Supplies وUniform خراب بيت بمزاجك

أنا بابا يلا

هذه الحكايات، حكايات من وحى خيال الكاتب والرسام، وليست لها أى علاقة بالواقع الجميل، حكاية أب شايف المصلحة وعارفها وفاهمها.. ما هو كان جاى لما الباقى كان لسه هيروح! أومال إيه؟!
غصب عنه، مش بخاطره، رافض يسيبهم يجربوا بحريتهم، خايف عليهم حتى من نفسهم، أما أولاده.. لأنهم لسه رايحين فمش فاهمين، عايزين يجربوا، عايزين يفكروا بنفسهم لنفسهم.. وهنا تبدأ الحكاية.

الأم: تصدق يا أبو وليد.. إحنا فلتنا
الأب: ليه.. وصل الكهربا جه؟!
الأم: كهربا إيه.. لأ.. قصدى على المدارس والحاجات بتاعتها
الأب: اشمعنا؟!
الأم: جارتنا.. أم ليلى.. أنت عارفها
الأب: آه البيضة الحلوة دي؟!
الأم: نعم؟!
الأب: عارفها آه
الأم: المهم.. تخيل جايبة حاجات المدرسة ب5000 جنيه
الأب: طب والله مصاريف معقولة بالنسبة لأن ولادها ما شاء الله بيتكلموا إنجليزى «لبلب»
الأم: مصاريف إيه دى Supplies والuniform
الأب: ده إيه أدوية.. هو ابنها تعبان؟!



الأم: يا راجل يا متأخر.. دى لبس المدرسة وحاجة المدرسة الكتب والكراريس والألوان وكده
الأب: يا نهار أبوها ملون غامق! إزاى 5000 جنيه عشان دول بس وعيل واحد.
الأم: لأ اتنين
الأب: حتى لو.. كتير أومال مصاريف المدرسة كم على كده؟!
الأم: 80 ألف باين للطفل.
الأب: إيه؟! وزعلانة على ال5000 جنيه.. لا ما تزعلش بجملة
الأم: بس ربك والحق.. بقول يا ريتنى دخلت الولاد حاجة زى كده.. شايف ولادها.. أجانب والله
الأب: آه وماله.. دخليهم هم المدرسة دى وأنا أدخل الإنعاش.
الأم: ليه يا راجل.. بعد الشر.
الأب: 80 ألف فى السنة.. أنت اتجننتي
الأم: يا سيدى أنا بقول كان نفسي
الأب: معلش فى الجنة بقي!
الأم: عارف.. أنا كان نفسى أنا شخصيًا أدخل المدرسة دى أتعلم لغة وكده



الأب: آه.. وتسمعى أغانى أجنبية وتشتمى بالإنجليزى.
الأم: أنت مش فالح غير فى التريقة.
الأب: أبوكى كان هيجيب مصاريفها منين؟! دول مجانين با بنتي
الأم: بالعكس.. ده استثمار.. كل اللى بتحطه فى ولادك وهم صغيرين هيرجعلك.. وهيشتغلوا ويجيبوا فلوس
الأب: هيجيبوا لنفسهم.. مش ليا
الأم: وماله.. أهو عشان ما يمدش إيده ليك ويقولك هات.
الأب: والله لو مد إيده ورجله ونام لى على الأسفلت.. منين؟!
أنا خلصت اللى حيلتى على تعليمهم وتربيتهم.. حلو أوى كده.
الأم: تعليم إيه.. دول حكومة.. ومعلوماتهم عن الإنجليزى زى معلوماتك عن الهندى بالضبط.
الأب: أم وليد.. العيال خلصوا مدرسة وابنك داخل الجامعة.. وأنا وأنت خلصنا من زمان.. هو حبك للنكد بقى احتراف!!