"القرع" ضرب الكونغو فو.. والأجانب خطفوه

لا يجتمع أبناء المعلم الشورة في مقهي والدهم المشهورة في حي العباسية ألا نادراً .. وكل منهم يحرص علي أن يمارس هوايته في زيارة بعض الأندية والملاعب .. ولكن لأن الدوري في أجازة والمنافسة المحتدمة بين بعض الفرق في القمة وفي القاع حصلت علي هدنة بسبب المباريات الأفريقية فقد شاءت الظروف أن يتواجد الثلاثة في وقت واحد وفي نفس المكان .. وبين رواد المقهي كانت تدور العديد من المناقشات عن أحوال الدوري وظروف الأهلي وصحوة الزمالك والتراشق بالتصريحات .. ولكن وسط كل هذا الصخب والضجيج في المقهي وصوت التلفزيون كان حنكورة الشقيق الثاني في ترتيب أبناء العم شورة وصاحب المزاج العالي يبدو مكتئب يحملق في الهواء ونظرة بلهاء تكسو وجهه .
كان أخوته وبعض من في المقهي يتصورون أن سبب هذه الحالة الأزمة الحالية في الحشيش التي تجتاح أسواق المزاج في عموم البلاد وعرضها .
ولكنهم فجأة سمعوه يهذي : الكونغو فوه سرقوه .. الكونغو فوه خطفوه .. والكونغو فوه لطشوه آيوه .. آيوه
هرولت شقيقته شفتورة بقلب المرأة ووضعت يدها علي جبهته وفي لهفة تقول : مالك يا خويا .. أسم الله عليك أنت سخن وألا أيه .. الله يخرب بيت الصنف وسنينه يا رب يغور من البلد شفت أخرتك حتروح الخانكة !!
ولأن شقيقهم الكبير فكورة مطلع وغاوي قراءة عرف فيما يفكر شقيقه فقد كان يستمع منذ قليل إلي رجل مصري واضح عليه الهم والآسي يتحدث عن أن هناك من اتفقوا علي أن ينقلوا اتحاد رياضة الكونغو فو الأفريقي من مصر ومن رئيسه المصري إلي دولة أخري
لم يصدق ابني العم شورة أن يكون هناك مصريين أولاد بلد صحيح يتفقوا علي بلدهم و أولاد بلدهم قال : ده مش بيخرف ده مصدوم من اللي جري في الدنيا وصلت أن مصريين يتفقوا علي بلدهم وياخدوا مقرا لاتحاد الأفريقي من مصر
وقبل أن يعقب أي من الجالسين كان فكورة يواصل حديثة : بصراحة حاجة تجنن واحد يتعامل مع ناس من بره بلده ويتفق معاهم علي نقل الاتحاد بصراحة حركة مش جدعنه .
يقول شبورة يمكن يا خويا نيتهم خير شايفين أن مصر مش ناقصة زحمة والاتحاد اللي بتقول عليه ده ومش عارف أقول أسمه عامل زحمة في الشارع والناس بتوعه رايحيين جايين في الشوارع ليل ونهار وموقفين كوبري أكتوبر يبقي الناس اللي عايزينه يخرج بره مصر غرضهم خير وحتشوف لما الاتحاد ده حيتنقل من البلد الشوارع حتفضي والناس تعرف تروح مصالحهم بسرعة .
ينظر الجميع بدهشة إلي شبورة ويقاطعه حنكورة تصدق ممكن وألا يكون الناس دول عايزين يحلوا أزمة الإسكان ما هو الاتحاد الأفريقي ده واخد له شقه مطرحين وصالة و دي ممكن برضه تنفع ناس غلابة من اللي سكنين في العشوائيات وتحل لنا مشكلة كبيرة يا راجل بالا اتحاد بالا وجع دماغ والناس دي أكيد دماغهم متكلفة وشيفين أن الاتحاد اللي جيلك منه الريح أنقله من عندك واستريح واستفيد كمان .
تتدخل شفتورة في الحوار وتقول دول يااخويا أكيد بيحبوا القرع لأنه بيمد لبره .. وان كان الحشيش شاحح فباين ان القرع كتير في السوق لأن ناس كتير بتمد لبره .