نشطاء فيس بوك «مرسى ياعمهم ياحارق دمهم .. لعيب»

انتقلت حالة الجدل التى تبعت قرار الرئيس محمد مرسى بعودة مجلس الشعب إلى الوسط الفني، ما بين مؤيد ومعارض وتباينت ردود أفعال النشطاء والمثقفين والفنانين بين الموافقة والاعتراض والترقب الحذر لما ستسفر عنه الاحداث خلال الساعات القليلة المقبلة.

فعبر الفنان مجدى كامل، عن غضبه الشديد من هذا القرار ويراه تحدياً واضحاً للقانون والمحكمة الدستورية العليا التى أتى د.محمد مرسى بقرار منها، مؤكداً أن تنفيذ هذا القرار يعنى الفوضى وهدم لكيان الدستورية العليا وهى سلطة موازية للسلطة التنفيذية التى يمثلها الرئيس والتشريعية التى يمثلها البرلمان المنحل.

أما د.باسم يوسف قال ساخراً عودة البرلمان مؤامرة للتغطية على خروج مصر من تصفيات افريقيا، كذلك علق د. عبدالمنعم أبو الفتوح عبر حسابه الشخصى على تويتر «قالوا مرسى بدون صلاحيات ولما استرد صلاحياته من العسكر قالوا عليه مش بيحترم القانون».

أما نشطاء الفيس بوك لم يمر الأمر عليهم دون السخرية منه وإطلاق عباراتهم وصورهم التهكمية من الحدث مهاجمين من تقاعسوا عن تطبيق القانون فى السابق وتشدقهم بضرورة التمسك به الآن فجاءت تعليقاتهم على النحو التالى «النخبة والأحزاب اللى هاجمت قانون العزل السياسى للفلول وقالوا على البرلمان دول ترزية قوانين ماسمعناش صوتهم فى الإعلان الدستورى المكمل اللى هو تفصيل للمجلس العسكرى نفسه .»

«مرة برلمان عزل شفيق قام شفيق عزله فراحوا باعتين واحد من رجالتهم عزله ورجع البرلمان ( قصة واقعية)، «بيقولك سألوا مرسى عندك صلاحيات قالهم لا وهو عنده جوه».

«الراجل لعبها فى المقص و بهدوء فى الوقت بدل الضائع زى جدو بالظبط انهاردة بكرة كانوا حيحلوا مجلس الشورى و كانوا مقدمين دعوى جديدة لحل الجمعية التأسيسية و خلاص قالوا الماتش خلص،بس جه مرسى و قبل ما يحتفلوا وقام عامل معاهم السليمة جامد الجول ده يا أبو الامراس».

«لو بتكره الاخوان هاتشوف قرار مرسى بلطجه و لو بتكره العسكرى هاتشوفه قرار ممتاز لو بتكره الاتنين هات فشار و تعالى نتفرج سوي، «يعنى مرسى يرجع البرلمان والأهلى يكسب فى يوم واحد الأتنين «

بيقولك مرسى بعت بيان للعسكرى بيقول فيه «اللى فات حمادة واللى جاى حمادة تانى خالص .. أنا بابا ياض».. «مرسى ياعمهم ياحارق دمهم .. لعيب».