اعزائي حبايب قلبي كل سنة وانتوا طيبين وكل تالت يوم عيد اضحي مبارك وانتوا بألف خير والسنة الجاية تكونوا حققتوا كل اللي بتحلموا بيه واشوفكوا علي عرفات قادر يا كريم.. وف عز مانا عمال امدح وادعي جالي اللي ما يتسمي الموكوس الشيطان وضحك ضحكته اللي بيقلدها بالظبط ممثلينا لما يمثلوا عفاريت وقال ايه الأوفر ده (أوفر يعني مبالغ فيه) ده انت قديم قوي يا خالد بيه هو لسه فيه حد ف العيد بيقول كل سنة وانتوا طيبين؟ امال أقول ايه يا منيل.. تصبحوا علي خير خير ايه يا راجل بعد الشر؟ اكتب عالموضة ولا يا شيطان انت.. لم ديلك و اتلم ووضح.. موضة ايه؟ موضة الغم الأعظم.. موضة سودها ف وشي سود.. موضة جتنا نيلة ف حظنا الهباب.. الموضة اللي انا صممتها وارسيت قواعدها في كل مناحي الحياة برامج جرايد مسلسلات افلام مسرحيات.. موضة الاكتئاب العام يلا وريني هاتكتب ايه عالموضة و قعد قدامي يشوف هاكتب ايه.. قلت اجرب وكتبت.. اعدائي القراء ليلتنا سودة ومش فايتة ولو حد ابتسم هاتبقي ليلة طين كل عام واحنا مكشرين ومنكدين ومتشائمين وباصين لنص الكوب الفاضي ومطنشين بمزاجنا نصه المليان... فانشكح الشيطان وقال اهو كده برافو عليك كده تكتب كتير تبيع اكتر الجرايد تقطع بعضها عليك واحتمال يخلوك مذيع توك شو هاسيبك نص ساعة وارجع تكون خلصت المقالة ومشي ابن العفريتة وتركني مذهولاً من ظاهرة كنت فعلا لاحظتها مؤخرا انما خلونا نطبقها عاللي بنفهم فيه وهو المسرح يا حبة عين والدته... ما قريتش حوار يوحد الله مع نجم ونجمة وحتي نص نجم او ربع نجمة الا وانبري الاخ اللي بيعمل معاه الحوار وراح راقعه سؤال من عينة (اين ترعرعت سيدتي) ويقول له اين انت من المسرح؟ يقوم النجم ينبري هو راخر وعلشان كلامه يبقاله لزمة ويبقي حراق ويستاهل النشر يقوم يرد لا فض فوه (مسرح؟ وهو فين المسرح؟ ده المسرح ماااااات من زماااااان) ولا يكتفي الاخ النجم - اللي لو طلبوه يعمل مسرح طبعا هايرفض لان وراه اعلانات صابون و مرقة دجاج وبرامج مسابقات وكاميرا خفية هاتروقه فلوس فايه بقي اللي يجيبه يشقي و يعمل بروفات - لا يكتفي باعلان وفاة المسرح بل ويحضر دفنته وعزاه بالمرة ف عمرمكرم ويتجاهل الاخ اياه جهد مئات الفنانين مازالوا علي ايمانهم بالمسرح بل ويتقمص دور عبد الفتاح القصري عند حديثه عن المسرح المقدم حاليا فيقول (هو ده مسرح ده؟ ده المسرح عندنا ف اوروبا المسرحية من دول قاااااد كده).... اما اذا اشتركت مصر مثلا بعروض في المهرجان التجريبي الذي تنظمه ولم تفز بجائزة تبقي ليلة سوده وتقرا بقي مانشيتات من اللي تستاهل بقك من عينة (صفر المهرجانذ مصر تخرج من مولد التجريبي بلا حمصذ حاكموا المسؤلين في ميدان الكيت كات) وكأن مصر بتنظم مهرجان دولي وتدعوا اليه اكتر من 40 دولة كل سنة علشان هي اللي تكسب بس الجوايز وهما يتفرجوا ويصقفوا يعني بمعني ادق جايبنهم نكسر عينهم علشان ماسكين عليهم ذلة... انما بقي هل هناك اي حد من اللي انبروا دول قال ان مصر ف اخر تلت مهرجانات للتجريبي كسبت جايزة أحسن اخراج وأحسن عمل جماعي وأحسن ممثل... ابدا يا خويا الا كله ضرب ضرب ومافيش شتيمة... حد قال في الميتين مسرحية اللي بتنتجهم جهات الانتاج المختلفة دول انا عجبني ده ومعجبنيش دهون... (حلوة دهون دي؟) انما لا طبعا مافيش حاجة حلوة مافيش مجهود يشكر اما كله عبقري او يفتح الله ويا ويله اللي يقول كلمة كويسة اقل تهمة يلبسها انه عميل وبتاع الحكومة وخاين واحتمال يقيموا عليه الحد... وطبعا في هذا المناخ لابد ان ينسحب الاخيار اللي صوتهم للاسف واطي لدرجة اني سمعت ان واحد من اياهم دخل علي مسرحي مجتهد مسكين وسن لسانه و قال له بقي دي مسرحية دي؟ ولسه هايمرمط المسرحية قام الفنان المسكين رادد لا يا باشا دي ماتش كورة ف خماسيات السيدة بس من تغفيلهم هنا سموها مسرحية... عموما ربنا يكون ف عون المجتهدين المتفائلين اللي زي حالاتنا... بالاذن بقي اما اكت قبل ما لشيطان يرجع و يطلب مقالته السوده... باي بقي اه صحيح كل سنة وانتوا طيبين وبخير وملعون ابو الاكتئاب.
