«طحالب الزمان.. لاتنتهى»

«الفشل « الوصف الوحيد اللى ممكن يلخص حياة الفنان «أحمد رمزى» ... فى الظاهر شاب وسيم محبوب دنجوان.. كل البنات بتجرى وراه .. وفى الباطن فشل فى دراسة الطب بعد 3 سنوات رسب فيها بالكلية وتركها ليذهب إلى كلية التجارة ليفشل فيها أيضا ويتوقف عن استكمال دراسته.
فى الظاهر عايش حياة كلها سعادة وحبا وشبابا وانطلاقا.. كل الشباب بيقلده فى فتحة زراير قميصه وصدره العارى.. وفى الباطن بيفشل فى 3 زيجات بسبب العصبية .
فى الظاهر خفة دمه وضحكته المجلجلة بتقول إنه عايش حياة سعيدة .. فهو الولد الشقى أبو عيون جريئة .. محطم قلوب العذارى.. وفى الباطن حزين يعيش مأساة بسبب مرض ابنه «نواف» اللى اتولد قبل الشهر السابع فأصيب بإعاقة ذهنية بسبب بعض المضاعفات فى المخ والتى جعلته غير قادر على الحركة بشكل طبيعى.
فى الظاهر يعيش أحمد رمزى حياة الشهرة وفى الباطن يتألم بعنف من أجل ابنه الذى أخفاه عن الجميع ولم يعرف أحد عنه شيئا حتى ظهر فى عزاء والده.. ومات بعده بسنوات وحيدا فى لندن.
جزء كبير من فشل أحمد رمزى فى حياته الشخصية كان بسبب شلة السوء «الطحالب اللى عايشة حواليه تقتات على نجاحه وشهرته وحياته نفسها»..حتى مشروعه الخاص فى بناء السفن بعد ابتعاده عن الفن فشل بسبب تلك «الطحالب».. وخسر فيه كل أمواله.. لينزوى بعدها بعيدا عن الجميع .
«الطحالب « بتعيش حياتها كلها علشان توهمك أنك معصوم من الخطأ .. بتزينلك كل حاجة «شلة سوء» بتعيش تتغذى على أذية الناس .
«الطحالب» دى فى الظاهر بتزين لك كل أفعالك.. وفى الباطن بتضرك أنت نفسك.. توقع بينك وبين أقرب الناس لك،وممكن تدخلك وتوقعك فى 100 مصيبة ، لو مش مصدقنى تعالى أحكى لك حكاية أحمد رمزى وعلاقته بعمر الشريف وإزاى «طحالب أيامهم» وقعت بينهما لمدة 8 سنوات، قطيعة كاملة، بعد أن كانا أقرب صديقين ،عمر الشريف هو اللى فتح الباب لرمزى علشان يشتغل فى السينما، وفجأة بسبب «الطحالب» مش طايق يشوف وشه ولو اترشح لفيلم بيرفض أن أحمد رمزى يشاركه !
صفة الدنجوان المحبوب فى الظاهر ..كانت هى السبب فى الباطن فى الخلاف بين عمر الشريف وأحمد رمزى . بعد النجاح الذى حققه عمر الشريف فى فيلم «صراع فى الوادى»، أسندت له بطولة «صراع فى الميناء»، فرشح عمر الشريف صديقه أحمد رمزى، لتجسيد ابن صاحب شركة النقل البحرى، ووافق حينها المخرج والمنتج، ولم يكن يعلم الثنائى عمر وأحمد أن هذا الفيلم سيتسبب فى قطيعة بينهما تدوم لأكثر من 8 سنوات.
فى الظاهر كان النجمان «سمن على عسل» وفى الباطن كانت «الطحالب» تمارس هوايتها المفضلة فى الوقيعة بين الاثنين .
واحد من «الطحالب « ذهب إلى عمر الشريف وقال له إن أحمد رمزى، بيحب زوجته فاتن حمامة وبيعاكسها فى الخفاء. «الطحالب» فى الظاهر كان قلبها على عمر وفاتن وقصة حبهما .. وفى الباطن عايزة تولع الدنيا وتوقع بين الاثنين الأصدقاء خاصة وعمر الشريف معروف غيرته الشديدة على زوجته.
فى الظاهر استمر تصوير الفيلم، وفى الباطن استغل عمر الشريف فرصة مشهد يضرب فيه أحمد رمزى ،وتوجه ناحيته وظل يضربه حتى سقط فى مياه البحر المليئة بالمازوت ،وعندما تم إنقاذ أحمد رمزى وانتشاله من الماء، كان جسمه قد أصيب بحروق شديدة، الطحالب أبدت اندهاشها وكملوا على الباقى من الود.. واندهش الجميع من هذا التصرف، خاصة أن عمر الشريف أخذ فاتن حمامة وترك موقع التصوير فورالانتهاء من تصوير المشهد.. وبعدها قرر عمر الشريف ألا يشارك فى أى فيلم يتواجد فيه أحمد رمزى.
ألم أقل لكم إن «الطحالب» فى الباطن ممكن تضرك أنت نفسك.. وهدفها أنك تفضل تحت سيطرتها تقتات على حياتك لأنها مستفيدة منك، وفى اللحظة اللى تشعر فيها أنك ممكن تسيب منصبك هى أول ناس بتهرب منك وتختفى .
«الطحالب» دى فى الظاهر بتصفق لك، وفى الباطن، جراثيم بتشل الدماغ، هدفها الوحيد تفضل مستفيدة منك أطول فترة ممكنة.
خلى بالك الناجح دايما بتنمو حوله «طحالب».. كثيرة فى الظاهر بيعملوا أصدقاء ..وفى الباطن مجموعة من الفاسدين الأفاقين المنافقين الجهلاء ... وأخطر ما فى الأمر أن «الطحالب» دى .. بتبعد عنك الناس الموهوبة بجد اللى ممكن تنصحك لما تغلط .
فى الظاهر بيقولوا لك أبعد عنهم دول بتوع مشاكل.. وفى الباطن عايزين يكملوا مشوار فسادهم لأنهم مستفيدون. النجاح مش شغل بس، علاقتك الكويسة بأهلك نجاح ، خدمتك للناس نجاح، بعدك عن مجتمعات الفساد نجاح، بعدك عن «الطحالب « نجاح، عدم استسلامك لليأس نجاح، مجرد إنك ماشى مش واقف مكانك نجاح، سعيك نجاح، كل يوم بيعدى عليك بتتعلم فيه حاجة جديدة نجاح، كل يوم بيعدى عليك بتقدم فيه قيمة نجاح.