• أنا مش مصدق والله.. خمسميت جنيه!! ليه؟! - الأسعار زادت قوي. • دي كلها بقالة ما تكفيش أسبوع. - لأ.. بصراحة الزيت ممكن يقعد عندنا أسبوعين. • ولو، أنانفسي أفهم سبب الزيادات دي كلها إيه؟ - أصل عجلة الإنتاج اتخرمت. • نعم!! إيه دي؟! - عجلة الإنتاج • إنتي كمان حتقولي الكلام ده!!! - آه وما أقولش ليه، مش هي دي الحقيقة؟! • حقيقة إيه!! - اللي حاصل في البلد دلوقتي، مش هو السبب إن عجلة الإنتاج نامت!! لازم ننفخها شوية.. • ومين إللي قال الكلام ده! - كتير، وعندهم حق. • حق في إيه؟ - لما عجلة الإنتاج تتخرم، العربية حتقف، والإنتاج يقل، ولما الإنتاج يقل، الطلب يزيد، وترتفع الأسعار، دي نظرية اقتصادية معروفة. • إيه الثقافة اللي حطت عليكي مرة واحدة دي. - كل ما أنزل اشتري حاجة ألاقي سعرها زاد، دماغي ضربت قلت أشوف فيه إيه، اكتشفت حكاية العجلة دي. • طب وماعرفتيش مين خرم العجلة. - بيقولوا المظاهرات والمليونيات. • مش فاهم، عملوا إيه يعني، خلوا العجلة ماشية وحطوا تحتها مسمار مثلا؟! - تقريبا. • إزاي يا فالحة؟ - مش المظاهرات دي بتخلي الناس تخاف!! وإللي بيشاركوا فيها مش بيسيبوا شغلهم ويقفوا في المظاهرة!! يبقي العجلة حتمشي إزاي؟ • يعني أنتي شايفة أن عجلة الإنتاج دي كانت ماشية زي الفل قبل الثورة، ودلوقتي وقفت؟! - مش وقفت، اتخرمت. • يعني كانت كويسة قبل الثورة؟ - هه.. آه طبعا، أومال ليه بيقولوا إنها وقفت؟! • أنا إللي باسألك. - آه، كانت ماشية. • ولما هي كانت ماشية، ليه كنتي دايما تشتكي برضه أن الأسعار بتزيد. - عشان الأسعار كانت بتزيد، هو أنا يعني كنت باكذب، لأ الأسعار كانت بتزيد. • يعني لما العجلة ماشية الأسعار بتزيد، ولما تتخرم.. - مالك، أنت واقف لي عالكلمة!! • أصل عيب عليكي قوي - إنتي بالذات - أنك ترددي كلامهم كده من غير ما تفكري. - إيه - إنتي بالذات - دي، قصدك إيه؟! • قصدي إنك طول عمرك بتفهمي، جري لك إيه! - الأسعار جابتني الأرض، حنعمل إيه في رمضان!! • ما تغيريش الموضوع. - موضوع إيه؟! • عجلة الإنتاج. - ماهم إللي بيقولوا، عاوزين الشباب يرجعوا بيوتهم عشان عجلة الإنتاج ترجع تدور، قلت يمكن لو ده حصل الأسعار تنزل شوية ويزودوا لنا المرتبات. • كل ده حيحصل لما يحققوا للناس مطالبهم. - شفت.. كلامك ده معناه إن العجلة واقفة فعلا. • لأ مش معناه كده.. عموما خلينا في موضوع العجلة، هو إنتي قريتي عن كام مصنع وكام شركة قفلوا وإنتاجهم وقف!! - ما قريتش حاجة زي دي. • طب كام واحد اشتكي إن العمال والموظفين سابوه وراحوا اعتصموا في التحرير. - ما سمعتش حد قال كده. إنت عاوز تقول إيه؟ إن كل حاجة ماشية زي ما كانت!! • أنا عاوز أقول إن حتي لو عجلة الإنتاج قبل الثورة كانت ماشية أحسن من دلوقتي فده ما كانش مأثر فينا خالص. - إزاي بقي؟! • لأن كل حاجة قبل الثورة كانت لمصلحة مجموعة واحدة، إللي هم أصحاب العجلة، الأغنيا، هم إللي كانوا بيكسبوا، وعمر ده ما كان له تأثير علي العمال أو الموظفين. - لا يا شيخ!! • مرتباتهم هي هي، ويمكن كمان كانوا بينقصوهم كل شوية ويتحججوا إن فيه أزمة اقتصادية، مش بس كده، كانوا دايما يرفعوا الأسعار، بدون مبرر ولا حد يحاسب ولا جهة تراقب. - ما هو لغاية دلوقتي لا فيه رقابة ولا حاجة. • أهو ده بقي الكلام.. لازم الحكومة تعمل حاجة عشان تضبط الأسعار، ما ينفعش يمشوا بنفس الطريقة بتاعة حكومة مبارك، ويسيبوا الناس تضيع. - حيعملوا إيه يعني؟ • إيه السؤال الغريب ده!! لو مش عارفين يعملوا إيه يجيبوا اللي يعرفوا، بلاش دي، يسألوا، ما تجيبي الجرايد واسمعي الخبرا الاقتصاديين بيقولوا إيه؟ - بيقولوا إيه؟ فيه أمل أن الأسعار تنزل؟! • السوق دلوقتي متساب لتجار الجملة والمستوردين ودول بيشتغلوا لمصلحتهم، ولغاية دلوقتي لسه بيخزنوا سلع عشان يفتعلوا أزمة والأسعار تزيد. - يا خبر. • زي ما بأقولك، ولغاية دلوقتي السعر اللي يطلع عمره ما ينزل ثاني، حتي لو السعر العالمي نزل. - زي زمان، كنا دايما نقول كده. • أنا قريت مرة آراء كثيرة في الموضوع ده وكان فيها اقتراحات مهمة جدا. - إيه!! • يعني مثلا بيقولوا لازم وزارة التضامن الاجتماعي تطلع نشرة بالأسعار عشان التجار يلتزموا بيها وإللي يخالف يتحاسب. - ما هم قالوا إحنا اقتصاد حر، وما ينفعش نعمل كده. • غلط، كل الدول إللي فيها اقتصاد حر عندها قوانين لضبط الأسعار ومنع الاحتكار. - طب إيه رأيك مادام هم متمسكين قوي بحكاية المحاكمات العسكرية دي، يبقي يخلوها للتجار إللي بيحتكروا السوق أو بيفتعلوا أزمات. • يا سلام عليكي، أهو كده إرجعي زي ما كنتي. - عجبتك!! • قوي. - أصل أنا متغاظة قوي عشان وزارة التضامن الاجتماعي عاوزة تعمل كوبونات الناس تشتري بيها أنابيب البوتاجاز، قلت ولا كأن حاجة اتغيرت، ومش بعيد بعد شوية يعملوا كوبونات للعيش، وكوبونات للرز. • ربنا يستر.. دي أكتر حاجة مضايقاني في الحكومة بتاعتنا. - الكوبونات؟ • لأ، طريقة التفكير، مافيش حاجة حتتغير ولا حتتحسن أحوالنا إلا لما طريقة التفكير تتغير. - عندك حق. • يعني مثلا، ليه ما يعملوش حد أقصي. - آه، والله، ده أنا كنت حأموت لما وزير المالية قال حنعمل حد أدني ورفض الحد الأقصي، وقال السنة الجاية، يا سلام، ليه شوف بقي في السنة دي حيضيع كام. • مش بس في المرتبات.. - قصدك في إيه كمان. • في الأرباح. - لأ صعبة دي، ما ينفعش، معقول تقول لواحد أوعي تكسب أكثر من كذا!! إزاي تفكر بالطريقة دي. • إفهمي، ده مش قصدي خالص، أنا بأقولك في أسعار السلع الأساسية. - يعني إيه؟ • يعني السكر والزيت والرز والسلع التموينية دي، نقول للمستوردين واللي بينتجوا محلي أو حتي المستوردين، في المرحلة إللي إحنا فيها دي بلاش تبالغوا في الأرباح حطوا سقف. - حلوة. • إللي عاوز أقوله إن السوق الحر مش معناه فوضي، وإذا الحكومة عاوزة فعلا تضبط الأسعار حتقدر. - إذا عاوزة!! قصدك إنها مش عاوزة؟! • مش عارف. - إوعي تقول كده، لكن ممكن تقول مش عارفة.. • طب يا حنينة، مش عارفة، ربنا يقدرها. - علي إيه ولا علي إيه؟ • علي إللي إحنا بنتكلم فيه. - العجلة المخرومة!! • آه، يارب انفخ في صورتهم عشان يقدروا ينفخوا العجلة.
