المتهم

عشب الربيع مهما اندهس
بالقدم
أو انتنى فى الريح
بيشب تانى لفوق
يغنى للخضرة وطعم الألم
حبيبتى وإن يسألوكي
قولى مسافر بعيد
رايح يقابل العيد
على قلعة فوق الجبل
واللا فى سجن جديد
فى غرفة ضيقة فى ساحة
الإعدام
يرمى الرصاص واللا
الخلاص
فى خية المشنقة
مشوار بعيد المعنى
عالى الصوت
إذا مارحتوش أموت
وعالمى ينقفل
والشمس تسحب خيوطها وتنسحب فى خجل
وسعيد كل ما قربت المواعيد
وهل فجر جديد
سعيد بكل اللى متألمه
كل الألم فى الدنيا متعلمة
فى زماننا ده ما أخيب اللى
الحزن يفطمه
تعبت اقرأ الوجوه بحثا عن
الإنسان
وتعبت اقرأ اليفط بحثا عن
العنوان
كل الخرايط ما توضح تبهت
الأوطان
لكن خلاص كتبت اسمي
بومض الرصاص
وفديت عيون الوطن وفديت
عيون الناس
ويا أمى إن يسألوكى لا
يترعش لك حضن
ولا تحسى بحزن وتقولى مات
فى السجن
ساعتها يبقى الحزن بلا
موضوع
والسجن بلا موضوع والموت
بلا أكفان
وكفاية جربنا سنين الموت
بالمجان
والتافه المتهان أهانا
بالمجموع
الموت مجرد سفر
لاشواك ولا زعابين ولا عفر
ولا كلاب بتطل من جورنان
تخطب بألف لسان
تصبغ وجوهنا النيره بأصبغ
الألوان
ويا أمى كل ما يوهموا بموتي
اتذكرى صوتى بذمتك مش
كان عظيم الآن
قالت له صوتك نشان
قالت موتك بيان
طالع يقول موجود يا أسمر يا أبو عيون سود
فكيت طلاسم سحرنا
المرصود
وعدلت وش الزمان

رسوم: مجدى الكفراوى

شعر: عبد الرحمن الأبنودى