رمضان حصري عالمسرح المصري «تخاريف صيام»

قبل الفطار ف الحر ده.. واللسان مدلدل.. وكوبايات الميه المشبرة سراب برقص قدام عينيك مع ان الرقص ف رمضان حرام ( الا طبعا ف الفوازير والمسلسلات والافلام والبرامج والاعلانات وبس) عيني غفلت وانا باهلوس م العطش.. رايت ابوالفنون عم مسرح ملقح ومشتح عالسرير وحواليه عياله عمالين يعيطوا ويلطموا ويدعوله بالشفا اول ما شافني فتح عينه بصعوبة وقال.. تعالي يا واد.. انت مين فيهم؟ انا خالد جلال يا جدي.. مين ؟خالد جلااااااال.. اه وماله.. خالد جلال.. رامز جلال.. اهو كلكوا ولادي فين اخواتك يا واد؟.. اخواتي مين يا جدو؟.. اخواتك مين؟ ولادي.. حبايب قلبي.. ممثلين المسرح اللي ربيتهم وهشكتهم علي خشبتي لما كانوا صغيرين.. فين ولادي حبايبي؟ راحوا فين؟ وطبعا باعتبار ان الكدب ف رمضان حرام.. فانا كان لسه لساني هايفلت واقوله ماهم بيصوروا ف الاستوديوهات يا جدو.. زغرلي الدكتور بتاع جدي وقالي كلمة تانية تقضي عليه.. الراجل قلبه مش مستحمل ماتقولوش ف الاستوديوهات.. بغباوة رديت.. طب اقول له ايه؟ بيصوروا خارجي؟.. خارجي ايه واستوديوهات ايه؟ ماتقولش تصوير دي خالص قول اي حاجة تانية.. الله يا دكتور.. يعني هما يعملوا مسلسلات وانا اكدب وافطر ف رمضان والقطة السودة تقطع مصاريني.. قاللي الدكتور والدمعة هاتفر من عينه ابقي صوملك تلات تيام.. فكرت شوية و قلت دي كدبة بيضا زي الجبنة البيضا ماتفطرش دخلت علي عم مسرح.. قاللي هما فين يا بني.. رديت.. ماليين المسارح يا عم خشبة.. والنبي صحيح؟.. اه صدقني (وصدقني دي علشان ماكنتش عايز احلف كدب كمان.. كده هاصوم تلاتة تانيين ده غير الاولانيين يعني هاصوم السنة الجاية كلها) صدقني يا عم خشبة ده حتي بالامارة بنتك غادة عبد الرازق.. وكانه ماصدق.. فرد.. اه.. اهي دي الممثلات والا بلاش.. طول بعرض بصوت بهلة.. وطلعت من المسرح لحد ما بقت نجمة كبيرة.. والله فيها الخير عاملة مسرحية جديدة؟ ارتبكت ثم تمالكت اعصابي ورديت.. اه مسرحية زهرة وازواجها الخمسة.. علي مسرح ايه دي يا واد؟.. والله يا عم خشبة هي ف المسرحية بتطلع عروسة خمس مرات ففكرت تعملها علي مسرح العرايس.. تفاؤلا يعني.. عال عال طب وحبيبي صبحي روح قلبي.. فارس المسرح..؟ هوانت مش عايز تنام ليه يا جدو..؟ رد يا واد بلاش قلة ادب فين حبيب قلبي صبحي؟.. يا جدي انا كده هاصوم تلت سنين ابوس ايدك.. رد يا واد.. حاضر.. هو كمان يا عم خشبة بيعملك مسرحية تحفة اسمها ونيس.. ونيس؟ ودي علي مسرح ايه يا واد؟ علي مسرح السلام علشان دي مسرحية اجتماعية.. كده بقي طمنتوني.. طب وحودة؟.. حودة مين يا عم خشبة؟.. حودة حبيب قلبي.. محمود ياسين الملك.. أبوصوت دهب.. ده لما كان يمثل ف المسرح كان بيخليه ارش كومبليه.. راح فين يا واد.. قلتله.. عم محمود.. ده عاملك حتة مسرحية اسمها ماما ف القسم... قسم؟ ودي علي مسرح ايه؟ عالمحور يا جدو.. محور؟ هو فيه مسرح اسمه المحور.. فارتبكت.. لا يا جدي انا قصدي المسرح العايم بتاع الجيزة اول ما تنزل نزلة المحور تلاقيه ف وشك علي طول.
طب وعايدة عبد العزيز..؟ عاملالك مسرحية تاريخية اسمها الملكة نازلي...وبتسلم عليك يا جدي.. سلملي عليها قوي يا واد... قول لها وحشاني.. وخالد صالح..؟ عاملك مسرحية موعد مع الوحوش عالهناجر.. طب خالد الصاوي..؟ اهل كايرو علي ميامي يا جدي.. عزت العلايلي..؟ الجماعة ياجدي.. حسين فهمي.. بابا نور.. نور؟ طب بمناسبة نور.. نور الشريف فين؟.. الدالي يا جدو.. طب وكنج لير الفخراني..؟ عاملك كنج برضه بس صعيدي.. وهكذا قعدت اكدب اكدب اكدب كل ما يقوللي علي نجم مسرح اقوله بيعمل مسرحية كذا واقوم رازع اسم مسلسله اوفيلمه وبايني هاقضي القرن الجاي كله صيام.. يلا اهو الصيام احسن ماتكون عقوبة الكدب زي بينوكيو ومناخيري تطول كل ما اكذب واقضيها عمليات تجميل.. وحصل اللي ماكنتش مستنيه.. اول ماعم مسرح سمع عن حالة النشاط الكبير اللي بيقوم بيها ولاده المسرحيين دب الدم ف عروقه وصغر عشرين تلاتين سنة مرة واحدة وقام ناطط م السرير.. علي فين يا جدي؟ تعالي يا واد نتفرج عالمسرحيات اللي قلتها.. يا نهار اسود..! ده لوعرف الحقيقة هاتجيله صدمة نفسية ومش بعيد يروح فيها وابقي انا اللي قتلت عم مسرح.. وابتدت تجيلي الصورة التقليدية اللي ف كل افلام زمان.. اني واقف ف القفص وباصرخ انا ماقتلتوش انا ماقتلتوش.. ففقت وقلتله بلاش يا جدي.. ليه يا واد؟ اقولك يا جدي.. ما تيجي نشوف كل المسرحيات دي ف التلفزيون.. اندهش عم مسرح وفغر فاه (حلوة فغر فاه دي؟) وقاللي ماشاء الله هوالتلفزيون بيعرض المسرحيات دلوقتي؟.. اه يا جدي.. معقولة اخيرا حسوا ان المسرح مهم وبيذيعوه؟ لا وعالهوا كمان؟ انا مش مصدق نفسي.. والله انا خايف علي صحتك يا جدي لتنهار م الفرحة من كتر المسرحيات.. انا باقول تنام شوية وانا هاصحيك بنفسي بعد رمضان.. ايوه يا واد صحيني بعد رمضان علشان اتفرج عالتجريبي.. ماشي يا جدي نام بقي.. ونام جدي مبسوط مرتاح البال وسابني استعد لصيام اتناشر تلتاشر سنة جايين.. يلا.. كله فدا عيونه.. كل سنة وانتوا طيبين.