الشباب: رمضان.. صيام وصلاة وشغل وأكل وسهر

يعكف معظم الشباب بالعشر الأواخر من نهاية شهر رمضان على التعبد والصوم والصلاة فهى اركان اساسية خلال الايام المباركة بالاضافة الى أداء التراويح والتهجد قبل السحور بالإضافة الى الخروج قبل الفطار لشراء ملابس العيد الجديدة أو ممارسة الرياضة والسهر مع الاصدقاء .. لأن الشباب أكثر الفئات التى يهتم بها العالم، كان لابد من التعرف على الطريقة التى يزيدون بها رصيدهم خلال الشهر الفضيل.
مذاكرة وبعتكف على الكتاب
يقول بكر مجدى 22 سنة: معنديش وقت اعمل اى حاجة فى العشر الاواخر من رمضان غير المذاكرة، لأنى بمتحن علشان بعيد 3 ترمات فى ثانية هندسة مدنى جامعة العاشر من رمضان، وهخلص 22 اغسطس، يعنى قدامى شهر كامل افضل مشغول وحتى بعد رمضان هكمل امتحانات، والموضوع مرهق جدا بس عادى اتعودت على التعب، وامتحاناتى مش مخليانى انتظم فى صلاة التراويح او التهجد لأنى ببقى سهران معتكف على الكتاب لكن بحاول على قدر الامكان انى مبعدش عن المسجد فى رمضان، اما بالنسبة للعيد وهدومه فانا كبرت اوى على الكلام ده.
شهر عبادة وبس.. وبلاى ستيشن وجيم
احمد محمد عيسى 20 سنة طالب: رمضان بالنسبة لى شهر عبادة وبس يعنى على المغرب بفطر وبعدين بنزل اصلى العشاء والتراويح والتهجد والفجر، بعدين اروح البيت انام لحد العصر واصحى واقرا قرآن لحد المغرب وهكذا، لكن طبعا ده ميمنعش انى بين التراويح والتهجد اروح شوية الجيم اشيل حديد علشان جسمى يتظبط او اقعد مع اصحابى فى البلاى ستيشن ونلعب ونفك عن نفسنا شوية.
زى اى حد عادى بفطر عند اقاربى واقابل اصحابى.
محمد الجندى: ايامى فى رمضان زى أى حد عادى بيفطر ويصلى العشاء فى المسجد وبعدها يقعد يقرا قرآن شوية وبعدين يقعد مع أصحابه شوية وبعدين يرجع المسجد تانى يصلى التهجد وبعدها الفجر، ويقعد يذكر ربنا لحد الشروق ويطلع ينام شوية علشان عنده شغل الصبح، وبروح افطر عند أقاربى وبقابل اصاحبى اللى معظمهم بيدينى مواعيد ومبيجوش.
بصلى وبقعد على الفيس
مهاب محمد 25 سنة: شغلى الساعة 8 الصبح بخلص على 3 العصر، ارجع البيت اخد دش حلو و اريح طبعا يكون العصر اذن، اقوم اصلى وارجع اقعد على الكمبيوتر أكلم اصحابى على الفيسبوك وعلى الساعة 6 أقوم اتمشى فى الشقة واتكلم مع اخويا ووالدى، اللى بلاقيه صاحى منهم يعنى، بعدين اساعد والدتى فى تحضير وجبة الافطار، وبعد كده اصلى المغرب واريح، وشوية اصحابى يكلمونى على الموبايل ونتفق اننا ننزل ونقابل على القهوة لحد 12 او 1 الصبح وبعد كده اطلع اتسحر وانام، ودى دورة حياتى فى كل يوم.
بغسل وشى واروح الشغل
محمد ممدوح 23 سنة: بصحى من النوم اغسل وشى والبس واروح الشغل فى الصيدلية وهناك بقرأ قرآن وبساعد الناس وساعات بلعب كوتشينه ع الكمبيوتر بخلص شغلى بروح استريح وبعد كدا افطر ع المغرب وبالليل بنزل اخرج واتفسح وفى اخر الليل بصلى بضع ركعات قيام وادعى واتسحر وأنام واصحى الفجر اصلى وانام اصحى اغسل وشى واروح الشغل.
العمل التطوعى وتوزيع شنط رمضان
إسلام مأمون 27 سنة: العشر الأواخر السنة دى مختلفة شوية بالنسبة لي، فكل رمضان كنت بهتم أكتر بالعبادات وقراءة القرآن فقط. بس السنة دى المختلف فيها هو العمل الخيرى والتطوعي، لاقيت انى عشان اقرب من ربنا فى كذا طريقة ومنهم التهجد. لكن من اهمهم برضه هو تفريج كرب على قلب مسلم وادخال الفرحة على قلبه، فمستمر لآخر رمضان فى توزيع شنط رمضان وتوزيع وجبات افطار وتوزيع فرحة على الايتام والمسنين بايفينتات بنعملها لهم، حفلة فى دار مسنين ودار ايتام ونفطر معاهم. بس انا واصحابى بنعمل الموضوع بشكل مختلف، احنا بنروح ونفرحهم لكن بيكون صعب على أهل الدار ان الناس اللى فرحهوهم مش هيشفوهم تاني. فده بيخلينا نرتبط بالدار ونروحله على مدار السنة كاملة.