بصراحة شديدة

الله يسامحك

يا صديقي أنت أصبحت ثورجي والاّ إيه.. اللي اعرفه عنك إنك بتاع كورة ومتعصب.
يا عم أنا مش سياسي ولا حاجة أنا عايز أشارك في المليونيات اللي بيعملوها في ميدان التحرير.
يعني أنت مقتنع بالخطوة ولك أهداف سياسية أو اجتماعية أو فئوية تريد أن تحصل عليها من خلال المشاركة.
أنا سأشارك في الميدان من أجل الرياضة.. أنا نفسي نعمل مليونية لوقف حصول الأهلي علي الدوري لأنه احتكار وتوريث.. ونفسي في مليونية لإلغاء تعيين التوأم مسئولين عن فريق الاسماعيلي لأن البلد حاتولع من التعصب اسوأ مما حصل العام الماضي لأن التوأم له أجندات خاصة به وهي الانتقام الدائم من الأهلي اللي طردهم في يوم ما.. وأضيف إليهم الزمالك بعد طردهم في نهاية الموسم في مفاجأة من العيار الثقيل
بصراحة.. أنت بتهرج.
أنا باتكلم جد.. يعني اللي بيحصل في الميدان هذه الأيام يرضيك.. كل يوم دعوات علي التويتر والفيس بوك والصحافة والفضائيات لمليونية حب مصر، ومليونية إثبات الذات، ومليونية استمرار الثورة، ومليونية لا للدستور، ومليونية البرلمان أولاً.. طيب يعني يرضيك قيام بعض الائتلافات الكبيرة جداً بطلب مسئولي موسوعة جينيس للأرقام القياسية للحضور لمتابعة أكبر حفل إفطار مليوني في ميدان التحرير.. أليس هذا بتهريج يا صديقي.
ما تآخذنيش للسياسة انا راجل باكتب فقط عن الرياضة وطول عمري مش باحب السياسة لكني سعيد بالثورة العظيمة.
ماهو الكل دلوقتي بيفهم وبيدير البلد من علي القهاوي.. المصيبة يا كابتن ان الشباب مش مصدق اننا قمنا بثورة.. نجحت.. لكنهم سقطوا في بئر التخوين من ائتلاف للآخر.
يا عم.. روح الميدان.. وارفع طلباتك ضد الأهلي والتوأم وانا أستاهل انني تحاورت معك.. ودلوقتي سيقولوا عني من الفلول.. الله يسامحك.