«خالد» المهندس اللى كسر القاعدة بكاميرته

خالد درويش شاب مصرى سكندرى عنده 27 سنة، انتهى من دراسة الهندسة واشتغل مهندس فى شركة بترول، كل ده كلام عادى ممكن يكون عليه آلاف الشباب المصرى، الجديد فى خالد انه بعكس كل الشباب المصرى بيحب الفن والتصوير اكتر من الهندسة، وهدفه انه يبقى مخرج افلام.

الحكاية بتبدأ مع خالد انه بيحب يسمع اغانى وموسيقى جدا ولما بيسمعها بتتجسد قدام عينيه صور ومشاهد للموسيقى والاغانى اللى بيسمعها، فقرر انه يجسد ده فى صورة فيديوهات علشان الناس تشوفه معاه، خالد طلع على جنينة وعمل بلاتوه صغير خاص بيه وثبت كاميرا وعمل فيديو كليب لاغنية "مقدرش انا" لعمرو دياب، وقال انه عمل كده لأنه مجتلوش فرصة يخرج اغانى لمغنيين حقيقيين. اعتمد خالد على تفكيره فى استخدام الكاميرا اللى اشتراها علشان يخرج اللى جواه، فصنع كليبات تنموية تحسس المصريين بانتمائهم لبلدهم وانسانيتهم، غير كده اخرج خالد بعض الفيديوهات الساخرة من الاوضاع اللى حوالينا، واللى ليها مغزى واسقاط سياسى على الاوضاع اللى بنعيشها.

"اتكلم" تواصلت مع خالد بعد ما اتطلعت على القناة بتاعته على موقع "يوتيوب"، فقال لنا الآتى: "انا بحب الاخراج جدا وكان نفسى ادرس الاخراج لكن زى كل الشباب الاهل مش هتوافق ان ابنها يسيب دراسة الهندسة علشان الاخراج، انا احترمت رغبتهم كملت دراسة الهندسة، بس انا عندى استعداد انى اتفرغ للاخراج واسيب شركة البترول اللى انا شغال فيها لو لقيت فرصة للشغل فى مجال الاخراج، انا مش مهم عندى الفلوس ومش عايز آخد من الاخراج فلوس كتير انا كل اللى عايزه من شغلى فى المجال ده انه يجبلى مصاريفى بس مصاريف ايدى فقط لا غير، لو لقيت فرصة بالمواصفات دى انا هسيب شغلى كمهندس حتى لو كان بيعود عليا بدخل مادى كويس".

خالد بيقول: "انا بحلم لمصر، بحلم الحلم بكل تفاصيله وبعيش فيه كأنه واقع، ومش هبطل انى احلم لأن اى واقع جديد لازم نرسمه الاول باحلامنا، بحلم ان الشوارع تختفى منها الزحام وتبقى جناين ورد، نفسى فى وسائل مواصلات متبهدلنيش وتحفظ لنا كرامتنا، بحلم ان اخلاقنا ترجع لنا تانى، بتخيل اننا نمحو كل الامية فى مصر وأن التعليم يبقى قايم على الفهم مش الحفظ، عارف اننا داخلين فى السنة التالتة بعد الثورة وعارف ان واقع بلدنا مختلف عن اللى كنا بنحلم بيه، بس برضه عارف ان حلم التغيير عمره ما بيجى بالتشاؤم، لازم الانسان يكون متفائل. احلم بمصر علشان نفسك علشان عيلتك علشان مستقبل اولادم يكون احسن".

خالد جرّب وطور من نفسه وموقفش مطرحه يستنى الحظ، بل سعى انه يوصل للطريق اللى هو عايزه. تقدروا تشوفوا الفيديوهات اللى عملها خالد من خلال اللينك ده.

/http://www.youtube.com/user

feature=watch? KProductions