فوازير نيللي.. وفوازير سيادته!

كتب: محمد الرفاعي
علي طريقة جرحوني وقفلوا الأجزخانات، مازال الرئيس السابق لابد في مستشفي شرم الشيخ، واحتار الأطبا فيه، وما حدش عارف هو عنده إيه، وفي نفس الوقت.. مش لاقيين أجزنجي جدع فاتح، ويرضي يصرف الدوا جدعنة، عشان سيادته ما عدش معاه لا أبيض ولا أسود، مازالت حالة الرئيس السابق.. ولا فوازير نيللي بتاع دربكة نبيتي، فمرة.. يقولولك.. صلي علي اللي هايشفع فيك يا مواطن.. سيادته صحته كويسة، بس مزاجه متعكر شوية، ومش عاوز يروح طرة، عشان ما يشوفش خلق الحرامية اللي هناك، وينكدوا عليه، بالإضافة إلي أن المدام ساعتها ممكن ترفع قضية خلع، علي اعتبار أنه رئيس سوابق، ومرة يقولك.. عيسي نبي وموسي نبي.. وكل من له نبي يصلي عليه، سيادته تعبان جدًا، وجاله مرض اسمه والعياذ بالله الارتجاج الأذيني في القلب، وهي حالة نادرة، لم تظهر إلا مرة واحدة أيام الحاكم بأمر الله، وهذا المرض البطال.. يجعل القلب يترجرج عند كل حركة، ويغني رجرجني شوية شوية.. رجرجني وخد عينيه، ولذلك.. يمنع منعًا باتًا أن يتحرك المريض خاصة إذا كانت معاه الحاجة سوزان.
مواطن صايع.. قالك زيد النبي صلاة يا حلاوة.. افرض النيلة اللي اسمه ارتجاج ده مارحش.. يبقي إيه الحل؟! قالك.. شوف يا مواطن.. حاجة من اتنين.. إما نعمل بحكمة ليلي مراد.. يا ساكني شرم الشيخ جنية في بحركم.. الناس تيجي وتروح.. وأنا عاشقة حيكم، وكفاية يشوف سوزي اللي جابتله الكافية كل يوم الصبح، وأما نبقي نشوف عشر رجالة جدعان، يشيلوه علي كفوف الراحة لحد طرة، بشرط ما يشوفش أي خلقة من شيوخ المنسر اللي هناك، وإلا ها يرجعله الارتجاج تاني، خاصة أن الجرائد قد نشرت أن سيادته جاله اكتئاب بعد حبس ولي العهد سمو الأمير جمال، وصاحب توكيل مصر المحروسة علاء، وقد أحضر له المستشفي دكتور نفساني، عشان يطمن سيادته أن هناك محاولات خليجية، لنقله إلي أحد السجون الأوروبية، لكن السيدة سوزان رفضت دخوله، قال إيه.. خايفة يطلع جاسوس للعيال الصيع بتوع ميدان التحرير، ويصوره بالموبايل، وينشر الصور دي علي الفيس بوك اللي جابلهم المصايب، الأكثر غرابة ودهشة، أن الذي يعاين الرئيس هو كبير الأطباء الشرعيين، الذي أكد قبل ذلك، أن صور خالد سعيد الذي قتله البوليس متفبركة.. عمومًا ربنا يدي لسيادته الصحة، عشان نشوفه لابس البدلة البيضا.