ما هو جمع «وحي»؟ الإجابة: «وحوي يا وحوي» أو «وحاويح»

«دعواتي بالتوفيق لأبنائي وبناتي طلبة الثانوية العامة في امتحاناتهم».. دعاء الرئيس مرسي فاتحة الخير «البشري» التي استهل بها طلبة المرحلة الثانوية امتحاناتهم.. أعقبتها مفاجأة مادة اللغة العربية وأسئلة خارج الإطار التقليدي لتفكير الجنس البشري وعلي رأسها السؤال الذي حير الملايين «ماهو جمع وحي ؟!»..
طالب بعض الطلبة من خلال مواقع التواصل بمحاسبة مستشار اللغة العربية وإقالته وأخرين طالبوا «تمرد» بإرسال خطاب شكر إلي المستشار واضع الامتحان لمساهمته الفعالة في نزول الطلبة يوم 30 يونيه.. فقد تنوعت إجابات الطلبة تبعاً لتفاوت مستويات الذكاء علي النحو التالي:
«طبعا جمع كلمة «وحي».. وحوي ياوحوي إياحة، واحد صاحبي بيقولي في امتحان العربي عملت جمع «وحي» «وحاويح» نهضة ده ولا مش نهض يا متعلمين»، «بسم الله الرحمن الرحيم «يا أيها الذين آمنوا لا تسألوا عن أشياء إن تبد لكم تسؤكم.. صدق الله العظيم»، «مفيش غير اتنين بس هما اللي ممكن يجاوبوا السؤال ده: وزير الاعلام وحسين»!
«سيادة المصحح كان عندي أمل في الدرجة النهائية وكنت راسمة علي طب بعد امتحان النهاردة».. «قررت أتجوز و أقعد في البيت، لما تبص لصاحبك في امتحان العربي ويبوصلك you feel like احنا بنروح في في داهية علي فكرة بنروح في داهية أهو أهو أهو»، «هما طلاب الثانوية هيلاقوها من اللي بيحصل في البلد ولا سد النهضة ولا المذاكرة والقرف ولا البيت والضغط النفسي ولا من النهضة ولا من الامتحانات ولا من جمع كلمة «وحي» ولامن رتب علي حسب المعجم الوجيز ولا إيه ولا إيه ادعولهم ربنا يرحمهم قصدي ربنا يتولاهم».
«امتحان العربي بتاع ثانوية العامة جه في مستوي الطالب اللي بيعرف يلعب estimation»، «هما لسة ما إتهموش واضع امتحان العربي بالتآمر علي مرسي والحشد ل 30-6؟! الأداء انخفض ليه يا شباب»؟، «لما العربي جيه كده وده اللغة الأم أمال الرياضة والفيزياء اللي باللاتيني هيعملوا فينا إيه؟!، تمنيات مرسي لطلبة الثانوية العامة بالتوفيق ما كانش ممكن تعدي كده بالساهل».. «العيال هاتسقط وفيه جيل كامل هاينتحر، طلاب الثانوية العامة (بيشكروا) الشيخ مرسي علشان دعوته لهم امبارح، وبيقولوله كفاية خليك في حالك وادعي لعيالك».
وأفرد الطلبة جزءًا من الإجابة علي أسئلة الامتحان علي هذا النحو:
«هذا الامتحان ساخر هزلي غير موضوعي وغير محايد والأسئلة الواردة به خيالية ولا تمت للمنهج بصلة وأي تشابه بينه وبين المنهج هو محض الصدفة الباحتة.. بحيث يكون هذا الامتحان في مستوي الكائن الفضائي نظرا لما يتضمنه من أسئلة قد لاتتناسب وبعض الكائنات الأرضية لذلك لزم التنويه».