بنات × بنات

عالم البنات مليء بالأسرار ولا يعرف تفاصيله سوى البنات لذا قررنا منح هذه المساحة للبنات ليعبرن فيها عن أنفسهن وللحديث عن المشكلات والهموم والقضايا التى تشغل بالهن ويرفض المجتمع فى كثير من الأحيان الاستماع إليها. ويمكن التواصل والمشاركة فى هذا الباب عبر البريد الإلكترونى:
banatXbanatrosa@yahoo.com

الجواز.. مركب بريسين

«هناك عشر طرق لفهم المرأة»..تقريبا الجملة دى مفيش ولد فى مصر مش مقتنع بيها وكمان مفيش بنت فى مصر تقريبا إلا لما بيكون ردها على الجملة دى «مش للدرجة دى يعنى»هل احنا فعلا كبنات غامضين كدا أو متناقضين لدرجة أن الجنس الآخر بيبذل محاولات مضنية عشان يفهمنا ومش عارف ؟ولا ده تقصير من الطرف الآخر أنه مش عايز يبذل مجهود ولو بسيط فى انه يفهم اللى قدامه؟ المشكلة من وجهة نظرى أن الطرفين مسئوليتهم مشتركة. الطرفين مش قادرين يفهموا ان ربنا خلقهم مختلفين

ولازم يراعوا الاختلاف ده فى التعامل.. وأن ربنا برضه خلقهم يكملوا بعض مش نسخ متطابقة، يعنى إيه برضه؟

الولد فى معظم الأحيان بيعامل البنت اللى قدامه بدماغ أنها ولد زيه مش بيحاول يتفهم ان هى مش من جنسه ودى مشكلة كبيرة وتكاد تكون أزلية. نفسى كل ولد يتعامل مع الطرف التانى على أنه نوع مختلف عنه فى كل شىء مختلف عنه فى التفكير فى الإحساس وفى رؤيته للاشياء والتعامل معها.

وللأسف البنات كمان بيغلطوا نفس الغلطة وكمان الغلط الأكبر أنهم بيستسلموا للوضع ده بيكتفوا بنغمة «ده مش فاهمنى خالص ومش حاسس بيا» طب انتى ليه مش بتحاولى تفهميه انتى بتحبى ايه بتكرهى ايه عايزة ايه ايه اللى بيزعلك بيبسطك؟ ليه متديهوش المفتاح الصح فى ايده وتتناقشى معاه ليه بتكتفى بدور الضحية الغلبانة اللى محدش فاهمها؟

عزيزى الولد والله احنا مش فهمنا صعب أوى كدا محتاجين بس من حضرتك شوية مجهود والله لو مدخلاتك كانت صح هتلاقى المخرجات (النتيجة يعنى) هترضيك جدا وعشان تتعامل المعاملة اللى أنت بتتوقعها وتتمناها لازم يبقى بداية حل المشكلة من عندك وهى تقبل الاختلاف فى الأساس.

وعارف كمان أن الاحتواء هى كلمة السر فى التعامل مع الجنس الآخر اه والله. جرب بس تطبق الكلمة دى بحذافيرها هتلاقى الدنيا بقت حاجة تانية خالص وحياتك اتغيرت للأحسن.ومش كفاية بس أنك تحب اللى قدامك لا، لازم تفهمه وتحس بيه وتقدره.

الحب كلمة مش شاملة عكس المودة والرحمة اللى ربنا ذكرهم فى القرآن الكريم .المودة والرحمة معناهم أشمل من الحب بكتير والشخص الودود والرحيم أكيد بيحب لكن الشخص اللى بيحب مش بالضرورة يكون ودود ورحيم.

أى علاقة فى الدنيا عايزة طرفين ناضجين طرفين عارفين انها مش لعبة ملايكة وشياطين ومين على حق ومين على باطل .طرف ميفكرش بعقلية سى السيد الحجرية وطرف يبطل عند ودماغ ناشفة ويشيل مسئولية بجد. ازاى اتقبل الآخر واتقبل عيوبه قبل مميزاته واتعامل معاها وازاى اساعده فى أنه يفهمنى بشكل مفيهوش غموض أو لبث هو ده بداية الطريق الصح.

واى علاقة برضه عايزة تعاون بين الطرفين. ممكن يبقى فى طرف عليه مسئولية أكبر من التانى أو مثلا عليه أن المبادرة تبقى منه بس فى الآخر عشان المركب تمشى لازم يبقى فيه ريسين وطبعا ده عكس المثل الشعبى المصرى بتاع «المركب اللى فيها ريسين تغرق» اعتقد دى المركب الوحيد اللى هتغرق لو مفيهاش ريسين فعلا.

كتبتها: رنا عبد الحكيم خريجة كلية الألسن وتعمل مديرة للاستيراد فى إحدى الشركات الخاصة وتعشق الكتابة وتهوى التدوين ولها مدونة باللغة العربية.