز أربعة وفي وقت واحد ولو في ملك يمين كمان. مش في رجالة بتعمل كده؟؟!!.
وبدأت أدرس الموضوع من وجهة نظري واقتنعت بأن سبب منع التعدد للمرأة هو الإنجاب وسافرت باريس وقمت بإجراء عملية لمنع الإنجاب لمدة عشر سنوات حسبما قالوا لي..
وتزوجت هشام أول بختي مهندس ناجح ومشهور وحطيت شروط للزواج.. أولها أن من حقي التغيب عن المنزل دون إبداء الأسباب وأننا ممكن ننفصل في أي لحظه أقررها أنا!! علي فكرة دول شرطين أساسيين في كل زيجاتي والحمد لله إن محدش اعترض.. مش بقولك المال والجمال يحلو كل حاجه... وبعد سنة جواز زهقت ولم أتعب نفسي لا في تغيير أو خلق مواضيع جديده عشان الملل والحاجات اللي بتتقال للحصول علي زواج ناجح، فقررت الزواج من حسين رجل أعمال وعايش في المنصورة ومش قادرة أوصف لك إحساسي بفستان الفرح والزفة بجد شيء رائع إوعي تسألي علي العيلة والأهل كلها أشياء لا تستوقفني ولا تستوقف من أرتبط بهم (وهي تنظر إلي محدقة) علي فكرة أنا فاهمه بصتك بس ده مش وقته ولا مكانه أنا بحكي لك بس وأصبح عندي زوجان نفس الكلمات ونفس الأحداث.. وشوية وزهقت وتكررت نفس الحكاية زوج وفستان جديد (وكأنها تحكي عن واحدة أخري) المهم بعد سبع سنوات أصبحت زوجة لأربعة!! آه علي ذمتي أربعة رجال كل واحد أحسن من التاني ومن مستويات مختلفة ومهن مختلفة مش قادرة أوصف لك إحساسي وأنا بستغفل اللي حوليه.. شعور شكله إيه شرير بس جميل..!
ومقدرتش أفرط في أي واحد فيهم كل واحد فيه صفة مش موجودة في التاني، علي فكرة القلب والجسم طلعوا ممكن يحبوا أكتر من واحد!! أنا عارفة إنتي عايزه تقولي إيه وليه مش صداقات وعلاقات بدل الجواز صح؟؟ ولم أنطق فهذا فعلا ما تبادر لذهني (وبمنتهي البساطة وكأنها تقرر مسألة محسومة). أنا بحب الرجالة وجوايا جذور شرقية ونزعة للحلال وأنا اقتنعت بكده أن عدم تعدد الأزواج سببه الأطفال وبعدين إلا الحرام وجسمي.. !!
وبجوازي لا كان في أنساب ملخبطة ولا عيل مش معروف له أب..!! وبعد شويه قرفت من نفسي أوي ومقدرتش أستمر وأخذت قرار صعب أوي طلقتهم كلهم وعلي فكرة محدش يعرف لغاية دلوقتي أني كنت متجوزة أربعة آه ده غير العرفي والعلاقات العابرة. تعرفي أنا مش عارفة حكيت لك ليه؟؟!!. عرفتي ليه معنديش أولاد غير اللي كفلتهم. وسرحت بعيدا وابتسمت فلم أجد كلمات تسعفني لأعلق علي ما قالته إلا أن فكرة الزواج بأربعة استوقفتني وحمدت الله علي أنني أومن بأن هناك أمورا تعبدية لا يجب المساس بها أو تحليلها أو الاجتهاد في تفسيرها وتساءلت هل ممكن الرجل ينتابه نفس الشعور بالقرف والتكرار...؟؟؟!!! ولم يشغلني هذا كثيرا وانطلقت في طريقي.